Setshwantsho: Sejanaga se se utswitsweng
Ka OBAKENG MAJE
21 Lwetse 2026 – Monna wa dingwaga di le 29 o tshwerwe kwa Klerkskraal morago ga go latofadiwa ka go kgweetsa sejanaga se go begwang fa sene se utswilwe. Go begwa fa sepodisi le ditheo tse dingwe tsa tshireletso di kgone go bona gape bakkie e tshweu ya Isuzu e e utswitsweng e e phopholediwang go nna ya boleng jwa R380 000.
Sebueledi sa sepodisi mono porofenseng ya Bokone Bophirima, Constable Thuto Bobelo are go begwa fa tiragalo eno, e diragetse ka di 18 Lwetse 2026, morago ga gore North West Crime Intelligence Provincial Overt Team e amogele tshedimosetso mabapi le sejanaga sa bakkie se se neng se belaelwa fa se utswitswe. Bobelo are tshedimosetso e ne ya supa gore bakkie ya Isuzu single-cab e tshweu, e ne e tswa kwa porofensneg ya Kapa Bokone, mme e lebile kwa porofenseng Gauteng.
“Sejanaga seo, se ne se feta kwa toropong ya Ventersdorp, mme tshedimosetso eo, e ne ya dira gore go tlhongwe letsholo-patlo le le kopanetsweng ke sepodisi go akaretsa North West Crime Intelligence Provincial Overt Team, Klerkskraal Police Station, Dr Kenneth Kaunda Flying Squad, Gauteng West Rand Flying Squad, BSO Tactical le dikhamphani tsa tshireletso tsa SAPIS/Syntell E2.
“Maloko a Crime Intelligence ka thuso ya thekenoloji ya SAPIS/Syntell E2 le BSO Security, a tsweletse go sala morago motsamao wa bakkie eo. Tshedimosetso e nngwe e ne ya supa gore sejanaga seo, se ne se lebile kwa Ventersdorp morago ga go tsena mo porofenseng go tswa kwa Kapa Bokone mo diureng tsa ntlha tsa Labotlhano,” Bobelo a tlhalosa.
Bobelo are tshedimosetso eno, e ne ya abelanwa ka bonako le maloko a a neng a le mo tirong, mme sepodisi sa Klerkskraal le Ventersdorp, Dr Kenneth Kaunda Flying Squad le Gauteng West Rand Flying Squad, ba ne ba tsenngwa mo tirong. Bobelo are bakkie eno, ene ya thibelwa mme ya emisiwa kwa Klerkskraal.
“Dipatlisiso di ne tsa netefatsa gore Isuzu eo e ne e begilwe e utswitswe kwa Lwandle Police Station kwa Kapa Bokone. Monna wa dingwaga di le 29 o tshwerwe, mme o lebane le molato wa go kgweetsa sejanaga se se utswitsweng. O solofetswe go tlhagelela kwa kgotlhatshekelo ya Ventersdorp ka di 21 Lwetse 2026.
“Katlego ya tiro eno e bontsha botlhokwa jwa go abelana tshedimosetso le tirisanommogo fa gare ga ditheo tse di farologaneng tsa molao le tshireletso. Tirisanommogo fa gare ga ditlhopha tsa mapodisi, ditheo tsa molao le dikhamphani tsa tshireletso, e nnile botlhokwa mo go boneng sejanaga se se utswitsweng gape le go tshwareng motho yo o belaelwang,” ga rialo Bobelo.
Kgabagare, mokomishinara wa sepodisi wa porofensne ya Bokone Bophirima, Lieutenant General Arthur Adams, o akgotse ditlhopha tsotlhe tse di nnileng le seabe mo tirong eno ka ntlha ya tirisanommogo ya tsone.
The Guardian 