Setshwantsho: Babelaelwa ba tshwerwe ka dithunya

Ka REGINALD KANYANE

21 Lwetse 2026 – Sepodisi mono Bokone Bophirima se tshwere babelaelwa ba le babedi ba dingwaga di le 26 le 38, mabapi le bogodu jwa kgwebo kwa Rustenburg. Go begwa fa sepodisi se amogetse tshedimosetso mo mosong wa Labone, 17 Lwetse 2026, gore setlhopha sa babelaelwa ba ba neng ba tsamaya ka Volkswagen Polo e e mmala wa boronse le Chevrolet e e mmala wa selefera, se ne se rulaganya go dira bogodu jwa kgwebo ka dibetsa kwa Rustenburg East.

Sebueledi sa sepodisi mono porofenseng ya Bokone Bophirima, Constable Thuto Bobelo are morago ga gore tshedimosetso e amogelwe, maloko a sepodisi a thibeleng bosenyi jwa digongwana (Provincial Anti-Gang Unit), Uniti ya sepodisi sa babatlisisi mo porofenseneg (Provincial Tracking Team), Lephata la botlhodi kwa Rustenburg (Rustenburg Crime Intelligence), ga mmogo le Rustenburg Visible Policing le Provincial Crime Intelligence Overt Operations, ba ne ba phuthega, mme ba romelwa kwa lefelong le le supilweng.

Bobelo are dijanaga di le pedi tse di neng di tsamaisana le tlhaloso e e neilweng ke motswedi wa tshedimosetso, di ne tsa bonwa ke mapodisi.

“Batlhankela ba sepodisi ba ne ba atamela babelaelwa le go ikitsise. Fela, go begwa fa babelaelwa ba, ba ne ba ntsha dithunya, mme ba tsimolola go thunya mapodisi. Mapodisi le one a ne a ntsha dithunya go arabela kotsi e e neng e le teng, mme a kgona go laola seemo.

“Babelaelwa ba le robedi ba ne ba tshwarwa. Ba le bararo ba ne ba gobala, mme ba isiwa kwa bookelong jwa selegae. Babelaelwa bao, ba mo tlhokomelong ya sepodisi go fitlha ga jaana. Dijanaga di le pedi tsa mapodisi tse di sa tshwaiwang di ne tsa senyega mo tiragalong eo,” Bobelo wa tlhalosa.

Bobelo are go ne ga gapiwa dilo tse di farologaneng tse di akaretsang Volkswagen Polo, dipistolo di le tharo, sethunya se le sengwe sa rifle, dikulo tsa mefuta e e farologaneng, Chevrolet le megala ya letheka. Bobelo are babelaelwa ba, ba lebagane le melato e e akaretsang go rulaganya go dira bogodu jwa kgwebo, melato e le robedi ya go leka go bolaya morago ga go thuntsana le mapodisi, go nna le dithunya le dikulo tse di se nang laesense, go senya dithoto ka bomo le go kgoreletsa tsamaiso ya bosiamisi.

“Babelaelwa ba solofetswe go tlhagelela kwa kgotlhatshekelo ya Rustenburg ka 21 Lwetse 2026,” Bobelo wa tlhalosa.

Kgabagare, mokomishinara wa sepodisi mono porofensneg ya Bokone Bophirima, Lieutenant General Arthur Adams, o akgotse bopelokgale, tirisanommogo le kgolagano ya ditlhopha tsotlhe tse di nnileng le seabe mo tirong eno, go akaretsa Rustenburg Visible Policing, Detective Branch, Local Criminal Record Centre, Vehicle Crime Investigation Unit, Provincial Investigation Unit le Emergency and Medical Rescue Services.

Adams are lebaka la gore maloko a bona a ne a thuntshiwa ka nako ya kgwedi ya tshireletsego ya mapodisi fa ba ntse ba dira tiro ya bone, ke kgopotso e e masisi ya dikotsi tse mapodisi a lebanang le tsone fa ba sireletsa baagi. Adams are ga ba kitla ba letla disenyi go tshosetsa kgotsa go tlhasela maloko a bone.

“Tsibogo e e bonako le e e rulagantsweng sentle ya ditlhopha tsa rona, e thibetse se se neng se ka nna bogodu jo bogolo jwa kgwebo, mme ya felela ka go tshwarwa ga babelaelwa botlhe ba le robedi,” ga rialo Adams.

taungdailynews@gmail.com