Ka OBAKENG MAJE
21 Lwetse 2026 – Sepodisi sa Afrika Borwa se ikuela go setšhaba go se phatlhalatse kgotsa go abelana ka ditshwantsho tsa batho ba ba belaelwang gore ba amana le dipolao tsa basadi kwa Ekurhuleni, Gauteng. Sepodisi se tlhalositse fa se ise se ntshe setshwantsho kgotsa ditshwantsho tsa batho ba ba belaelwang.
Sebueledi sa sepodisi sa bosetshaba, Brigadier Athlenda Mathe are sepodisi se ikuela go baagi go se phasalatse tshedimosetso e e sa netefadiwang ka gonne seno se ka dira gore batho ba ba senang molato ba shupiwe ka phoso, mme ba feleletse ba bogisiwa kgotsa ba tlhasetswe.
“Baagi ba tsibosiwa kgatlhanong le seo, gonne seno se ka feleletsa se tsentse matshelo a batho ba ba senang molato mo kotsing. Sepodisi se tla dira kitsiso ya semmuso fa mmelaelwa kgotsa babelaelwa ba tlhomamisiwa le fa thuso ya setšhaba e tlhokega.
“Sepodisi se netefaletsa setšhaba gore se tsweletse ka dipatlisiso tsa dikgetsi tseno, mme se latela tshedimosetso nngwe le nngwe e e ka thusang babatlisisi go tlhomamisa maemo a a dikologileng dipolao le go shupa ba ba molato le go ba rwesa maikarabelo,” ga rialo Mathe.
Mathe o kopile baagi gore ba ikaege fela ka tshedimosetso e e ntshiwang ke metswedi ya semmuso ya sepodisi, mme ba bege tshedimosetso nngwe le nngwe e e ka thusang dipatlisiso kwa sepodiseng.
The Guardian 