Ka REGINALD KANYANE
21 Lwetse 2026 – Banna ba le bararo ba dingwaga di le magareng ga 18 le 32, ba tshwere mabapi le ditatofatso tsa go utswa diruiwa di le 61 kwa motseng wa Khaukhwe, gaufi le Pudimoe. Go begwa fa ka kgwedi ya Lwetse e tlhola matsatsi a le 17, modisa a ne a tlhaselwa ke banna ba le bararo.
Sebueledi sa sepodisi mono porofenseng ya Bokone Bophirima, Constable Thuto Bobelo are mongwe wa bona go begwa fa a ne a tlhasela modisa ka garawe. Bobelo are modisa o, one a kgona go tshaba mme a itsise mong wa diruiwa tseo.
“Sepodisi se ile sa begelwa ka bonako. Go begwa fa motsamaisi wa seteishene sa sepodisi kwa Pudimoe, a ne a phutha balemirui ba ba leng karolo ya Stock Theft Information Centre (STIC), mme a kopa thuso go tswa kwa District Public Order Policing (POP).
“Dipatlisiso di ne tsa dira gore mapodisi a bone sejanaga sa Mahindra Bakkie se se tshweu, se seneng se belaelwa gore se dirisitswe mo bogodung jwa diruiwa tseo. Mongwe wa babelaelwa one a tshwarwa. Mapodisi a ne a dirisa leano la go ikgakanya jaaka batho ba ba tlileng go tsaya diruiwa,” Bobelo wa tlhalosa.
Bobelo are ba ne ba kgweetsa sejanaga seo go ya kwa lesakeng le le supilweng, kwa babelaelwa ba le babedi ba neng ba ba emetse go laisa diruiwa tseo. Bobelo are go begwa fa babelaelwa ba ne ba gakgamala fa mapodisi a tswa mo sejanageng seo, mme ba ba tshwara.
“Palogotlhe ya diruiwa di le 61, tse di akaretsang dipudi di le 46 le dinku di le 15, di ne tsa bonwa gape mme tsa busediwa kwa go mong wa tsone. Mapodisi gape a ne a gapa buka ya ditlankana tsa diruiwa le megala ya letheka, tse di tla thusang mo dipatlisisong.
“Babelaelwa ba lebane le melato ya bogodu jwa diruiwa le go nna le diruiwa tse go belaelwang gore di utswitswe. Ba solofetswe go tlhagelela kwa kgotlhatshekelo ya Taung mo letsatsing la gompieno,” Bobelo wa tlhalosa.
Bobelo are dipatlisiso di tsweletse, mme go na le dikgonagalo tsa go oketsa molato. Bobelo are kgetsi eno ke ya bobedi ya bogodu jwa diruiwa e e begilweng kwa lefelong le le tshwanang mo nakong e khutshwane.
“Mo kgetsing ya ntlha e e diragetseng ka di 8 Lwetse 2026, mapodisi a ne a dirisa drone mo patlisisong, mme ga bonwa gape diruiwa di le 57, tse di neng di akaretsa dipudi di le 42 le dinku di le 15.
“Dikgetsi tse pedi tseno di bontsha botlhokwa jwa go bega ka bonako, tirisanommogo fa gare ga mapodisi le setšhaba, le tiriso ya thekenoloji e e leng teng go lwantsha bogodu jwa diruiwa,” ga rialo Bobelo.
The Guardian 