^{Ka REGINALD KANYANE}

^{16 Diphalane 2026 – Kokwanopeo Molao mono Bokone Bophirima, e tla tshwara Palamente ya Lekala la Boitekanelo ka ga HIV le TB. Kopano e, e solofetswe go tshwarwa ke Palamente ya Lekala la Boitekanelo ya 2026 kwa motsesetoropong wa Khuma, kwa Stilfontein ka Labotlhano, maitlhomo e le go nonotsha maiteko a go lwantsha HIV le bolwetse jwa mafatlha (TB).}

^{Mmusakgotlha wa Kokwanopeo Molao, Viola Motsumi ga mmogo le motlatsi wa gagwe, Collen Maine, ba tla etelela pele dipuisano tse. Motsumi are Palamente eno e tla tshwarwa ka fa tlase ga setlhogo se se reng:}

^{“Re a Tlhatloga Mmogo: Batho ba le Dimilione di le 1.1 ba Kopane go Fedisa TB. E tla kopanya baagi, baemedi ba puso, kgotlhakgothe ya Porofense ya TB, mekgatlho ya setšhaba le balekane ba tlhabololo go buisana ka dikgwetlho tse di leng teng mo thibelong, go lemogeng le go alafeng HIV le TB.}

^{“Tiragalo eno e rulaganyeditswe go simolola ka ura ya lesome mo mosong kwa Holong ya Transnet kwa Khuma ka Labotlhano.}

^{Palamente eno e ikaelela go tshegetsa matsholo a 1.1 Million Close the Gap le End TB, mmogo le go akofisa kgatelopele ya go fitlhelela maikaelelo a HIV a 95-95-95,” Motsumi wa tlhalosa.}

^{Are Aforika Borwa e simolotse letsholo la Close the Gap ka di 25 Tlhakole 2025, ka maikaelelo a go busetsa batho ba bangwe ba le dimilione di le 1.1 ba ba tshelang ka HIV, ba ba iseng ba lemogwe kgotsa ba ba tlogetseng go bona tlhokomelo ya kalafi, mo kalafing ya di-antiretroviral (ART) e e bolokang matshelo.}

^{“Ditherisano gape di tla sekaseka ka fa maemo a loago le ikonomi a amang phitlhelelo ya ditirelo tsa boitekanelo le kalafi ka teng, segolobogolo mo bathong ba e kileng ya bo e le badiri ba meepo,” ga rialo Motsumi.}

^{Tonakgolo ya Bokone Bophirima, Lazarus Mokgosi, o solofetswe go nna teng, mmogo le Maloko a Khansele ya Khuduthamaga ya Porofense (MECs), baemedi ba Khansele ya Porofense ya AIDS le badiredi ba mafapha a Badiri, Tlhabololo ya Loago, Boitekanelo le Merero ya Selegae. Ba bangwe ba ba solofetsweng go nna teng ba akaretsa baemedi ba AURUM, baagi, mekgatlho ya setšhaba le lekala la poraefete.}

^{Maloko a bobegadikgang a lalediwa go nna teng le go bega ka tiragalo eno.}

^{taungdailynews@gmail.com}