Tag Archives: gaufi le Taung

Monna wa kwa Majaneng o a latofadiwang ka go bolaya tsala ya gagwe o buseditswe kwa ntlo-lefitshwana

NEWS Leave a comment

Ka OBAKENG MAJE

Kgetsi ya polao kgatlhanong le monna (35) wa kwa motseng wa Majaneng, gaufi le Taung, e tlhotse e buseditswe kwa morago go fitlha di 26 Mopitlwe 2024 ke khotlha-tshekelo ya Taung. Seno se tla morago ga gore Motseothata Nelson Seoleseng a tshware, mme ene o latofadiwa ka go tlhaba tsala ya gagwe, Mosimanegape Adam van Wyk (31), ka thiba go fitlhelela a tlhokafala ka Lamatlhatso.

Go begwa fa tiragalo e, ele ya beke e ka Lamatlhatso. Gobegwa fa Seoleseng ga mmogo le moswi, ba ne ba le mmogo, mme ba ile ba ya kwa gabo molatofadiwa ko ba fitlhetseng morwa rragwe molatofadiwa ana le lekgarebe la gagwe. 

Mongwe wa bo maratahelele wa tlhalosa: “Go begwa fa go ile ga runya kgakgauthano ya mafoko ma gareng ga molatofadiwa le monnawe. Sebakwa sa kgakgauthano ke gore, molatofadiwa one a botsa monnawe gore goreng a tlisa lekgarebe kwa gagabo. 

“Ene ya re fa e ya matsogong, tsala ya molatofadiwa, van Wyk, one a leka go tsiriganya. Fela go begwa fa molatofadiwa a ne a mo tsogela kgatlhanong, mme a mo tsatsanka ka thipa. Go ya ka dipego, moswi one a rwalelwa kwa bookelong jwa sedika jwa Taung, fela one a balelelwa le badimo mo letsatsing la Tshipi.” 

Go begwa fa kgetsi ya polao ene ya bulwa, mme mmelaelwa one a tshwarwa. 

Kgabagage, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are, kgetsi ya polao e butswe, mme molatofadiwa o tla tlhagelela kwa kgotlhatshekelo ka di 26 Mopitlwe 2024. 

taungdailynews@gmail.com

Dikereke ka go farologana di rapelela tsela ya D201 kwa motseng wa Kgomotso 

NEWS Leave a comment

Setshwantsho: Baruti go tswa kwa dikereng ka go farologana ba rapelela tsela ya D201 kwa Kgomotso   

Ka OBAKENG MAJE 

Baagi ba motse wa Kgomotso, gaufi le Taung, ba amogetse thapelo ya tsela e eneng e rulagantswe ke masepala o mogolwane wa Taung mo letsatsing la gompieno. Molekgotlha wa masepala, Itumeleng Maribe are, ba ne ba rulagantse thapelo mo tseleng ya D201, gonne ba itemogetse dikotsi di le dintsi mo tseleng e mo nakong e e fitileng. 

Go ya ka Maribe, ba ne ba memile dikereke ka go farologana, mme seo se tlile go rotloetsa badirisi ba tsela go nna kelo-tlhoko ka dinako tsotlhe. Maribe are jaaka naga e tla e lebile matsatsi a paseka, ba batla go kopa batho botlhe gore ba ikele tlhoko, mme ba efoge go nna batswa-setlhabelo ba dikotsi tsa tsela. 

“Fa ke ne ke simolola go nna molekgotlha wa kgorwana e ya 20 ka 2016, dikotsi tsa ditsela, segolo-bogolo jang mo tseleng ya D201, di ne di le kwa godimo thata. Jaanong, re bone fa go le botlhokwa gore retle ka lenaneo le lago rapelela tsela.

“Re bone fa go le botlhokwa gore re laletse Modimo mo thapelong e, mme re rapele le diputhego tse di farologaneng. Seo se tla re thusa go romela molaetsa go badirisi ba tsela gore ba tswelele go ipabalela. Fa esale re tshimolotse ka thapelo e ngwaga le ngwaga, re itemogetse kwelo-tlase mo dikotsing tsa tsela mo tseleng e,” Maribe wa tlhalosa. 

Maribe are jaanong ba ile ba mema le Lefapha la Ditirelo tsa Setshaba le Ditsela go ka tla ka tsereganyo. Maribe are lefapha le ile la tsenya diphophola (traffic calming) mo tseleng eo. 

