Ka KEDIBONE MOLAETSI
3 Diphalane 2026 – Karabo e e bonako ya sepodisi le tiragatso e e neng e ikaegile ka tshedimosetso ya botlhale di dirile gore monna wa dingwaga di le 50, yo o belaelwang ka polao, a tshwarwe mo diiring di le mmalwa morago ga go tlhaba le go bolawa ga mosadi wa gagwe kwa legaeng la bone la lenyalo kwa Platinum Village, Phokeng. Tiragalo eno, e ne ya begwa ka 29 Lwetse 2026, mo e ka nnang ka ura ya 1 mo motshegareng, fa mmelaelwa a ne a latofadiwa ka go tlhaba mosadi wa gagwe mme a tlhokafala.
Sebueledi sa sepodisi mo porofenseng ya Bokone Bophirima, Colonel Anne Magakoe are morago ga tiragalo eno, mmelaelwa o ne a tshaba mo lefelong leo, mme sepodisi sa simolola letsholo-patlo. Magakoe are mo diiring di le 10 fela morago ga tiragalo, mo e ka nnang ka ura ya 11 bosigo, sepodisi se ne sa amogela tshedimosetso ya gore mmelaelwa o ne a iphitlhile kwa lefelong la bonno le e seng la semmuso la Plastic View kwa Zinniaville.
“Maloko a Phokeng Crime Prevention Unit a ne a latela tshedimosetso e e amogetsweng, mme seno sa felela ka go tshwarwa ga mmelaelwa le go bonwa ga sebetsa se go belaelwang fa se dirisitswe mo polaong.
“Mmelaelwa o ne a tlhagelela fa pele ga Kgotlatshekelo ya Tlhabane ka di 1 Diphalane 2026, a lebane le molato wa polao. O ne a busediwa kwa kgolegelong, mme o tla boa gape kwa kgotlatshekelo ka di 12 Diphalane 2026,” Magakoe wa tlhalosa.
Mokomishinara wa sepodisi mo porofenseng ya Bokone Bophirima, Lieutenant General Arthur Adams, o akgotse maloko a sepodisi a a nnileng le seabe mo karabong e e bonako, go kokoanyeng tshedimosetso le go tshwareng mmelaelwa. Adams gape o lebogile leloko la setšhaba le le neileng sepodisi tshedimosetso e e thusitseng gore mmelaelwa a bonwe.
“Re akgola maloko a sepodisi ka karabo ya bone e e bonako le ka go dirisa tshedimosetso e e amogetsweng go bona le go tshwara mmelaelwa. Re leboga gape leloko la setšhaba le le re neileng tshedimosetso e e botlhokwa. Re rotloetsa baagi go tswelela go dirisana le sepodisi ka go bega bosenyi le go neela sepodisi tshedimosetso e e ka thusang mo dipatlisisong,” ga rialo Adams.
