Ka OBAKENG MAJE
12 Motsheganong 2026 – Sepodisi sa kwa motsesetoropong wa Huhudi kwa Vryburg se batlisisa kgetsi ya morago ga loso. Se, se tla morago ga gore lekgarebe la dingwaga di le 20, le fitlhelwe le ikgwageditse kwa phaphosing ya gagwe ya bonno ka letsatsi la Tshipi mo motshegareng.
Go begwa fa moswi, Boipelo Cawe wa kwa motseng wa Morokweng, gaufi le Ganyesa, a ne a dira kwa lebekeleng le le rekisang diaparo kwa tikwatikweng ya marekelo ya Mompati Mall mono Vryburg.
Sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are setopo sa ga Cawe se ile sa bonwa ke ba lelapa. Van Rooyen are moswi o ile a netefatswa fa a tlhokafaletse kwa lefelong la tiragalo.
“Sepodisi ga se belaele fa go nnile le letsogo la tshwene mo losong la ga Cawe,” van Rooyen wa tlhalosa.
The Guardian 