Tag Archives: gaufi le Taung

Sekolo sa Redirile se abelwa diaparo tsa sekolo 

NEWS Leave a comment

Setshwantsho: Greater Taung PEOPLE Living With HIV and AIDS Organisation ba neelana ka diaparo tsa sekolo

Ka OBAKENG MAJE 

Sekolo se segolwane sa Redirile kwa motseng wa Mokassa, gaufi le Taung, se tlhalositse fa se itumeletse go amogela diaparo tsa sekolo tse ba di neetsweng ke mokgatlho o eseng wa puso wa Greater Taung People Living With HIV and AIDS. Mokgatlho o, one o neela baithuti bangwe ba ba dikobo di magetleng diaparo tsa sekolo. 

Motsamaisi wa diporojeke (Project Manager) go tswa kwa mokgatlhong wa Greater Taung People Living With HIV and AIDS, Dimakatso Molusi are, ba abetswe diaparo tseo ke lebenkeleng la Ackermans go tswa kwa Bloemhof. Molusi are ba neetse sekolo marukgwe, dihempe tse ditshweu tsa sekolo, ga mmogo le dikausu. 

“Fa re amogetse kabo go tswa go ditheo tse di farologaneng, re buisana le dikolo dingwe le go sheba baithuti ba ba tlhokang diaparo tseo, mme re ba neele tsone. Re dira seo go ralala Taung, mme re rotloetsa baagi ka bontsi go ka tsaya karolo. 

“O tla gopola gore ngwana sejo wa tlhakanelwa, ebile ntime o mphele ngwana. Jaanong, fa re neela baithuti ba ba rona tlhokomelo, re tla bona moputso o siameng. Ke baeteledipele ba kamoso, jaanong ke ne ke tla itumela thata go bona ditheo tse di farologaneng le tsone di tsaya karolo mo tiragalong e,” Molusi wa tlhalosa. 

Molusi are go le gantsi, baithuti bao ba feleletsa ba ikobonya, mme seo se kgoreletse dithuto tsa bone. Molusi are baithuti bao, ba tshwanela ke go dira ka natla go ka fetola seemo sa kwa malapeng a bone. 

“Moswi Dr Nelson Mandela o ile a tlhalosa gore thuto ke lesedi, mme ngwana mongwe le mongwe o tlhoka tlhokomelo e tseneletseng, gonne seo ke tshwanelo ya gagwe. Jaanong, go tsaya motse otlhe go ka godisa ngwana.  

“Go tshwanetse gore baithuti fa ba le mo phaphosi-borutelo, ba ipone ba lekalekana. Re tlile go tswelela fela jalo le go netefatsa gore ga gona ngwana ope o salelang kwa morago,” Molusi wa tlhalosa. 

Kgabagare, sebueledi sa Lefapha la Thuto mo Bokone Bophirima, Elias Malindi are: “Re itumeletse thata go bona setheo sa Greater Taung People Living with HIV and AIDS, se neela kabelano e. Re le lefapha re motlotlo, ebile re ipela ka bone. 

“Ka gale re dula re rotloetsa tirisano-mmogo ma gareng ga ditheo tse di farologaneng le lefapha, gonne seo se godisa botsalano jwa rona.” 

taungdailynews@gmail.com

Tsheko mo kgetsing ya polao kgatlhanong le monna wa kwa Khibicwane ya tshimolola

NEWS Leave a comment

Setshwantsho: Molatofadiwa wa polao, Kabelo Mogongwa o busediwa kwa ntlolefitshwana

Ka OBAKENG MAJE

Tsheko mo kgetsing ya polao kgatlhanong le molatofadiwa wa kwa motseng wa Khibicwane, gaufi le Taung, ya simolola mo letsatsing la gompieno. Go begwa fa Kabelo Mogongwa (47), a ile a tshwarwa morago ga dipego tsa gore o thuntsitse lekgarebe la gagwe, Tsholofelo Nde Emphukile (38). 

Go begwa fa lekawana le le lekgarebe la gagwe, ba ne ba dula botlhe kwa phaphosing e e hirilweng kwa motseng wa Khibitswane, gaufi le Taung. Go ya ka sebueledi sa sepodisi mo Bokone Bophirima, Mokaptein Aaftje Botma, yo a rotseng tiro ga jaana, moagisani wa monna o, o ile a tlhalosetsa sepodisi fa baratani ba, ba gorogile ka ura ya bongwe mo mosong, mme go ile ga tsoga kgakgauthano magareng ga bone.

