Ka KEDIBONE MOALETSI
3 Diphalane 2026 – Tiragatso e e neng e ikaegile ka tshedimosetso ya botlhale e feletse ka go tshwarwa ga banna ba le babedi ba dingwaga di le 37 le 41, ba ba belaelwang ka go amega mo ditirong tsa go thopa dijanaga ka dikgoka, mmogo le go bonwa ga sejanaga se go belaelwang gore se utswitswe kwa Bojanala District. Tiragatso eno, e dirilwe ka di 29 Lwetse 2026, morago ga gore sepodisi se amogele tshedimosetso ka ga babelaelwa ba babedi ba go belaelwang gore ba amana le ditiragalo tsa go thopa dijanaga mo mafelong a sepodisi a Mooinooi le Brits.
Sebueledi sa sepodisi mono porofenseng ya Bokone Bophirima, Colonel Anne Magakoe are tshedimosetso eno, e ne ya tlhomamisiwa mme ya dirisiwa mo tirong ke setlhopha se se kopaneng se se neng se akaretsa Brits Crime Intelligence, Brits Trio Task Team, Brits District Detectives, Hartbeespoort Crime Prevention Unit le Hartbeespoort K9 Unit. Magakoe are babelaelwa ba ne ba bonwa kwa mafelong a a farologaneng kwa Itsoseng le Soshanguve, mme tiragatso ya botlhale ya latela molthala o, le go tshwara banna bao ka bobedi.
“Mo nakong ya tiragatso, Toyota Corolla e tshweu, e e fopholediwang go ka nna le boleng jwa R50 000, e ne ya bonwa kwa lefelong la go thuba ga dijanaga. Dipatlisiso tsa ntlha, di senotse gore sejanaga seno go belaelwa gore se ne sa thopiwa ka dikgoka, mme morago sa pentiwa sesha, fa nomoro ya boitshupo jwa sone (VIN) bo ne jwa senngwa kgotsa ya fetolwa.
“Vehicle Crime Investigation Unit (VCIU) e ne ya kopiwa go thusa ka tlhatlhobo le netefatso e e tseneletseng ya sejanaga seno. Babelaelwa ba lebane le melato e e amanang le go thopa seanaga ka dikgoka le go nna le sejanaga se go belaelwang fa se utswitswe,” Magakoe wa tlhalosa.
Magakoe are banna ba babedi ba ne ba tlhagelela fa pele ga Kgotlatshekelo ya Brits ka di 1 Diphalane 2026. Are ba ne ba busediwa kwa kgolegelong, mme ba tla boa gape kwa kgotlatshekelo ka di 8 Diphalane 2026.
Mokomishinara wa sepodisi sa porofense sa Bokone Bophirima, Lieutenant General Arthur Adams, o akgotse setlhopha se se kopaneng ka katlego ya tiragatso eno e e neng e ikaegile ka tshedimosetso ya botlhale. Adams are tiragatso eno e bontsha botlhokwa jwa sepodisi se se dirang ka tshedimosetso le tirisanommogo magareng ga diyuniti tse di kgethegileng le batlhotlhomisi.
“Re tla tswelela go sala morago batho ba ba belaelwang gore ba amega mo ditirong tsa go hijaka dikoloi le dikoloi tse di utswitsweng, mme re netefatse gore botlhe ba ba amegang ba isiwa fa pele ga dikgotlatshekelo.
“Sepodisi mono Bokone Bophirima se rotloetsa bakgweetsi le maloko a setšhaba go nna kelotlhoko le go bega tshedimosetso e e amanang le go thopiwa ga dijanaga, dijanaga tse di utswitsweng kgotsa ditiro tse di belaetsang tse di amanang le dijanaga kwa sepodising,” Adams wa tlhalosa.
Adams are tshedimosetso gape e ka newa Crime Stop mo go 08600 10111 kgotsa ka MySAPS App.
