Tag Archives: gaufi le Taung

Kgetsi ya polao kgatlhanong le lekawana la kwa Lokgabeng e buseditswe morago

NEWS Leave a comment

Setshwantsho: Molatofadiwa, Simon Molale mo kgetsing ya polao

Ka OBAKENG MAJE

16 Ferikgong 2015- Kgetsi ya polao kgatlhanong le lekawana la kwa motseng wa Lokgabeng, gaufi le Taung, e buseditswe morago go fitlha ka di 17 Tlhakole 2025. Simon Molale (22), yo a latofadiwang ka go tlhaba le go bolaya lekgarebe la gagwe, Tshepiso Medichane (21), o tla nama a letile kwa ntlo-lefitshwana morago ga go ganelwa ka beile ke kgotlha-tshekelo ya Taung.

Go begwa fa Molale a ne a tlhaba Medichane le go mo bolaya, mme one a tshaba kwa lefelong la tiragalo morago a go bona batho.

Fela, go begwa fa ba lelapa la gagwe ba ne ba mo tshwara le go mo isa kwa seteisheneng sa sepodisi sa Taung di ura morago ga tiragalo e. Go begwa fa Molale a lekile go tsaya botshelo jwa gagwe pele ga ba lelapa la gagwe ba ka mo neela sepodisi ka motsi o.

Molale o ile a amogelwa kwa bookelo jwa selegae jwa Taung morago ga magatwe a gore o ile a itlhaba ka thipa.

Kgabagare, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are Molale one a tshwarwa le go latofadiwa ka polao ya ga Medichane.

“Ke nnete molatofadiwa mo kgetsing e ya polao o tshwerwe. Molatofadiwa one a isiwa kwa seteisheneng sa sepodisi ke ba lelapa la gagwe.

“One a na le dikgobalo, mme o ile a amogelwa kwa bookelong jwa selegae. Molatofadiwa o lebagane le kgetsi ya polao, mme thipa e e dirisitsweng go bolaya moswi ene ya fitlhelwa kwa lefelong la tiragalo.”

Go fitlha ga jaana, bosekisi bo tlhalositse fa bo setse bo emetse dipholo tsa diteko tsa thipa e go begwang fa Molale a e dirisitse go bolaya Medichane, mme dipatlisiso mo kgetsing di a tswelela.

taungdailynews@gmail.com

Monna o tlhokafetse morago ga go longwa ke noga

NEWS Leave a comment

Setshwantsho-papiso: Monna wa kwa motseng wa Modimong o lomilwe ke noga

Ka OBAKENG MAJE

14 Ferikgong 2025- Monna wa dingwaga di le 60 go tswa kwa motseng wa Modimong, gaufi le Taung, o tlhokafetse morago ga go lomiwa ke noga. Go begwa fa Majojo Seboco a ne a longwa ke noga mo letsatsing la maabane, mme a tabogisetswa kwa bookelong jwa Taung go bona thuso ya potlako.

Fela go begwa fa Seboco a ile a tlhokafala moragonyana kwa bookelo, mme kgetsi ya morago ga loso e ile ya bulwa ke sepodisi.

Sebueledi sa sepodisi mo sedikeng sa Dr Ruth Segomotsi Mompati, Sarasanta Tryphosa van Rooyen are: “Ee, ke nnete kgetsi ya morago ga loso e butswe morago ga gore monna o, a longwe ke noga.

“Go fitlha ga jana ga go itsiwe mofuta wa noga e e mo lomileng.”

taungdailynews@gmail.com

Setopo sa lekgarebe se bonwe kwa lebitleng le le seng boteng kwa Pudimoe

NEWS Leave a comment

Setshwantsho: Mosetsanyana, Boingotlo Makaota o go begwang a bolailwe/Facebook

Ka OBAKENG MAJE

11 Ferikgong 2025- Setopo sa lekgarebe la dingwaga di le 16, se bonwe kwa lebitleng le le seng boteng kwa motseng wa Matlhako 2, gaufi le Taung, mo letsatsing la gompieno. Sepodisi se bega fa lekgarebe le, le ka tswa le bolailwe ka Labone bosigo.

