Ka OBAKENG MAJE
13 Diphalane 2026 – Monna wa dingwaga di le 28 wa kwa motseng wa Sekhing mono Taung, o atlholetswe dingwaga di le 10 kwa kgolegelong. Se, se tla morago ga gore a betelele mosadi wa dingwaga di le 22 ke kgotlhatshekelo ya sedika ya Taung. Go begwa fa Letlhogonolo Theophilus Motshabi a ne a itse motswasetlhabelo jaaka le leloko ka ene la kereke.
Sebueledi sa Bosetšhaba sa Botšhotšhisi (NPA) mono Bokone Bophirima, Lindiwe Mabasa, o tlhalositse gore kgotlatshekelo e utlwile gore ka la di 29 Mopitlwe 2025, mosadi yo o ngongoregang o ne a le kwa lefelong la bojalwa le bomorwarraagwe le bokgaitsadie fa Motshabi a ne a mo kopa go tsamaya le ene go ya kwa ntlung e e gaufi go ya go ga metsi a a neng a tla go dirisetswa hubbly bubbly peipi. Mabasa are fa ba goroga, Motshabi o ne a tsena mo ntlong e nnye ya mmu e e neng e dirisediwa go boloka dikgong.
“O ne a kopa mosadi gore a dirise lebone la mogala wa gagwe go bonesa mo teng ga ntlo ka gonne ene a ne a sa bone sentle. Mosadi o, o ne a dumela, a sa itse maikaelelo a gagwe.
“Motshabi o ne a tswala kgoro, mme a akantsha gore ba tlhakanele dikobo. Fa mosadi a gana e bile a leka go letsetsa kgaitsadie yo o neng a sa ntse a le kwa lefelong la bojalwa, Motshabi o ne a mo tshwara, a mo amoga mogala mme a mo tshosetsa ka garawe,” ga rialo Mabasa.
Mabasa are ka ntlha ya go boifa botshelo jwa gagwe, mosadi o ne a apola diaparo tsa gagwe. Motshabi o ne a mo betelela a mo tlhaga kwa morago. Mabasa are Motshabi o ne a tswelela ka go mo betelela le fa mosadi a ne a lela ka ntlha ya botlhoko e bile a mo kopa gore a emise.
“Ka nako eo, batho ba ba neng ba le kwa lefelong la bojalwa ba ne ba lemoga gore mosadi o a lela, mme ba itsise ausi wa motswasetlhabelo.
“Fa ba fitlha, ba ne ba mo fitlhela a tshwenyegile thata e bile diaparo tsa gagwe di le leswe. O ne a bolelela Mogoloe gore Motshabi o mo beteletse,” Mabasa wa tlhalosa.
Mabasa are Motshabi o ne a tlhagelela ka letlhabaphefo le le kwa ntlheng e nngwe ya phaposi, a sa apara hempe e bile a sa rwala setlhako se le nosi. Mabasa are Motshabi a bodiwa gore ke eng a rwele setlhako se le mosi, o ne a boela mo ntlong ka kgoro e e kwa thoko, mme moragonyana a tswa ka letlhabaphefo a rwele setlhako se sengwe.
“Moragonyana, o ne a leka go tlhotlheletsa ausi wa motswasetlhabelo gore a dumele gore ga a a tlhakanela dikobo le monnawe, ka go leka go mmontsha dirwe tsa gagwe tsa bonna.
“Ausi wa motswasetlhabelo o ne a gana go leba, mme a ya kwa seteisheneng sa mapodisi go ya go bula kgetsi. Motshabi o ne a se ka a ipona molato, mme kwa tshimologong a latola ditatofatso.
“Moragonyana, o ne a kaya fa mosadi o, a ne a dumetse go tlhakanela dikobo le ene, le gore o ne a gakgametse fa a simolola go lela le go goa,” Mabasa wa tlhalosa.
Mabasa are Motshabi o ne a newa beile fa kgetsi e sa ntse e seka. Le fa go ntse jalo, kgotlatshekelo e ne ya gana tlhaloso ya gagwe mme ya fitlhela gore bosekisi bo ne bo supile molato wa gagwe ntle le pelaelo epe e e utlwalang. Mabasa are Motshabi o ne a bonwa molato wa petelelo.
“Ka nako ya dikganetsano tsa katlholo, mmueledi wa puso, Kgotso Mosanya, o ne a kopa kgotlatshekelo gore e mo atlhole go ya ka katlholo e e beilweng ke molao ya bonnye jwa dingwaga tsa kgolegelo.
“O ne a tlhalosa gore Motshabi o ne a dirisitse tshepo ya mosadi yo ka tsela e e sa siamang, ka gonne a ne a mo itse e le leloko ka ene la kereke mme a se na lebaka la go akanya gore a ka mo tlhasela,” Mabasa wa tlhalosa.
Mabasa are Mosanya gape o ne a bolela gore Motshabi ga bontsha go ikwatlhaela se a se dirileng, le gore petelelo eo, e tlogetse mosadi a na le botlhoko le kgatelelo ya maikutlo tse di nnelang ruri. Mabasa are kgotlhatshekelo e ne ya fapoga mo katlholong ya bonnye jo bo beilweng ke molao mme ya atlhola Motshabi dingwaga di le 10 tsa kgolegelo ntle le kgetho ya go di fokolediwa.
“Gape e ne ya laela gore leina la gagwe le tsenngwe mo Rejisetareng ya Bosetšhaba ya Batlolamolao ba ba Amanang le Thobalano,” ga rialo Mabasa.
Mokaedi wa Botšhotšhisi jwa Setšhaba mono Bokone Bophirima, Dr Rachel Makhari-Sekhaolelo o amogetse katlholo eno, a bolela tsholofelo ya gore e tla thibela batho ba bangwe go dira ditlolomolao tse di tshwanang. Makhari-Sekhaolelo o gateletse gore NPA e tswelela go tsaya petelelo e le tlolomolao e e masisi e e gatakang seriti, tshireletsego ya mmele le ditshwanelo tsa motheo tsa batswasetlhabelo.
“NPA e ikemiseditse go lwantsha tirisodikgoka e e ikaegileng ka bong le dipolao tsa basadi (GBVF), go netefatsa gore badiraphoso ba rwala maikarabelo a ditiro tsa bone le go sireletsa seriti le ditshwanelo tsa batswasetlhabelo,” Makhari-Sekhaolelo wa tlhalosa.
