Ka REGINALD KANYANE

11 Lwetse 2026 – Mapodisi a Bethanie a kopa thuso ya setšhaba go thusa ka go batlana le Jeremiah Ofentse Ditlopo (42), yo go begwang fa a timetse mo kgweding ya Sedimonthole ka ngwaga wa 2025. Go begwa fa Ditlopo o bonwe la bofelo ke tsala ya gagwe ka di 19 Sedimonthole 2025, kwa Bethanie.

Sebueledi sa sepodisi mono porofensneg ya Bokone Bophirima, Mokaptein Majang Skalkie are sepodisi se ile sa bolotsa letsholo-patlo, fela ga go ise go nne le katlego. Skalkie are ka nako ya fa a ne a bonwa la bofelo, Ditlopo o ne a apere borukgwe jo bokhutshwane jo bo pududu le bokete jo bo borokwa.

“O tlhalosiwa a na le mmala o montsho, mmele o o magareng, ditedu tse dintsho le lefatla. Re ikuela go mongwe le mongwe yo a ka tswang a na le tshedimosetso ka ga Ditlopo go ikgolaganya le sepodisi.

“Tshedimosetso nngwe le nngwe e ka thusa sepodisi go tsweletsa dipatlisiso le go bona monna yo o timetseng e botlhokwa,” Skalkie wa tlhalosa.

Skalkie are botlhe ba ba nang le tshedimosetso ba ka letsetsa dinomoro tsa Crime Stop mo 08600 10111 kgotsa ba ka dirisa MySAPS App go romela tshedimosetso ka sephiri. Skalkie are kgotsa ba ka ikgolaganya le seteishene se se gaufi sa sepodisi.

taungdailynews@gmail.com

Ka OBAKENG MAJE

11 Lwetse 2026 – Lefapha la Tsamaiso ya Dipuso se Legae, Bodudi jwa Batho ga mmogo le Tsamaiso ya Setso mono Bokone Bophirima, le tsweletse ka maiteko a go netefatsa gore malapa a a tlhokang a bona matlo a a siameng le ditlankana tse di netefatsang beng jwa matlo a bone. Se, se tla morago ga gore mokhuduthamaga wa Lefapha la Tsamaiso ya Dipuso se Legae, Bodudi jwa Batho ga mmogo le Tssmaiso ya Setso, Oageng Molapisi, o neetse malapa a a tshwanelang matlo kwa motseng wa Ditshilong, Diretsaneng le kwa motsesetoropong wa Huhudi kwa Vryburg.

Kwa Ditshilong, Molapisi o neetse malapa matlo a mabedi a a feditšweng, e le karolo ya porojeke ya matlo a le 216 a balelelwang go boleng jwa R45 million.

“Porojeke eno e solofetswe go wediwa kwa bokhutlong jwa Mopitlwe 2027. Puso e ikemiseditse go netefatsa gore malapa a a tlhokang thata a fiwa tlotlo le seriti ka go nna le mafelo a a siameng a bonno.

“Re tla tswelela go netefatsa gore batho ba ba leng mo maemong a a bokoa ga ba salele kwa morago le gore mananeo a rona a matlo a arabela maemo a mmatota a a lebaneng le baagi mo porofenseng,” ga rialo Molapisi.

O tlhalositse gape gore lefapha le tla tswelela go baya leitlho tiro ya borakonteraka go netefatsa gore matlo a agiwa ka boleng jo bo siameng le gore diporojeke di wediwa ka nako. Molapisi are ba lebeletse gore borakonteraka ba age matlo a boleng jo bo siameng, mme ba a fetse ka nako e go dumalanweng ka yone.

“Baagi ba rona ga ba kgone go itshokela tiego e e sa tlhokegeng, Kwa Huhudi Extension 25, re neetse baunngwelwa ba le lesome ditlankana tsa beng ba matlo mo letsholong la Title Deeds Friday, mmogo le ratoropo wa masepala wa Naledi, Clifton Groep.

“Mo ditlankaneng di le 68 tse di neng di tshwanetse go abiwa, lefapha le ne la kgona go neela baunngwelwa ba le 10 ka nako ya tiragalo,” Molapisi wa tlhalosa.

Kgabagare, Molapisi are Lefapha la gagwe le ipeile mokgele wa go aba ditlankana tsa beng ba matlo di 2450, e leng karolo ya maiteko a go fitlhelela mokgele wa bosetšhaba wa ditlankana di le 80 000 ka 2029. Molapisi are go nna le setifikeiti sa beng jwa ntlo go botlhokwa ka gonne go naya beng tshireletsego ya semolao le boshupi jwa gore dintlo tseo ke tsa bone.

taungdailynews@gmail.com