“Seo se ile sa re thusa thata gore bakgweetsi ba kgweetse ka iketlo mo tseleng e, thata jang fa ba kgweetsa mogare ga motse,” Maribe wa tlhalosa. 

Kgabagare, moruti go tswa kwa Lefapheng la Pharakano, Chaplin Modirakgotla Jerry Batshelakang are, tirelo e ya thapelo e botlhokwa gonne e tlile go tsibosa badirisi ba tsela. Batshelakang are ka ba dumela gore thapelo ke maatla, ke ka moo ba boneng go le botlhokwa go ikgolaganya le mmopi. 

“Ke dumela fa re bone pharologano mo dikotsing tsa tsela e, fa esale re tshimolotse go rapela. Nako le nako fa re rapelela tsela e, re simolola  kwa go yone go kopa maatla le botlhale kwa Modimong. 

“Re leboga botsamaise jwa rona go tla ka lenaane le. Dikotsi tsa tsela go le gantsi di tlholwa ke maitsholo a botlhatswa a badirisi ba tsela. Ke eletsa fa go ka nna le thupelelo ya maitshwaro mo bakgweetsing, ga mmogo le badirisi ba tsela ka kakaretso. Ga re gane, dikotsi tse dingwe tsa tsela di tlholwa ke gore bakgweetsi ba kgweetsa ba iphantse ka nnotagi ka dinako tse dingwe,” Batshelakang wa tlhalosa. 

Are o rotloetsa batsamaya-ka-dinao go apara diaparo tse di bonalang fa ba tsamaya mo tseleng, thata jang fa go le bosigo. Batshelakang are, o ikuela go bakgweetsi go se kgweetse ka lebelo le le kwa godimo, kgotsa go kgweetsa ba itshietse. 

taungdailynews@gmail.com

Baagi ba motse wa Molelema ba ikuela go masepala go ba baakanyetsa ntlo-lehalahala ya bone e ileng ya fisiwa

NEWS Leave a comment

Setshwantsho: Ntlo-lehalahala e fisitsweng kwa Molelema

Ka OBAKENG MAJE

Baagi ba motse wa Molelema, gaufi le Taung, ba ikuela go masepala o mogolwane wa Taung (Greater Taung Local Municipality) gore o ba baakanyetse ntlo-lehalahala ya bone. Go ya ka baagi ba, ba tlhoka ntlo-lehalahala go tshwarela dikopano tse di farologaneng mo go yone.

Mongwe wa baagi, Mosimanegape Monoketsi (31) are ga jaana, ba tsenela dikopano fa tlase ga moago o bulegileng, gaufi le ntlo-lehalahala e. Fela, Monoketsi are seemo ka nako tse dingwe ga se letle gore ba ka dirisa moago o bulegileng, thata jang fa pula ena kgotsa mo setlheng sa mariga.

“Ntlo-lehalahala e, fa e sala ene ya fisiwa ke baagi fa ba ne ba gwantela tsela. Fela go fitlha ga jaana, ga ese e baakangwe, mme re e tlhoka thata. Jaanong, re ikuela go masepala go ka re thusa, gonne go dilo tse dintsi thata tse re di tlhokang mo motseng wa rona tse di amanang le thebolo ya ditirelo.

“Gape, kgang enngwe ke tlhokego ya metsi. Re lobaka re lela ka tlhokego ya metsi mo motseng was rona. Re bona dikomponi di fetolwa, jaaka rene re itse gore re ne re neelwa metsi ke Sedibeng Water kala-ntlhaneng, jaanong go tsene Magalies Water, fela seemo ga se fetoge. Jaanong, ga re itse gore bothata ke eng, mme go fitlha ga jaana re reka metsi ko metseng e gaufi,” Monoketsi wa tlhalosa.

Moeteledipele wa baagi kwa motseng wa Molelema, Kgosietsile Tshake are: “Ke nnete re ile ra senyegelwa ke ntlo-lehalahala ya rona fa gone go gwantelwa tsela. Ga jaana, re tlhaloganya gore gona le ledi le masepala wa rona o mogolwane wa Taung o le boneng go tswa go komponi ya insurance.

