Daily Archives: October 21, 2026

Kgetsi ya polao le maiteko a polao kgatlhanong le Tshwaro Mangwegape e boela kwa kgotlhatshekelo

NEWS Leave a comment

Setshwantsho: Molatofadiwa, Tshwaro Mangwegape

Ka OBAKENG MAJE

21 Diphalane 2026 – Mogwebi o itsegeng gape ele mong wa lefelo le le rekisang bojalwa la The Meat Brother’s Pub, Tshwaro Mangwegape, yo a lebaganeng le kgetsi ya polao le maiteko a polao o solofetswe go tlhagelela kwa kgotlhatshekelo ya sedika ya Taung mo letsatsing la gompieno.

Mangwegape o latofadiwa ka go thuntsa le go bolaya naledi ya kgwele ya dinao ya setlhopha sa NWU Soccer Institute, Undivile “Vila” Mdi (28) le go gobatsa tsala ya gagwe, Aobakwe Ernest Kokwe (34).

Go begwa fa Mdi le Kokwe, ba ne ba etela lefelo la The Meat Brother’s Pub mono Taung ka di 16 Sedimonthole 2023, go ya go ijesa monate. Fela go begwa fa lefelo leo le ne le tletse phetelelo.

Go ya ka dipego, Mdi le Kokwe ba baneng ba le mo gare ga lefelo leo, ba ile ba tswela kwa ntle, mme batlhokomedi ba ile ba ba lemotsha fa ba se kitla ba kgona go boela mo teng, gonne go tletse.   

Go begwa fa go ile ga tsoga tlhatlharuane magareng ga Mangwegape le banna ba, gonne ba ne ba batla go tsena ka kgang. Go begwa fa Mangwegape a ile a ntsha sethunya le go thuntsa Mdi, ga mmogo le Kokwe.

Go begwa fa Mdi a ile a tlhokafalela kwa bookelo, mme Kokwe ene o ile a amogelwa le go kgaolwa leoto. Mangwegape, yo o neetsweng beile ya R5000 ke kgotlha-tshekelo kgolo ya North West, o boela kgotlha-tshekelo gompieno go tswelela ka ditheetso motshekong.

Kgabagare, dipaki di le mmalwa, go akaretsa Kokwe, di se ntse di neelane ka bopaki.

taungdailynews@gmail.com

Motlhankela wa sepodisi o tlhokafetse mo kotsing ya sejanaga magareng ga Vryburg le Ganyesa

NEWS Leave a comment

Setshwantsho: Moswi, Constable Itumeleng Pule/Facebook

Ka OBAKENG MAJE

21 Diphalane 2026 – Motlhankela wa sepodisi, Constable Itumeleng Pule (40), yo o neng a dira kwa lephateng la twantsho ya bogodu kwa dirui le tshireletsego ya diphologolo, o tlhokafetse mo kotsing ya sejanaga magareng ga Vryburg le Ganyesa mo letsatsing la Tshipi. Go begwa fa se, se tla morago ga kotsi ya go thulana ga dijanaga ka dinko di le pedi mo tseleng ya R378, mo e ka nnang dikilometara di le 20 go tswa kwa Ganyesa.

Sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are ba tlhomamisa fa batho ba le bane ba ne ba amega mo kotsing eno. Van Rooyen are kotsi e, e ne e akaretsa dijanaga di le pedi.

“Go begwa fa dijanaga tseno, di ne tsa thulana di lebane, mme Volkswagen Polo e ne ya menoga morago ga thulano. Mopagami wa sejanaga sa modiro wa VW Polo, yo o nang le dingwaga di le 30, o ne a bona dikgobalo tse di botlhotshwana, fa batho ba ba neng ba le mo sejanageng se se nngwe bone ba sa gobala.

“Ka maswabi, mokgweetsi wa Polo yo o nang le dingwaga di le 40 o ne a tlhokafala mo kotsing eno,” ga rialo van Rooyen.

Van Rooyen are Pule o ne a dira jaaka Constable kwa lephateng ntwantsho ya Lwantsha bogodu jwa duruiwa le diphologolo tse di ileditsweng go tsoniwa kwa Vryburg. le go Sireletsa Diphologolo tse di mo Kotsing kwa Vryburg. Van Rooyen are go butswe kgetsi ya polao e e seng ya maikaelelo, mme dipatlisiso di tsweletse.

“Ga go na pelaelo ya gore go ka tswa go nnile le sengwe se se sa siamang kgotsa tiragalo ya bosenyi e e amanang le kotsi eno.

“Sepodisi se tsweletse ka dipatlisiso go bona mabaka a a bakileng kotsi eno e e tsereng botshelo jwa ga Pule,” ga rialo van Rooyen.

taungdailynews@gmail.com