“O kaile fa a utlwile modumo wa sethunya. Sepodisi se ile sa biletswa kwa lefelong la tiragalo, mme se ile sa fitlhela moswi a le mogare ga bophadiphadi jwa madi.

“Sepodisi se ile sa patelesega go shaga burglars, gore ba kgone go tsena mo ntlung. Molatofadiwa o ile a tshwarwa, mme one a ganelwa ka beile,” Botma wa tlhalosa.

taungdailynews@gmail.com

‘No intake of entry level police trainees for the 2024/2025’

NEWS Leave a comment

Picture: The police officials during parade/Google 

By KEDIBONE MOLAETSI

The South African Police Service (SAPS) has dispelled misinformation circulating on social media regarding an old advertisement to recruit 10 000 entry level police trainees. This comes after the SAPS received numerous enquiries regarding this.

The SAPS spokesperson, Lieutenant Colonel Amanda van Wyk said this particular application process had already closed on 31 August 2023. Van Wyk further said the first batch of 4 500 trainees for the 2024/2025 intake have already embarked with training at various SAPS academies across the country.

“The second batch of 5 500 recruits will commence with training in January 2025 and this process is yet to be finalised. Community members are encouraged to visit the SAPS’ website and other official social media platforms to stay informed of advertised posts,” she added.

taungdailynews@gmail.com

Di laptop ga mmogo le di tablets di le 32 di utswitswe kwa sekolong sa Baisitse kwa Manokwane 

NEWS Leave a comment

Setshwantsho: Sekolo se se potlana sa Baisitse kwa Manokwane   

Ka OBAKENG MAJE 

Baagi ba kwa motseng wa Manokwane, gaufi le Taung, ba tlhalositse fa go thubilwe kwa dikolo ele tlhoba-boroko. Seno se tla morago ga magatwe a gore, go thubilwe kwa sekolong se se potlana sa Baisitse, mme ga utswiwa di laptop ga mmogo le di tablets di le 32.

Go ya ka mongwe wa baagi yo sa batlang leina la gagwe le itsiwe are: “Go tlhola go thubilwe fela kwa sekolong, mme ga gona ope o tshwarwang. Fela, go tletse-tlese mo motseng gore ke mang o tswang go thuba kwa sekolong le go utswa di laptop le di tablets tseo. 

“Gape re makadiwa ke gore go baneng mogokgo wa sekolo, Lesetjha Kgwahla, a ne a sa itsise lekgotlha-taolo la sekolo gore Lefapha la Thuto mo Bokone Bophirima le tlisitse di laptop ga mmogo le di tablets tseo? Go lo fa ekare gona le sengwe se se sa tsamaeng sentle, ebile le motho o latofadiwang ka go thuba kwa sekolong, o tlhalositse fa ene a emetse fela gore a tshwarwa, mme o tla ntsha mosi ka sekhurumelo.” 

Modulasetilo wa lekgotlha-taolo wa sekolo, Kgakololo Koji o kaile fa a utlwile gore go ile ga thubiwa kwa sekolong, mme ga utswiwa di laptop ga mmogo le di tablets. Fela ka maswabi, Koji ene o tlhalositse fa le ka matlho a sa di bona fa di ne di goroga. 

“Ke ne ka letsetswa ke mogokgo, mme a ntlhalosetsa gore go thubilwe kwa sekolong, ebile go utswitswe di laptop ga mmogo le di tablets. Fela se ke tla go se netefaletsang ke gore, di laptop tseo ga mmogo le di tablets, di gorogile ka Labone go ya ka puo ya mogokgo, mme fela nna ga ke a di bona fa di ne di goroga. 

“Ga ke a itsisiwe fa di ne di goroga, mme ke makaditswe fela ke go utlwa mogokgo a mpolelela gore di utswitswe. Se ke tla go se totobaletsang ke gore, re kopile mogokgo gore a ye go bula kgetsi kwa sepodiseng,” Koji wa tlhalosa. 

Koji are go tlile go nna thata mo go ene gore a arabele go ya kwa pele, gonne ga tlhaloganye lepele le morago la kgang e. Are la bofelo fa ba ne ba bua le Kgwahla, o ba tlhaloseditse fa motho o a latofadiwang ka go utswa di laptop ga mmogo le di tablets, a tlhagelela mo setshwantshong sa motsikinyego (cameras), fela a sa bonagale sentle gore ke mang. 