Se se tla morago ga gore moagisani mongwe a begele sepodisi fa a utlwile segajaja sa lekgarebe mo bosigong jwa Labone. Go begwa fa moagisani o, a tlhalositse fa a ne a bona monna mongwe ga mmogo le ditsala tsa gagwe di kgorometsa kereibaye e go bontshang fa ene e pegile sengwe mo teng mo mosong wa Labotlhano.

Sebueledi sa sepodisi mo Bokone Bophirima, Brigadier Sabata Mokgwabone are: “Sepodisi se ile sa tswa letsholo, mme seo se ile sa lebisa kwa go epololweng ga setopo sa lekgarebe mo letsatsing la gompieno.

“Go begwa fa setopo seo, sene se thatilwe ka kobo, mme moswi one a supiwa ke ba lelapa la gagwe jaaka Boingotlo Makaota. Dipatlisiso di shupa fa setopo sa ga Makaota, se ne se na le dintho mo tlhogong, mo diropeng ga mmogo le mo maotong.”

Mokgwabone are dipatlisiso di ile tsa bolodiwa kwa lelapeng la monna o bonweng a kgorometsa kereibaye, mme diaparo tsa moswi di ile tsa fitlhelwa teng. Mokgwabone are, dipatlisiso tsa go tshwara mmelaelwa di tsweletse, mme monna mongwe o bonweng a tsamaya le mmelaelwa fa a ne a kgorometsa kereibaye o a botsolotswa ke sepodisi.

Kgabagare, Mokomishinara wa Sepodisi wa nama o sa tshwere mo Bokone Bophirima, Major General Patrick Asaneng, o kgadile ka bogale tiragalo e. Asaneng are polao eo ya go tlhorontshiwa ga bong e kabo e efogilwe fa baagi ba ne ba le Malala-a-laotswe.

taungdailynews@gmail.com

Tlhokego ya metso e pateletsa baagi go nwa metsi kwa molapong

NEWS Leave a comment

Setshwantsho: Baagi ba patelesega goga metsi kwa molapong 

Ka OBAKENG MAJE 

8 Ferikgong 2025- Tlhokego ya metsi mo sedikeng sa Dr Ruth Segomotsi Mompati e tsweletse go nna tlhoba boroko. Jaanong baagi ba kwa Tamasikwa, gaufi le Taung, ba patelesega goga metsi kwa molapong le go nwa le diphologolo. 

Baagi ba tlhalosa fa ba amilwe ke tlhokego ya metsi lobaka le letelele, mme masepala wa Sedika wa Dr Ruth Segomotsi Mompati kwa Vryburg, o itshetse moriti o tsididi. 

Go ya ka mongwe wa baeteledipele wa baagi kwa Tamasikwa, Gaolatlhwe Raito, leroborobo la tlhokego ya metsi fa e sale le ba tlhasetse dingwaga-ngwaga. Raito are jaanong fa e sale ba itemogela tlhokego ya metsi go tloga ka Lamatlhatso. 

“Re ikuela go masepala wa sedika go ka re tsenyetsa egine e pompiwang ka motlakase, gonne tlhokego ya oli le diesel, ke tsone bothata. Gape, madutelo a rona a onetse, mme re ne re ikuela go masepala go ka re tsenyetsa metshini e mentsha. 

“Ga se ga ntlha re itemogela tlhokego ya metsi, gonne nako enngwe go nna le tlhokego ya oli kgotsa ya diesel. Fela re itumeletse go bona metsi mo letsatsing la gompieno,” Raito wa tlhalosa.     

Kgabagare, yo e leng leloko la komiti ya ga meyara, mme a ikarabela mo go tsa mafaratlhatlha kwa masepaleng, Pico Seepamere are: “Jaaka ke bua le wena jana, ke mo motseng wa Tamasikwa, mme ke tlile ka sengwe le sengwe se se tlhokegang. Akere nako enngwe fa go nna le bodipa, jaaka morongwa-pusong, o tshwanetse gore o tseye matsapa gore bagaetsho ba se nne le mathata. 

