^{Ka STAFF REPORTER}

^{16 Diphalane 2026 – Mokgatlo wa Kgwele ya Dinao wa Aforika Borwa (SAFA) o thankgolotse lenaneo la bosetshaba la go naya ditheo tsa kgwele ya dinao dilaesense le go godisa ditalente, le le tshegediwang ke lenaneo la FIFA la tlhabololo ya ditalente (TDS).}

^{Lenaneo leno le ikaeletse go nonotsha tlhabololo ya kgwele ya dinao ya bašwa le go tlhama ditsela tse di bonalang tse di tla thusang ditalente tsa kgwele ya dinao mo Aforika Borwa go gola le go fitlhelela maemo a a kwa godimo.}

^{Lenaneo leno le tla tlhoma maemo a bosetšhaba a a tla latelwang ke ditheo tsa kgwele ya dinao, gape le go tlhama mokgwa o o rulagantsweng wa go lemoga, go tlhabolola le go tsweledisa pele batshameki ba ba nang le bokgoni mo nageng.}

^{Lenaneo leno le ikaegile ka dintlha tse pedi tsa botlhokwa, e leng go naya ditheo dilaesense le go tlhama melawana e e tla di laolang.}

^{Mokhuduthamaga wa SAFA, Lydia Monyepao are ba tla tlhagisa letlhomeso la bosetšhaba le le tla kaelang tsela e ditheo di tsamaisiwang ka yone, go sekaseka tiro ya tsone le go di amogela semmuso. Monyepao are letlhomeso leno le tla tsepamisa mogopolo mo pusong e e siameng ya ditheo, tshireletso ya bana le bašwa, maemo a katiso, mafaratlhatlha, tlhokomelo ya batshameki le tlhabololo ya bona ya nako e telele.}

^{“Lenaneo leno gape le tla nonotsha tirisanommogo magareng ga dikolo, ditheo tsa kgwele ya dinao, ditlhopha, makala a diporofense le ditlhopha tsa bosetšhaba, gore batshameki ba ba nang le bokgoni ba lemogiwe le go tshegediwa ka tsela e e rulagantsweng sentle.}

^{“Kgato ya ntlha e akaretsa ditherisano le bannaleseabe le tlhamo ya letlhomeso. Tiragatso ya lenaneo e tla simolola ka ditherisano tsa naga ka bophara tse di tla akaretsang ditheo tsa kgwele ya dinao, ditlhopha, mekgatlho ya kgwele ya dinao ya diporofense, dikolo, diyunibesithi, bakatisi, baitseanape ba setegeniki le bannaleseabe ba bangwe ba botlhokwa,” Monyepao wa tlhalosa.}

^{Are SAFA gape e tla tlhoma Setlhopha sa Bosetšhaba sa Tiro sa Dilaesense tsa Ditheo le Tlhabololo ya Ditalente, se se tla bopiwang ke baitseanape ba setegeniki, baemedi ba ditheo, baitseanape ba tshireletso le bagakolodi ba Lenaneo la FIFA la Tlhabololo ya Ditalente. Go ya ka Monyepao, setlhopa seno se tla kaela tlhamo ya letlhomeso.}

^{“Aforika Borwa e na le ditalente tse dintsi tsa kgwele ya dinao mme maikarabelo a bona ke go tlhama tikologo e mo go yone mosha mongwe le mongwe a ka bonang ditšhono tsa boleng jo bo kwa godimo tsa tlhabololo.}

^{“Lenaneo leno le tla thusa go tlhoma maemo a a tshwanang mo ditheong tsotlhe, fa gape le tlhama tsela e e golaganeng sentle e e tshegetsang kgatelopele ya batshameki go tloga kwa kgweleng ya dinao ya mo metseng go fitlha kwa maemong a a kwa godimo a motshameko,” ga rialo Monyepao.}

^{Mokaedi wa Setegeniki wa SAFA, Molefi Ntseki, o tlhalositse gore go naya ditheo dilaesense le go tlhama ditsela tsa tlhabololo ya ditalente ke dikarolo tsa botlhokwa mo go ageng tsamaiso e e atlegileng ya tlhabololo ya kgwele ya dinao.}

^{O rile ka lenaneo leno, SAFA e ikaeletse go tokafatsa maemo a tlhabololo, go nonotsha go lemoga ditalente le go naya batshameki ba ba nang le bokgoni ditšhono tse di bonalang tsa go gatela pele mo Aforika Borwa.}

^{Faisal Chibsah, wa Lenaneo la FIFA la Tlhabololo ya Ditalente le Moitseanape wa FIFA wa Maemo a a Kwa Godimo, o rile ka go kopanya mafelo a boleng jo bo kwa godimo a tlhabololo le ditsela tse di rulagantsweng tsa ditalente, SAFA e tsaya kgato ya botlhokwa ya go dirisa bokgoni jotlhe jwa batshameki ba bašwa mo nageng.}

^{“Lenaneo leno le bontsha boikano jwa nako e telele jwa go aga isagwe ya kgwele ya dinao ya Aforika Borwa. Lenaneo la Bosetšhaba la go Naya Ditheo tsa Kgwele ya Dinao Dilaesense le go Godisa Ditalente le tsewa e le kgato e kgolo ya go nonotsha tsamaiso ya tlhabololo ya kgwele ya dinao mo Aforika Borwa, ka go tokafatsa maemo a ditheo le go tlhama ditsela tse di bonalang tsa go thusa kokomana e e latelang ya batshameki.}

^{“Lenaneo le simolotse kwa SAFA House mo bekeng eno mme ditherisano di tla tswelela kwa diporofenseng tse dingwe mo malatsing a a tlang,” ga rialo Chibsah.}

^{Lenaneo la ditherisano tsa ditheo tsa kgwele ya dinao}

^{– KwaZulu-Natal (Durban): Southern Sun Elangeni & Maharani Hotel}

^{Letlha: 16 Diphalane 2026}

^{Nako: 10:00 go fitlha ka 17:00}

^{– Kapa Botlhaba (Gqeberha): Radisson Blu Hotel}

^{Letlha: 18 Diphalane 2026}

^{Nako: 10:00 go fitlha ka 17:00}

^{– Kapa Bophirima (Cape Town): Protea Sea Point Hotel}

^{Letlha: 20 Diphalane 2026}

^{Nako: 10:00 go fitlha ka 17:00}

^{taungdailynews@gmail.com}