“Jaanong, ga re itse gore masepala o tlile go e baakanya leng. Dilwana dingwe jaaka disenke, diframe tsa matlhabaphefo, ga mmogo le ditswalo di ile tsa ntshiwa. Kgosi o ile a ntsha molaetsa wa gore disenke tse di neng di ruletse ntlo-lehalahala e, di dirisetswe go aga mokhukhu o dirisiwang jaaka kantoro ya mokgatlho o lwantshang bogodu mo motseng,” Tshake wa tlhalosa.

Molekgotlha wa kgorwana ya motse wa Molelema, Pico Seepamere, are ke nnete insurance e ile ya ntsha madi a kanang ka R1.6 million ele go duelela ditshenyegelo. Seepamere are ntlo-lehalahala eo, e tlile go tlhoka madi a fetang R6 million go agiwa sesha.

“Re ile ra dumalana le baagi gore ga re kitla re tsenya lenaneo la kago ya ntlo-lehalahala mo telanyetso-kabo ya setlha se (financial year). Re dumalane gore, re beye ko pele kago ya tsela ya pavement mo gare ga motse, mme re be re bua ka kgang ya metsi.

“Re tla tlhaloganya gore insurance ile ya duela madi a kanang ka R1.6 million ya ditshenyegelo, mme e ile ya e tsenya mo polokelong ya masepala,” Seepamere wa tlhalosa.

taungdailynews@gmail.com

Malome le setlogolo kwa motseng wa Myra ba tlhokafetse mo kotsing ya sejanaga 

NEWS Leave a comment

Setshwantsho-papiso: Sejanaga se menogile

Ka OBAKENG MAJE 

Ba lelapa la ga Moleleki kwa motseng wa Myra, gaufi le Taung, ba re ba utlwisitswe botlhoko ke go tlhokafala ga maloko mangwe a lelapa la bone. Seno se tla morago ga gore, Albert Dikano Moleleki, ga mmogo le motlogolowe, Tlotlaone Mokgele, ba amege le go tlhokafala mo kotsing ya sejanaga. 

Go ya ka sebueledi sa lelapa, Otshepeng Zee Moleleki, mogolowe o ile a amega mo kotsing ya sejanaga mo tsela-kgolo ya N18, gaufi le motse wa Dryharts ka letsatsi la Lamatlhatso fa masigo ane asa. Otshepeng are, batho ba ba ileng ba amega mo kotsing ya sejanaga ba ne ba le bane ka palo. 

“Aubuti one a kgweetsa sejanaga sa modiro wa bakkie, mme one a tsamaya le lekgarebe la gagwe, setlogolo sa rona, Tlotlaone Mokgele, ga mmogo le monna o tlholang a nthusa go baakanya dikoloi.

“Mo kotsing e, go ile ga tlhokafala aubuti, Albert Dikano Moleleki, ga mmogo le setlogolo, Tlotlaone Mokgele. Lekgarebe la ga aubuti le ile la bona dikgobalo mo leotong, fa monna o tlholang a nthusa go baakanya dikoloi, a sa bona dikgobalo tse di tseneletseng, mme ebile o setse a ntshitswe kwa bookelong,” Otshepeng wa tlhalosa. 

Otshepeng are, go ya ka dipego, lekgarebe la ga mogolowe le tla gololwa kwa bookelong ka Labotlhano. Are ga jaana, ba kwa Vryburg go ya go tsaya ditopo tsa baswi kwa lefelong la forensic, mme ba tla di fitisetsa kwa mmoshareng wa legae. 

“Re dumalane re le lelapa gore phitlho e nne ka Lamatlhatso, mme e tla tshwarelwa kwa lebaleng la metshameko kwa motseng wa Myra. Fela, e tla re morago ga tirelo phitlho, ba lelapa la ga Mokgele ba tla tsaya serepa sa gagwe go ya go se boloka kwa mabitleng a bone, mme le rona re tseye serepa sa ga aubuti re ye go se boloka kwa mabitleng a rona.  

“Re latlhegetswe thata, fela ga gona se re tla se dirang, gonne thato ya Modimo e diragetse. Le fa dipelo di utlwile botlhoko, ebile di robegile, re tla baya tsotlhe fa pele ga Rara mme re re go siame go siame,” Otshepeng wa tlhalosa. 

