^{Ka REGINALD KANYANE}

^{14 Diphalane 2026 – Banyana Banyana e fetetse kwa legatong la boraro la dikgaisano tsa go ipatlela phatlha kwa Diolimpiking tsa 2028 kwa Los Angeles morago ga go fenya Madagascar ka palogotlhe ya dino di le 7-0 mo metshamekong e mebedi kwa Bloemfontein ka Labobedi maitseboa. Aforika Borwa e fentse Madagascar ka dino di le 3-0 mo motshamekong wa bobedi o o tshwaretsweng kwa Free State Stadium.}

^{Motshameki yo o tseneng mo lebaleng mo seripagare sa bobedi, Ronnel Donnelly, o ne a nosa dino di le pedi, mme seno sa dira gore a nne le dino di le tlhano mo metshamekong e mebedi, morago ga go nosa dino di le tharo mo motshamekong wa ntlha. Gabriela Moodaly-Salgado ke ene a butseng dino mo motshamekong oo kwa tshimologong ya seripagare sa bobedi, morago ga gore seripagare sa ntlha se fele go se na nno e e nositsweng.}

^{Banyana Banyana e ne ya tshameka fa pele ga bontsi jwa balatedi ba kgwele ya dinao ba ba neng ba tsile go tla go ba rotloetsa. Setlhopha se ne sa dira diphetogo mo batshameking ba ba simolotseng motshameko, go akaretsa le go tsenya batshameki ba basha, mme Thembi Kgatlana o ne a nna mokapotene wa setlhopha.}

^{Aforika Borwa e nositse dino di le supa mo metshamekong e mebedi, mme ya se ka ya letla Madagascar go nosa nno epe.}

^{Mokatisi mogolo wa Banyana Banyana, Dr Desiree Ellis, o rile ba itumeletse dipholo, le fa go sa ntse go na le tiro e ntsi e ba tshwanetseng go e dira.}

^{“Re dirile diphetogo di le thataro, mme re itumeletse dipholo e bile re fetetse mo legatong le le latelang.}

^{“Le fa go ntse jalo, go sa ntse go na le tiro e ntsi e re tshwanetseng go e dira. Re ne ra tlhama ditšhono tsa go nosa, mme ra palelwa ke go di dirisa ka gonne re ne re se na bopelotelele jo bo lekaneng go fitlhelela dino,” Ellis wa tlhalosa.}

^{Ellis are fa nno ya ntlha e sena go tsena, go ne go bonala gore tse dingwe di tla latela, mme ke sone se se diragetseng. Are ba kabo ba nositse dino tse dingwe gape ka gonne ditšhono di ne di le teng.}

^{Banyana Banyana, e e leng bommampodi ba Aforika ba 2022, jaanong e tla kopana le Angola mo legatong la boraro la dikgaisano tseno ka Tlhakole kgotsa Mopitlwe ngwaga o o tlang. Angola e fetetse mo legatong le le latelang morago ga go fenya Namibia ka dino di le 2-0 mo motshamekong wa bobedi, fa motshameko wa ntlha o ne o fedile ka 0-0.}

^{Le fa setlhopha sa Aforika Borwa se ne se itebagantse le dikgaisano tsa go ipatlela phatlha kwa Diolimpiking, se ne sa dirisa gape metshameko eno go ipaakanyetsa dikgaisano tsa go ipatlela phatlha kwa Sejaneng sa Lefatshe sa FIFA sa kgwele ya dinao sa ngwaga o o tlang, tse di tla tshwarelwang kwa Rabat, Morocco.}

^{Ellis o okeditse ka gore phenyo e tlisetsa batshameki boitshepo, mme go se letle baganetsi go nosa le gone go na le seabe se segolo mo go ba baakanyetseng metshameko e e botlhokwa e e tlang.}

^{“Go fenya go go naya boitshepo, mme go boloka letloa le sa tsenwa ke dino le gone go na le matswela a a tshwanang. Ka jalo, diphenyo tseno tse pedi di re nonotshitse maikutlo ebile di re thusitse go nna le maatla a go tsena mo metshamekong e e botlhokwa e e tlang.}

^{“Re a itse gore re nositse dino mme ga re a ka ra letla baganetsi go nosa. E nnile thulaganyo e e molemo ya go ipaakanyetsa dikgaisano tsa go ipatlela phatlha kwa sejaneng sa Lefatshe sa FIFA, tse di atametseng,” ga oketsa Ellis.}

^{Banyana Banyana e ka tshameka kgatlhanong le Chinese Taipei, Ecuador le Uzbekistan mo dikgaisanong tsa go ipatlela phatlha kwa sejaneng sa Lefatshe sa FIFA.}

^{taungdailynews@gmail.com}