Ka BAKANG MOKOTO
16 Diphalane 2026 – Setheo sa Aforika Borwa sa Tshireletso ya Loago (SASSA) se itsisitse ka matlha a mantsha a tuelo ya dithuso tsa loago tsa Ngwanatsele 2026 pele ga ditlhopho tsa dipusoselegae tse di rulaganyeditsweng go tshwarwa ka la 4 Ngwanatsele 2026. Setheo seno, se tlhalositse gore phetogo eno e dirilwe morago ga ditherisano le bannaleseabe ba ba farologaneng ka maikaelelo a go netefatsa gore dithuso tsa loago di duelwa ka tsela e e manontlhotlho le e e sireletsegileng go sa nne le dikgoreletsi tse dintsi ka nako ya ditlhopho.
Lefapha la Matlotlo la Bosetšhaba (National Treasury) le amogetse matlha a mantsha a tuelo, ka jalo SASSA e ka diragatsa thulaganyo e ntšhwa. Go ya ka thulaganyo e e fetotsweng, matlha a tuelo, dithuso tsa bagodi di tla duelwa ka di 30 Diphalane 2026.
Dithuso tsa batho ba ba tshelang ka bogole, di tla duelwa ka 2 Ngwanatsele 2026, fa dithuso tsa bana di tl duelwa ka di 3 Ngwantsele 2026. SASSA e rile diphetogo tseno di diretswe go netefatsa gore dithuso tsa loago di duelwa ka thelelo mo nakong e e dikologileng ditlhopho.
Sebueledi sa SASSA, Dr Paseka Letsatsi are setheo sa gagabo se sa ntse se ikemiseditse go netefatsa gore botlhe ba ba tshwanelwang ke go amogela dithuso tsa loago ba di amogela ka thulaganyo e e siameng le ka tsela e e ikanyegang.
“SASSA gape e gakolotse bajalefa ba dithuso tsa loago ba dikopo tsa bone di sekasekwang gape gore ba arabele melaetsa ya semmuso mme ba nne teng kwa dikopanong tsa tshekatsheko fa ba kopiwa go dira jalo,” Letsatsi wa tlhalosa.
Are letsatsi le lengwe la tuelo, e leng 5 Ngwanatsele, le beetswe kwa thoko ka tlhamalalo go thusa bajalefa ba dithuso tsa bone di leng mo thulaganyong ya tshekatsheko. Letsatsi are SASSA e kopile bajalefa gore ba se ka ba etela dikantoro tsa yone go sa tlhokege, ka gonne dituelo di tla dirwa go ya ka thulaganyo e e itsisitsweng.
“Bajalefa ba rotloediwa gape go dirisa ditsela tsa semmuso tsa puisano tsa setheo seno go bona tshedimosetso e e nepagetseng le go itshireletsa kgatlhanong le tshedimosetso e e seng boammaaruri kgotsa e e tsietsang malebana le dithuso tsa loago.
“SASSA e gateletse gape boikemisetso jwa yone jwa go sireletsa seriti le botshepegi jwa thulaganyo ya thuso ya loago, fa e ntse e netefatsa gore dimilione tsa Maaforika Borwa a a ikaegileng ka dithuso tseno di tswelela go di bona,” ga rialo Letsatsi.