“Jaanong, mogokgo o tlhalositse fa a emetse batho ba ba tlhatswang setsaya-ditshwantsho (cameras) gore ba tle go senola gore motho o ke mang,” Koji wa tlhalosa. 

Sebueledi sa Lefapha la Thuto mo Bokone Bophirima, Mphata Molokwane are: “Ke nnete di laptop ga mmogo le di tablets di le 32, di ile tsa utswiwa kwa sekolong sa Baisitse, ebile kgetsi e butswe kwa sepodiseng. Sekolo se lemogile letsatsi morago ga tiragalo gore go nnile le go thubiwa.  

“Go fitlha ga jaana, ga gona ope o tshwerweng mo tiragalong e. Re netefatsa fa go sena setsaya-ditshwantsho kwa sekolong (cameras) go ka thusa mo go tshwareng molatofadiwa wa tiragalo e. Ga gona batlhokomedi kwa dikolong go ralala porofense, mme re ikuela go baagi go se reke dilo tse di utswitsweng,” Molokwane wa tlhalosa. 

Kgabagare, sebueledi sa sepodisi mo Bokone Bophirima, Brigadier Sabata Mokgwabone are go ile ga bulwa dikgetsi di le pedi tsa go thubiwa kwa sekolong ka Ngwanatsele 2023, ga mmogo le ka Tlhakole 2024, fela mo dikgetsing tseo di le pedi, go ile ga utswiwa dijo tsa boleng jwa R2000. 

“Go fitlha ga jaana, ga rena ditlankana tse di shupang fa go butswe kgetsi ya go thubiwa kwa sekolong, mme mo go yone go ile ga utswiwa di laptop ga mmogo le di tablets. Ga gona ope o tshwerweng mo dikgetsing tse pedi tse di butsweng,” Mokgwabone wa tlhalosa. 

taungdailynews@gmail.com

Monna o latofadiwang ka go bolaya lekgarebe la gagwe o ganetswe ka beile

NEWS Leave a comment

Setshwantsho: Molatofadiwa wa polao, Kabelo Vincent Mogongwa

Ka REGINALD KANYANE  

Monna wa dingwaga di le 47 wa kwa motseng wa Khibicwane, gaufi le Taung, yo o latofadiwang ka go thuntsa le go bolaya lekgarebe la gagwe, o tlhotse a rototse matlho fa pele ga kgotlhatshekelo ya Taung. Kabelo Vincent Mogongwa o tlhotse a ganetswe ka beile, mme o ka nama a letile kwa ntlolefitshwana go fitlhelela a boela kwa kgotlhatshekelo gape ka di 25 Phukwi 2024.

Mogongwa one a lelelwa ke ditshipi morago ga go latofadiwa ka go thuntsha le go bolaya lekgarebe lagagwe, Tsholofelo Nde Emphukile (38). Go ya ka lephatha la bosekisi, Mogongwa o rerile loso la kgarebe ya gagwe pele ga a ka mo thuntsha.

Go begwa fa lekawana le, le lekgarebe la gagwe, ba ne ba dula botlhe kwa phaphosing e e hirilweng kwa motseng wa Khibicwane.

Go ya ka sebueledi sa sepodisi sa maloba mo Bokone Bophirima, Mokaptein Aaftje Botma, yo ga jaana a rotseng tiro, moagisani wa monna o, o ile a tlhalosetsa sepodisi fa baratani ba, ba gorogile ka ura ya bongwe mo mosong, mme go ile ga tsoga kgakgauthano magareng ga bone.

“O kaile fa a utlwile modumo wa sethunya. Sepodisi se ile sa biletswa kwa lefelong la tiragalo, mme se ile sa fitlhela moswi mogare ga bophadiphadi jwa madi.

“Sepodisi se ile sa patelesega go shaga burglars, gore ba kgone go tsena mo ntlung. Molatofadiwa o ile a tshwarwa, mme one a ganelwa ka beile,” Botma wa tlhalosa.