Kgabagare, sebueledi sa sepodisi mo Bokone Bophirima, Lieutenant Col Amanda Funani, ga se a boele go lekwalo dikgang la rona la Taung DailyNews ka dikarabo mabapi le kgang e. Dikarabo tsa ga Funani di tla tsenngwa mo kgannyeng e fa di setse di gorogile. 

taungdailynews@gmail.com

Baagi ba Molelema ba lela ka tlhokego ya metsi 

NEWS Leave a comment

Ka OBAKENG MAJE 

Tlhokego ya metsi e tsweletse go nna tlhoba-boroko go ralala Taung. Seno se tla morago ga gore baagi ba Molelema, gaufi le Taung, ba supe fa ba na le dingwaga-ngwaga ba tlhoka metsi. 

Baagi ba, ba tlhalositse fa ba patelesega go reka metsi go tswa kwa mafelo a mabapi jaaka Lenganeng, Morokweng le Kokomeng. Baagi ba, ba re ba utlwalelwa ke manokonoko a go reka metsi, gonne sekopu se le sengwe se R5. 

Mongwe wa beteledipele wa baagi, George Tong are, ga se baagi fela ba ba amilweng ke tlhokego ya metsi, mme le diphologolo tsa bone di bolawa ke lenyora. 

“Metsi ke tlhoba-boroko mo motseng wa rona, mme re na le dingwaga di feta tharo fa esale re lela ka tlhokego ya metsi. Bothata jo, kgale bo itemogelwa ke baagi ba kgaolo ya Verganoeg thata, fela bo aname le motse otlhe jaanong. 

“Ke buile le molekgotlha wa kgorwana ya rona, Pico Seepamere mo dibekeng tse tharo tse di fetileng. Seepamere o ile a tlhalosa fa ba tlile go fedisa bothata jwa tlhokego ya metsi, mme fela ba itemogela matsapa kwa madutelong a bone,” Tong wa tlhalosa. 

Tong are, fela go bontsha fa ditshepiso tsa ga Seepamere di ne di sena motheo, gonne go fitlha ga jaana di diba di setse di kgadile.  

O mongwe wa baeteledipele wa baagi, Kgosietsile Tshake, le ene o latlhetse tlhware legonnyana. Tshake are metsi ke tlhoba-boroko bosigo le motshegare kwa motseng wa bone. 

“Re na le ditanka di le nne tse di tswang kwa masepala. Ditanka tse, di na le dikgwedi di le supa masepala a ntse a di tlisitse mo motseng wa rona. Maikaelelo a tsone ene ele gore, fa metsi a fedile mo motseng, masepala o di tlatse gore baagi ba kgone go bona metsi. 

“Jaanong, maswabi ke gore ga di re lekane, gonne re na le dikarolo dile supa mo motseng. Re ikopela go masepala gore o dire botokwa, mme o tlatse ditanka tse ka nako gore ene ere fa ba sentse ba baakanya madutelo a metsi, re be re ga metsi go tswa mo go tsone,” Tshake wa tlhalosa. 

Kgabagare, molekgotlha wa kgorwana ya motse wa Molelema, Pico Seepamere are: “Motse wa rona wa Molelema, ga o tlhoke gore baagi ba tshelelwe metsi ka ditanka. Matsapa ke gore go dira engine ele nngwe, mme se se tlhokagalang fela, ke gore go baakanngwe engine enngwe. 

“Gape, kgokelelo ya motlakase le yone e sentswe, me re mo di puisanong le setlamo sa Eskom ga mmogo le sa Magalies Water gore re baakanya jaang kgokelelo eo. Ka Lamatlhatso, kene ke tsenetse kopano le baagi ba ba amegileng, mme ene ya re go tsweng foo, re ne ra ya go pompa metsi kwa engine e kwa kgaolong ya Verganoeg.”

Seepamere o ikuetse go baagi go netefatsa fa ba sireletsa madutelo a bone gore a se senngwe ke batho. Seepamere are o tshepisa baagi gore go simolola mo letsatsing la kamoso ba tla be ba nwa metsi. 

taungdailynews@gmail.com

Monna wa kwa motseng wa Majaneng o latofadiwa ka go tsatsanka tsala ya gagwe ka thipa go fitlhelela a tlhokafala 

NEWS Leave a comment

Ka OBAKENG MAJE 

Monna 35) wa kwa motseng wa Majaneng, gaufi le Taung, o latofadiwang ka go tlhaba tsala ya gagwe ka thiba go fitlhelela a tlhokafala ka Lamatlhatso. Monna o, o solofetswe go shadikanya matlho fa pele ga kgotlha-tshekelo ya Taung mo letsatsing la Labobedi. 

