Setshwantsho-papiso- Sethunya se se gapilweng ke sepodisi
Ka BAKANG MOKOTO
21 Lwetse 2026 – Sepodisi mono porofenseng ya Bokone Bophirima, se tshwere monna wa dingwaga di le 36, morago ga go amogela pegelo ya botlhodi mabapi le go thopiwa ga motho ka sethunya kwa Mmakau. Go begwa fa tiragalo e, e diragetse ka di 16 Lwetse 2026, gaufi le sekolo sengwe sa mo lefelong leo, mme e ne e ama mosimane wa dingwaga di le 16.
Sebueledi sa sepodisi mono porofensneg ya Bokone Bophirima, Constable Thuto Bobelo o tlhalositse gore molatofadiwa, Tladi Paul Mogoera, one a ya kwa ga nkokoagwe mosimane, mme a mo fitlhela a le nosi, mme a mmotsa ka mogala wa letheka o a neng a dumela fa o tshotswe ke setlogolo sa gagwe kwa sekolong. Bobelo are go begwa fa molatofadiwa a ne a ntsha sethunya, a se baya mo tafoleng mme a tshosetsa mosadimogolo gore o tla mo thunya fa a ka kopa thuso.
“Fa mosimane wa dingwaga di le 16 a goroga kwa gabo, one a fitlhela Mogoera. Go begwa fa Mogoera a ne a mo latofatsa ka go utswa mogala wa letheka wa gagwe. Fa mosimane a ganetsa gore o itse sengwe ka one, go begwa fa Mogoera a ne a mo thopa ka dikgoka.
“Go begwa fa molatofadiwa a ne a mo thopa diura di se kae, pele ga a ka mo busetse kwa gabo a na le dintho tsa go tlhaselwa. Go begwa fa molatofadiwa, a ne a boa gape lekgetlho la bobedi, mme a thopa motswasetlhabelo gape,” Bobelo wa tlhalosa.
Bobelo are go begwa fa a ne a mo pateletsa go taboga fa a ntse a mo lelekisa ka sethuthuthu. Bobelo are motswasetlhabelo one a thopiwa ka dikgoka gape le go shupiwa ka sethunya.
“Go begwa fa motswasetlhabelo a ne a patelediwa go ipobola gore ke ene a tshotseng mogala wa letheka wa ga Mogoera. Morago ga gore kgang e e begwe kwa sepodising, batlhankedi ba sepodisi ba uniti ya Brits Crime Intelligence, Brits Trio Task Team le ba batlisisi kwa Mmakau, ba ne ba dira mmogo go bona kwa Mogoera a leng teng.
“Tshedimosetso e ne ya dirisiwa mo tirong ya go batla mmelaelwa, mme one a tshwarwa kwa Mmakau ka Laboraro thapama, 16 Lwetse 2026. Mo tirong eo, mapodisi a ne a tsaya sethunya se sentsho se se thunyang dikulo tse di se nang kgapetla (blank-firing firearm) le lerumo le le lengwe le sle senang kgapetla, tse di tla dirisiwang jaaka bosupi mo dipatlisisong,” Bobelo wa tlhalosa.
Are mosimane wa dingwaga di le 16 one a newa kalafi ya bongaka. Bobelo are Mogoera one a tlhagelela kwa kgotlhatshekelo ya Brits ka di 18 Lwetse 2026, a lebane le melato e e amanang le go thopa motho, go shupa motho ka sethunya le tlhaselo.
“O golotswe ka beile ya R1000, mme o solofetswe go boela kwa kgotlatshekelo eo ka di 22 Diphalane 2026. Dipatlisiso di tsweletse, mme melato e mengwe e ka okediwa fa go ka bonala boshupi jo bongwe.
“Re rotloetsa baagi go bega ditiro tse di belaetsang kwa sepodiseng, mme ba letle molao go tsaya karolo. Re kgothaletsa baagi go bega ditiro dingwe le dingwe tse di belaetsang kwa sepodiseng le go letla molao go tsaya karolo,” Bobelo wa tlhalosa.
Are go itseela molao mo matsogong ke tlolo-molao, mme ba rotloetsa mongwe le mongwe go dira mmogo le sepodisi go netefatsa pabalesego ya baagi.