Kgabagare, Magistrate Thabo Letsapa one a kaela Mogongwa fa mabaka a ntshitseng mo ditheetsong tsa kopo ya beile ese a nonofileng, mme lekgotlha le mo ganela ka beile. Kgetsi e buseditswe morago go fitlha ka di 25 Phukwi 2024 le go shutisediwa kwa Kgotlhatshekelo ya Sedika, fa go ntse go emetswe dipholo tsa sethunya se se dirisitsweng go bolaya moswi.

taungdailynews@gmail.com

Kgetsi ya polao kgatlhanong le monna wa kwa Majaneng e siametse go ja seka 

NEWS Leave a comment

Ka OBAKENG MAJE

Kgetsi ya polao kgatlhanong le monna (35) wa kwa motseng wa Majaneng, gaufi le Taung, e siametse go kay a tshekong. Motseothata Nelson Seoleseng yo o buseditsweng kwa ntlo-lefitshwana, o latofadiwa ka go tlhaba tsala ya gagwe, Mosimanegape Adam van Wyk (31) ka thiba go fitlhelela a tlhokafala. 

Tiragalo e, e diragetse dikgwedi di le mmalwa kwa motseng wa Majaneng. Go begwa fa Seoleseng ga mmogo le moswi, ba ne ba le mmogo, mme ba ile ba ya kwa gabo molatofadiwa ko ba fitlhetseng morwa rragwe molatofadiwa ana le lekgarebe la gagwe. 

Mongwe wa bo maratahelele wa tlhalosa: “Go begwa fa go ile ga runya kgakgauthano ya mafoko ma gareng ga molatofadiwa le monnawe. Sebakwa sa kgakgauthano ke gore, molatofadiwa one a botsa monnawe gore goreng a tlisa lekgarebe kwa gagabo. 

“Ene ya re fa e ya matsogong, tsala ya molatofadiwa, van Wyk, one a leka go tsiriganya. Fela go begwa fa molatofadiwa a ne a mo tsogela kgatlhanong, mme a mo tsatsanka ka thipa. Go ya ka dipego, moswi one a rwalelwa kwa bookelong jwa sedika jwa Taung, fela one a balelelwa le badimo mo letsatsing le le latelang.” 

Go begwa fa kgetsi ya polao ene ya bulwa, mme mmelaelwa one a tshwarwa. 

Kgabagage, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are, kgetsi ya polao e butswe. Kgetsi e buseditswe morago go fitlha 7 Phatwe 2024, go tla go utlwa letsatsi la tsheko.  

taungdailynews@gmail.com

Mosimanyana wa kwa Molelema o latofadiwa ka go betelela kgaitsadie 

NEWS Leave a comment

Ka OBAKENG MAJE 

Mosimanyana wa dingwaga di le 18 wa kwa motseng wa Molelema, gaufi le Taung, o solofetswe go tlhagelela kwa kgotlhatshekelo ya Taung mo letsatsing la gompieno. Seno se tla morago ga gore a latofadiwe ka go iphanya ka thobalano le kgaitsadie.

Go ya ka sebueledi sa sepodisi mono Bokone Bophirima, Brig Sabata Mokgwabone, mosimanyana o, one a robetse le kgaitsadie (7) kwa phaphosing ya borobalo ya ga mme mmagwe fa tiragalo e ene e direga. 

“Go begwa fa tiragalo e, e diragetse ka di 26 Motseganong 2024. Go ya ka bopaki, mosimanyana o ga mmogo le mongongoregi mo kgetsi e, ba ne ba robetse kwa phaphosing ya borobalo ga mmogo le mme mmagwe. 

“Kgetsi ene ya bulwa, mme molatofadiwa one a tshwarwa. Lephata la sepodisi le le dirang ka dikgetsi tsa petelelo kwa Pudimoe, le ne la tsweletsa dipatlisiso. Molatofadiwa o solofetswe go tlhagelela kwa kgotlhatshekelo ya Taung mo letsatsing la gompieno,” Mokgwabone wa tlhalosa. 

taungdailynews@gmail.com

Kgetsi ya go teketa kgatlhanong le monna wa kwa Matolong e buseditswe morago 

NEWS Leave a comment

Setshwantsho: Molatofadi wa go teketa, Mpumelelo Thobela 

Ka OBAKENG MAJE

Kgetsi ya go teketa kgatlhanong le molatofadiwa wa kwa motseng wa Matolong, gaufi le Taung, Mpumelelo Thobela (41), e buseditswe morago ke kgotlha-tshekelo ya Taung go fitlha ka di 18 Seetebosigo 2024. Thobela yo go begwang fa a ile a teketa mmagwe, one a reboletswe beile ya R500 ke kgotlhatshekelo ya Taung. 