Go begwa fa molatofadiwa ga mmogo le moswi, Mosimanegape Adam van Wyk (31), ba ne ba le mmogo, mme ba ile ba ya kwa gabo molatofadiwa ko ba fitlhetseng morwa rragwe molatofadiwa ana le lekgarebe la gagwe. 

Mongwe wa bo maratahelele wa tlhalosa: “Go begwa fa go ile ga runya kgakgauthano ya mafoko ma gareng ga molatofadiwa le monnawe. Sebakwa sa kgakgauthano ke gore, molatofadiwa one a botsa monnawe gore goreng a tlisa lekgarebe kwa gagabo. 

“Ene ya re fa e ya matsogong, tsala ya molatofadiwa, van Wyk, one a leka go tsiriganya. Fela go begwa fa molatofadiwa a ne a mo tsogela kgatlhanong, mme a mo tsatsanka ka thipa. Go ya ka dipego, moswi one a rwalelwa kwa bookelong jwa sedika jwa Taung, fela one a balelelwa le badimo mo letsatsing la Tshipi.” 

Go begwa fa kgetsi ya polao ene ya bulwa, mme mmelaelwa one a tshwarwa. 

Kgabagage, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are, kgetsi ya polao e butswe, mme molatofadiwa o tla tlhagelela kwa kgotlhatshekelo ka Labobedi. 

taungdailynews@gmail.com

Monna o tlhokafetse morago ga go wela mo forong kwa Magogong 

NEWS Leave a comment

Setshwantsho: Monna wa kwa Magogong o wetse mo forong  

Ka OBAKENG MAJE 

Mogwanto wa thebolo e bokoa ya ditirelo, o one o boloditswe ke baagi ba motseng wa Magogong, gaufi le Taung, ga wa fela monate. Mo letsatsing la gompieno, baagi ba ile ba bolotsa mogwanto, mme ba ipelaetsa kgatlhanong le thebolo e bokoa ya ditirelo, jaaka tlhokego ya metsi, go sa bone motlakase ga mmogo le ditsela tse di sa tsamaegeng. 

Fela, go begwa fa monna mongwe, Thabang Mosienyane, yo eneng ele karolo ya mogwanto o, a ile a wela mo forong le go tlhokafala ka gangwe. Go ya ka dipego, Mosienyane one a gotsa molelo gaufi le foro eo, mme a relela le go wela mo forong. 

Kgabagare, molekgotlha wa masepaleng o mogolwane wa Taung, gape ele karolo ya komiti ya ga mayara, Itumeleng Maribe, are ba ile ba lelediwa ke bangwe ba baagi go tla go tsaya lekwalo la dingongorego (memorandum). Maribe are, fela go ne ga nna le dipego tse di sa jeseng monate, mabapi le go tlhokafala ga mongwe wa baagi. 

“Go begwa fa Thabang Mosienyane, yo eneng ele karolo ya batho ba ba neng ba ipelaetsa, a ne a wela mo forong. Go begwa fa moswi a ne a gotsa molelo gaufi le foro fa a ne a relela le go wela mo go yone. Re ile ra kopana le baagi, mme ra tla ka toga-maano le go bona tharabololo mo dingongorego tsa bone. 

“Jaanong, re dumalane ka bongwe jwa pelo gore, re tlile go kopana le baagi mo letsatsing la kamoso. Kopano e, e tla be e tsenetswe ke batsaya-karolo botlhe ba ba farologaneng ka ura ya bo lesome mo mosong,” Maribe wa tlhalosa. 

Maribe are, ga jaana ba etetse lelapa la ra Mosienyane, le go bona gore batla thusa jang jaaka masepala. Maribe are, meyara wa masepala o mogolwane wa Taung, Tumisang Gaoraelwe, o tshepisitse ba lelapa gore masepala o tla tsenya letsogo mo thulaganyong ya phitlho ya ga Mosienyane. 

“Meyara o buisane le ba lelapa, mme o kopile gore ba mo neele ditlankana tse di maleba, gore masepala o kgone go thusa mo dithulaganyong tsa phitlho. 

