Ka OBAKENG MAJE
13 Diphalane 2026 – Lefapha la Thuto mo Bokone Bophirima le itumeletse go itsise gore letsatsi la ntlha la ditlhatlhobo tsa Setifikeiti sa Bosetšhaba sa Marematlou (NSC) le tsamaile sentle mo porofenseng yotlhe go se na dikgwetlho dipe tse dikgolo tse di begilweng. Lefapha la re dikolo go ralala porofense di simolotse ka go kwala pampiri ya ntlha ya thuto ya Computer Applications Technology (CAT).
Mokhuduthamaga wa nakwana wa Lefapha la Thuto mono Bokone Bophirima, Kenetswe Mosenogi are o etetse sekolo se segolwane sa Malatse Motsepe kwa Mmakau, se se kwa tlase ga Kantoro ya Thuto ya Selegae ya Madibeng, kwa a bontshitseng kgotsofalo ya gagwe ka go simolola sentle ga ditlhatlhobo tsa NSC tsa 2026. Mosenogi are o kopane le setlhopha sa botsamaisi jwa sekolo, lekgotlha-taolo la sekolo (SGB), mokhanselara wa lefelo le baeteledipele ba setso pele ditlhatlhobo di simolola.
“Gompieno, ke kopane le setlhopha sa botsamaisi jwa sekolo, Lekgotla le le Laolang Sekolo, mokhanselara wa lefelo le baeteledipele ba setso pele ditlhatlhobo di simolola.
“Botlhe ba mpoleletse gore baithuti ba ipaakanyeditse go kwala ditlhatlhobo tsa bone tsa bofelo, mme ba na le tshepo ya gore tsotlhe tse di tlhokegang di baakantswe,” Mosenogi wa tlhalosa.
Are o kgotsofaditswe ke ipakanyo ya baithuti mabapi le ditlhatlhobo tseno tse di botlhokwa ebile e le tsa bofelo. Mosenogi are botlhe ba mo netefaleditse gore ba ikemiseditse go falola ditlhatlhobo tsa bone.
“Ke rata go akgola baithuti botlhe, balebedi ba ditlhatlhobo, ditlhopha tsa botsamaisi jwa dikolo le batlhankedi ba thuto ka boineelo, tirisanommogo le boikanyego jwa bone mo go netefatseng gore ditlhatlhobo tsa NSC tsa 2026 di simologa sentle.
“Ka Labone, baithuti botlhe ba ba kwala ditlhatlhobo tsa NSC ba tla kwala nngwe ya dipampiri tse dikgolo, e leng English Paper 3,” Mosenogi wa tlhalosa.
Mosenogi are ba eleletsa baithuti botlhe masego le katlego fa ba ipaakanyetsa go kwala ditlhatlhobo tse. Are baithuti ba rotloediwa go nna ba ritibetse, go dirisa nako ya bone ka tshwanelo le go rulaganya dikarabo tsa bone ka kelotlhoko.