Go ya ka dipego, ka di 2 Motsheganong 2024, Thobela one a goroga kwa gagabo, mme a fitlha a kopa mmagwe (73) madi a go ya go reka nnotagi. Fela, go begwa fa mosadimogolo a ne a itoka fa a sena le peni.

Go begwa fa seo se ile sa shakgatsa Thobela. Go ya ka dipego, Thobela one a mo tlhasela le go mo goga-goga mo mmileng. Go begwa fa mosadimogolo a ne a kuwa mokgosi. Go begwa fa baagisani ba ne ba utlwa selelo seo sa ga Ragele, mme ba mo tlhaga thuso, le go mo namola mo diatleng tsa ga Thobela.

Go ya ka sebueledi sa sa sepodisi mo Bokone Bophirima, Col Adele Myburgh, Thobela gape o latofadiwa ka go tlola molao-peelo wa Protection Order under Domestic Violence Act, 1998 (Act No 116 of 1998).

Kgabagare, mogokaganyi wa sedika wa Women Mobilisation Committee go tswa kwa lekoko la sepolotiki la Economic Freedom Fighters (EFF), Masego Lepedi are: “Jaaka re le bomme, mme re ikarabela ka ntwa kgatlhanong le tshotlakako ya bong, re kgala thata tiragalo e diragetseng. Ditiragalo tsa tshotlakako ya basadi le bana di dintsi, fela boammaruri ke gore setsosa sa kgang ke botlhoka-tiro mo nageng. 

“Ke ka moo rona jaaka EFF re ikuela gore go tlhamiwe ditiro. Botlhoka-tiro ke seemo se se boima, mme se tlhoka go ka tsibogelwa ka nako. Re kgala thata tiragalo e, mme re ikuela gore molao o tseye karolo.”

taungdailynews@gmail.com

Go tlile go tlhomiwa komiti e malebana le kago ya sekolo kwa Shaleng 

NEWS Leave a comment

Ka OBAKENG MAJE 

Baagi ba motse wa kwa Shaleng, gaufi le Taung, ba kaile fa ba itumeletse kopano e ba nnileng le yone ga mmogo le mokhuduthamaga wa lefapha la thuto mo Bokone Bophirima, Viola Motsumi, mo letsatsing la maabane. 

Baagi ba, ba ne ba bolotsa mogwanto kgatlhanong le thebolo e bokoa ya ditirelo, ebile ba kaile fa ele kgale ba ikuela gore ba agelwe sekolo, tsela ga mmogo le go neelwa dipegelo tsa madi a morafe. 

Moeteledipele wa baagi, Rogers Mongale are: “Kopano ya rona e tlile go tswelela gape mo letsatsing la gompieno le go tla ka toga-maano ya go bona gore sekolo se, se tlile go agiwa ka tsela e ntseng jang. Rena le dingongorego tse di ntsi thata, mme ya ntlha ke gore rena le madi a tsenang mo polokelong ya morafe. Fela, baagi ga ba kgone go bona ditlankana tse di supang gore gona le bokae mo polokelong eo. 

“Nna kena le dingwaga di le thataro ke le leloko la komiti eo ya ga Kgosi Ponatshego Mothibi. Re mo kopile makgetlho a le mantsi gore a tle go neela baagi pegelo eo, fela ga go nnege jalo. Jaaka o bona IEC e dirisa ntlo-lehalahala e ya rona, le yone e ya duelwa mme ga re itse gore madi a teng a ya kae.” 

Mongale are go tloga ka 1994 go fitlha ga jaana, ga ba itse gore IEC e setse e duetse bokae. Are fa gone go dirwa tsela ya bone ya mmu ya dikilomitara di le 15, serori sengwe le sengwe se se neng se rora mmu, sene se duela R900, mme ga ba itse gore madi ao go dirilweng ka one. 

“Madi ao ke madi a morafe, mme ga gona ope o batlang go tsaya maikarabelo. Gape, gona le aerial ya setlamo sa megala ya letheka sa Vodacom, mme e duelwa madi a fetang R250 000, fela le madi ao ga go itsiwe gore a ya kae.

“Fela Mothibi o letse a ipofile gore o tla boela mo go rona go tla go re bontsha gore dipegelo tseo di eme jang,” Mongale wa tlhalosa. 