“Seo, se tla diragala fela fa ditlankana tsotlhe tse di maleba di setse di feletse. O tla gopola gore go na le ledi le le beetsweng thoko kwa masepaleng le le thusang mo ditirong tsa potlako di ditshwana le tse,” Maribe wa tlhalosa. 

taungdailynews@gmail.com

Lefapha la Boitekanelo le kaile fa le sena R30m ya go aga kliniki kwa Cokonyane

NEWS Leave a comment

Setshwantsho: Moago wa kliniki ya Cokonyane

Ka OBAKENG MAJE

Baagi ba motse wa Cokonyane, gaufi le Taung, ba ikuela go Lefapha la Boitekanelo mo profenseng ya Bokone Bophirima go ka ba agela kliniki. Baagi ba letse ba boloditse mogwanto go leba lwa kliniking, mme seno se tla morago ga gore lefapha le tlhalose fa le tlile go oketsa lefelo la mokhukhu (parkhomes) le le dirisiwang jaaka kliniking kwa lefelong leo.

Go begwa ga mokhukhu (parkhome) eo e tla jela lefapha R6 million, ebile rakonteraka a setse a thapilwe. Go ya ka mongwe wa baeteledipele wa baagi, Charlie Sejamoholo, ba na le dingwaga di feta lesome ba ntse ba ikuela go lefapha gore le ba agela kliniki, fela kopo ya bone ga e utlwagale.

“Go tloga ka 2010 go fitlha 2022, ba re tlhaloseditse fa go sena madi a go ka aga kliniki. Jaanong ka 2024, ga ba sa boela mo go rona le go re itsise gore go tloga ga jaana ka ngwaga wa ditshelete wa 2024, ba tlile go dira jang. Ga jaana, ba tlile ka di parkhome go tla go di tlhoma mo kliniking ya rona.

“Se ke se itseng ke gore, ebile rakonteraka o setse a thapilwe. Jaanaong, rele baagi re batla pele ga di parkhome tseo di tla go tlhomiwa, re be re nnile le kopano le botsamaisi, mme ba re tlhalosetse gore a re tla agelwa kliniki kgotsa jang,” Sejamoholo wa tlhalosa.

Sejamoholo are, ba utlwile menyenyetse ya gore kliniki ya bone e tlile go agiwa mo dingwageng di le tlhano, lesome kgotsa lesome tlhano tse ditlang. Sejamoholo are jaanong mo bekeng e e tlang, ba tlile go nna le kopano le botsamaisi jwa kliniki go utlwa dintlha ka botlalo.

Kgabagare, sebueledi sa Lefapha la Boitekanelo mo Bokone Bophirima, Tebogo Lekgethwane are: “O tla gopola gore kliniki ya Cokonyane ene e agilwe ka asbesto go tloga kwa tshimologong. Jaanong, moago owa o ile wa tswalwa, mme ga tlisiwa tse re di bitsang di parkhomes.

“Jaanong, lefapha kwa sedikeng le ne le gopotse go oketsa di parkhome tseo, gonne ga di lekane balwetsi fa ba etetse setheo sa rona. Mme thendara ya go reka di parkhomes tseo, e rebotswe ka kgwedi ya Sedimonthole 2023.”

Lekgethwane are fela go ya ka go fokodiwa ga tekanyetso-kabo ya lefaph, ga gona maikaelelo a go aga kliniki kwa motseng o. Lekgethwane are go fitlha ga jaana, go aga kliniki kwa Cokonyane go tla jela lefapha madi a kanang ka R30 million, fa go aga di parkhomes tse dinang le mafaratlhatlha a sejanong, go tla jela lefapha fela R6 million.

Lekgethwane are mafaratlhatlha a tsenngwang mo di parkhomes ke a seemo se se kwa godimo, mme ga a tle go ama thebolo ya ditirelo mo lefapheng.

taungdailynews@gmail.com

Baagi ba Dryharts ba itumeletse korong morago ga gowa ga terena e tsamaisang dithoto

NEWS Leave a comment

Setshwantsho: terena e tsamaisang dithoto e wele kwa Dryharts

Ka OBAKENG MAJE 

Baagi ba motse wa Dryharts, gaufi le Taung, ba re le fa ba lela le setlamo sa puso sa Transnet ka go senyegelwa, fela bone ba itumeletse gore ba bone korong ya mphiwa fela. Seno se tla morago ga gore, terena e tsamaisang dithoto e wele gaufi le motse wa bone mo letsatsing la maabane.

