Ka OBAKENG MAJE
17 Lwetse 2026 – Motlatsa-mogokgo kwa sekolong se segolwane sa Mammutla kwa motseng wa Kameelputs, o tlogetswe a phokga-phokga madi morago ga dipego tsa go tlhabiwa ke morutabana. Go begwa fa moithuti wa dingwaga di le 17, a tlhabile motlatsa-mogoko, Kagiso Dintwe ka thipa mo letsogong mo letsatsing la Labobedi kwa sekolong morago ga kgakgauthano.
Go ya ka dipego, baithuti ba le bararo ba baneng ba beetswe-thoko nakwana kwa sekolong, ba ile ba itelekela ka dikago tsa sekolo, le go ya kwa diphaphosing tsa bone tsa borutelo. Fela, go begwa fa motlatsa-mogokgo a ile a ba latela le go ba kopa gore ba tswe ka dikago tsa sekolo.
Go begwa fa go ile ga tsoga tlhatlharuane, mme mongwe wa baithuti wa dingwaga di le 17, one a tlala bogale le go kgorogela motlatsa-mogokgo o. Go begwa fa a ile a ntsha thiba le go mo tlhaba mo letsogong.
Sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen o tlhalositse fa go butswe kgetsi ya go teketa ka maikaelelo a go ntsha dikgobalo kwa seteisheneng sa sepodisi sa Kgomotso. Van Rooyen are ga go ise go tshwarwe ope go fitlha ga jaana.
“Dipatlisiso di tsweletse, mme mmelaelwa o tla tlhagelela kwa kgotlhatsekelo fa dipatlisiso di konoseditswe le fa go setse go buisanwe le motlhankedi wa tsa kgopololo,” van Rooyen wa tlhalosa.
Go begwa fa sekolo se kuile kopano ya batsadi le baithuti mo letsatsing la Labotlhano go ya go buisanelwa ka maitsholo a baithuti bangwe a a makgasa.
Kgabagare, Lefapha la Thuto mono Bokone Bophirima, ga ise le tsiboge mabapi le kgang e.