Kgabagare, Motsumi are jaaka puso, ba tlile go tsereganya jaaka ba itse gore baagi ba ne ba ipelaetsa ka gore ke kgale ba tshepisitswe sekolo. Motsumi are baagi ba supile fa ba feletswe ke tshepo mo pusong, gonne sekolo seo se tshwanetswe nkabe se agilwe ka 2019. 

“Jaanong, ke bone go le maleba gore ke itelekele ka kwano, mme re buisane gore go nne le botsitso. Jaanong, re tlile go tlhoma komiti e e tla dulang e itsise baagi gore dithulaganyo tsa kago ya sekolo di tsamaya jang. 

“Ke ba tlhaloseditse gore re setse re tshimolotse ka go bapatsa tendara ya kago ya sekolo, mme re setse fela ka go tlhoma komiti e tla tlhotlhang gore ke mang o maleba go ka thapiwa jaaka mogokaganyi (consultant),” Motsumi wa tlhalosa. 

Motsumi are morago ga moo, go tla thapiwa rakonteraka, mme seo se tla bontsha baagi gore tota ke nnete lefapha le mo maikaelelong a go ba agela sekolo. 

taungdailynews@gmail.com

      

Maiteko a go thibela badiri ba IEC kwa Shaleng a iteile sefololetsa 

NEWS Leave a comment

Setshwantsho: Mapodisi ba roba seloto kwa ntlo-lehalahaleng ya Shaleng 

Ka OBAKENG MAJE 

Baagi ba kwa motseng wa Shaleng, gaufi le Taung, ba tlhalositse fa setlamo se se tsamaisang ditlhopo sa IEC, se sa ba direla sentle ka go roba seloto sa bone kwa ntlole-halahaleng mo letsatsing la gompieno. Seno se tla morago ga gore baagi ba bolotse mogwanto ba ipelaetsa kgatlhanong le thebolo e bokoa ya ditirelo. 

Baagi ba Shaleng le Madipelesa, ba ne ba kwala lekwalo la selelo sa bone, mme ba le romela go ba ba maleba. Mo lekwalong le le bonweng ke lekwalo-dikgang la Taung DailyNews, ba tlhalositse fa ba se kitla ba tsaya karolo mo ditlhopong tsa bosetshaba. 

Modula-setilo wa mokgatlho wa basha o emetseng metsana e, Golekane Morwe are: “Maitlhomo le maikaelelo a rona re le baagi ba Shaleng le Madipelesa, ke go tswala dikago tsa rona tse di dirisiwang ke IEC, mme re sa bone tuelo ya teng. Ledi la ntlo-lehalahala la rona le amogelwa ke Kgosi Ponatshego Mothibi, mme ene ke moagi wa Modutung. 

“Re le baagi ba metsana e umakilweng e, ga re dumelele IEC kgotsa lefapha lepe go ka dirisa dikago tsa rona le lefatshe la rona ka lebaka la gore puso ga e re direle sepe. Ka jalo, go tloga ka letsatsi la Tshipi, ka di 26 Motsheganong 2024, re tswalela sengwe le sengwe.” 

Fela, Morwe are ba makaditswe ke go bona sepodisi se roba seloto sa kago ya bone le go letlelela badiri ba IEC go ka dira. Morwe are ga ba itumela le seng, gonne puso e, ga ya ba direla sepe. 

Gape ba latofatsa badiri ba IEC ka go ya go dira di vouto tse di kgethegileng ntle le baemedi ba makoko a farologaneng a se polotiki. 

Kgabagare, modula-setilo wa IEC mo Bokone Bophirima, Dr Tumelontle Thiba are: “Ke nnete re ile ra itemogela mathata kwa motseng wa Shaleng, fela sepodisi se ile sa re tlhaga thuso. Se ile sa roba dikgoro tse dineng di matamisitswe go utlwana ka mokgwa wa welding. 

“Mokgwa ene ele go thibela badiri ba IEC go se tsene ka ntlo-lehalahala eo. Fela go fitlha ga jaana, badiri ba rona ba tsweletse ka tiro ya bone ya letsatsi. Shaleng ke yone fela kwa re itemogetseng dikgwetlho teng go fitlha ga jaana. Ga ese re amogele pego epe mo porofenseng e shupang fa gona le dikgwetlho golo gongwe ntle le Shaleng,” Thiba wa tlhalosa. 

taungdailynews@gmail.com