Baagi ba, ba ne ba tswa ka dikgamelo go ya go rwala korong eo, mme ene ya nna seboa-boane sa banyana ba Picong, go fitlhela badiri ba setlamo sa Transnet ba goroga kwa lefelong la kotsi. Go fitlha ga jaana, ga go itsiwe sebakwa sa kotsi, mme dipatlisiso di tsweletse.

Mongwe wa baagi o sa batleng leina la gagwe le itsiwe wa tlhalosa: “Nnyaa, tota rona morago ga go utlwa gore terena ya dithoto e wele, mme korong e gasame mo fatshe, rene ra itelekela kwa lefelong la tiragalo. Mme ke nnete re fitlhetse gontse fela jalo. Jaanong go goroga ga rona, ga ra botsa le gore go diragetseng, mme ra tlatsa dikganelo ka korong.

“Re maswabi gore re be re tseile korong ya setlamo sa Transnet, fela botlhoka-tiro bo ile kwa godimo. Gape, re tlhasetswe ke bohuma, jaanong re tla dika re rekisitse korong, mme ka letsenonyana leo motho o tla bona gore o reka eng.”

O mongwe wa baagi are ene o utlwile modumo o makatsang, mme ene ya re fa a latlhela bofofu kwa modumo o tswang teng, one a bona tlhogo ya terena e kalakatlega e le nosi, mme mmele wa yone o wele.

“Tota ga ke itse gore kotsi e, e ka tswa e bakilwe ke eng. Fela ke belaela go nnile le bothata fa seporong. Ke belaela ka gongwe sene se kgaotswe, gonne modumo o ne o utlwala kgakajana.

“Jaanong, baagi ba ile ba goroga le go itseela korong e eneng e tshologa go tswa mo tereneng e tsamaisang dithoto. Sepodisi se ile sa bidiwa ga mmogo le ba ditirelo tsa potlako. Go begwa fa mokgweetsi wa terena e, a iponetse dikgobalo tse di botlhotshwana ga mmogo le mothusi wa gagwe. Ba ne ba rwalelwa kwa bookelo kwa Vryburg go bona thuso ya potlako,” monna o wa tlhalosa.

Kgabagare, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen, ga se a boele go Taung DailyNews ka dintlha ka botlalo.

taungdailynews@gmail.com

Banna ba le babedi ba kwa Dikhuting ba ba latofadiwang ka go utswa dipudi ba boela kgotlha-tshekelo

NEWS Leave a comment

Setshwantsho: Dipudi tse go belaelwang ele tsa bogodu di tshwerwe ke sepodisi

Ka OBAKENG MAJE

Kgetsi ya bogodu jwa leruo kgatlhanong le banna ba le babedi ba kwa motseng wa Dikhuting, gaufi le Taung, e tlile go boela kwa kgotlha-tshekelo ya Klerksdorp mo letsatsing la gompieno. Koronovea Modise le Keboikile Scotch Molefe, ba ne ba lelelwa ke ditshipi kwa tsela-kgolong ya N12, kwa motse-setoropong wa Jouberton, gaufi le Klerksdorp ka di 2 Ngwanatsele 2023.

Go begwa fa Modise le Molefe, ba ne ba tshwarwa morago ga go fitlhelwa ka dipudi di le 29 tse go belaelwang fa ele tsa bogodu. Go belaelwa fa dipudi tseo, di utstwitswe kwa motseng wa Manthe. Go ya ka sebueledi sa sepodisi mo Bokone Bophirima, Lieutenant Col Amanda Funani, batlhankela ba sepodisi ba ba ne ba le mo tirong, ba ne ba bona sejanaga se se belaetsang, mme ba se sala morago.

“Bane ba se emisa, mme ba kopa mokgweetsi go ka lekola sejanaga seo. Batlhankela ba sepodisi, ba kaile fa ba fitlhetse dipudi dile 29 kwa morago ga sejanaga seo (van). Banna ba, ba ne ba tshwarwa.

“Banna ba, ba lebagane le kgetsi ya go tshwara ka dipudi tse go belaelwang ele tsa bogodu,” Funani wa tlhalosa.

Kgabagare, sepueledi sa National Prosecuting Authority (NPA) mo porofenseng ya Bokone Bophirima, Henry Mamothame are, Molefe le Modise ba neetswe beile ya R700 mongwe le mongwe, mme kgetsi ya bone e buseditswe morago go fitlha 14 Tlhakole 2024, fa dipatlisiso di tsweletse.

taungdailynews@gmail.com