Setshwantsho: Dipudi di le 14 tse go begwang fa di ustwitswe

Ka KEDIBONE MOLAETSI

11 Phatwe 2026 – Banna ba le babedi ba dingwaga di le 32 le 48, ba tshwerwe mabapi le ditatofatso tsa go utswa dipudi. Banna ba, ba solofetswe go tlhagelela kwa kgotlhatshekelo ya Lichtenburg mo letsatsing la gompieno.

Sebueledi sa sepodisi mono porofenseng ya Bokone Bophirima, Constable Thuto Bobelo are ba lephata la botlhodi ba sepodisi sa Afrika Borwa ba ile ba neelana ka tshedimosetso morago ga go utswiwa ga dipudi di le 14 tsa boleng jwa R28 000 kwa Lichtenburg. Bobelo are batlhankela ba sepodisi ba ile ba amogela tshedimosetso go tswa go lephata la bosinyi la Mahikeng mabapi le thulaganyo ya go utswa dipudi kwa lefelong la Delareyville le Vryburg.

“Ka Labotlhano, sepodisi se ile sa tsenya tirisong tshedimosetso e. Dipego di ile tsa shupa fa dipudi di setse di pegilwe mo sejanageng sa modiro wa NP200. Sepodisi se ile sa sala morago motlhala wa babelaelwa ba, go tswa kwa Broederspruit go leba kwa Lichtenburg.

“Tshedimosetso e ile ya neelwa ba sepodisi kwa Lichtenburg, mme ba e sala morago. Sepodisi se ile sa tshwara babelaelwa ba, go thopa le sejanaga sa bone ga mmogo le megala ya matheka e mebedi. Sejanaga se, se ne se na le ikwadiso ya di nomoro polata tsa maaka,” Bobelo wa tlhalosa.

Dipudi tse, di tla tlhatlhobiwa le go batlana le mong wa tsone.

Kgabagare, mokomishinara wa sepodisi mono Bokone Bophirima, Lieutenant General Arthur Adams, o akgotse ba sepodisi ga mmogo le ba tsaya karolo botlhe. Adams o gateletse gore tirisano ya sepodisi ga mmogo le baagi e botlhokwa.

taungdailynews@gmail.com