“Re nnile le kopano mo letsatsing la gompieno go seka-seka thebolo ya metsi mo kgweding ya Sedimonthole 2024. Fela, re ile ra tlhalosa gore re amogetse mogala go tswa go baagi ba kwa Tamasikwa, mme ba lela ka tlhokego ya metsi.” 

Seepamere are go bua nnete fela, fa e sale baagi ba sena metsi go tloga ka Lamatlhatso. Are ba ile ba neela ditaelo go mokaedi, ga mmogo le motsamaisi go ka leka go thusa le go reba bothata jwa tlhokego ya metsi kwa Tamasikwa. 

“Re ile ra kopa gore ba re thuse ka jojo tank ya dilitara di le 10 000, ga mmogo le oli. Se re ka se tlhalosang ke gore diesel yone e gone. Jaanong, engine ya kwa Tamasikwa ke ya kgale, ga mmogo le lehuti la teng. 

“O tla gopola gore modutelo o, ke wa ngwaga wa 1995. Jaanong, re tshwanetse gore re ba epele lehuti le lengwe. Ka bokhutshwane, se se wela mo kgatong ya rona ya karolo ya boraro ya go ka leka go tokafatsa mafaratlhatlha a kwa Tamasikwa,” Seepamere wa tlhalosa.

Seepamere are motse wa Tamasikwa o godile, mme modutelo o neelang baagi metsi ga o tlhole o ba kgona. Seepamere are ba tlile go tsenyetsa baagi modutelo o montsha.

taungdailynews@gmail.com

Ngwana o tlhokafetse morago ga go ja setsidifatsa-mmele kwa Matolong

NEWS Leave a comment

Setshwantsho-papiso- Ditsidifatsa-mmele tse di rekisiwang

Ka OBAKENG MAJE

27 Sedimonthole 2024- Sepodisi sa Taung se kaile fa se butse kgetsi ya morago ga loso. Se se tla morago ga gore, ngwana wa dingwaga di le 5 go begwe fa a tlhokafetse morago ga go ja setsidifatsa-mmele (ice guava). Tiragalo e, e diragetse kwa motseng wa Matolong, gaufi le Taung, mo letsatsing la 25 Sedimonthole 2024.

Go ya ka sebueledi sa sepodisi mo Bokone Bophirima, Colonel Adele Myburgh, mosetsanyana o, one a fiwa setsidifatsa-mmele ke mongwe wa ditsala tsa gagwe fa ba ne ba tshameka. Myburgh are, go begwa tsala ya moswi, a ile a go reka setsidifatsa-mmele seo kwa lebekeleng la selegae.

“Go begwa fa ngwana o, a ile a tlhakatlhakana le go tabogisediwa kwa bookelong jwa selegae. Mosetsanyana o, one a tlhokafala metsotsonyana fela morago ga go goroga kwa bookelong.

“Kgetsi ya morago ga loso e butswe, mme dipatlisiso di tsweletse. Go fitlha ga jaana, ga gona ope o tshwerweng,” Myburgh wa tlhalosa.

taungdailynews@gmail.com

Monna wa kwa Shaleng o latofadiwa ka go rema mmagwe ka selepe le go mo tlhaba ka thiba go fitha a tlhokafala

NEWS Leave a comment

Setshwantsho: Mapodisi ako lefelong la tiragalo morago ga gore monna a latofadiwe ka go rema mmagwe ka selepe

Ka OBAKENG MAJE

23 Sedimonthole 2024- Monna wa dingwaga di le 26 wa kwa motseng wa Shaleng, gaufi le Taung, o solofetswe go tlhagelela kwa kgotlha-tshekelo ya Kgomotso mo letsatsing la gompieno. Monna o, o lebagane le kgetsi ya polao le maikaelelo a polao.

Se se tla morago ga gore a latofadiwe ka go rema mmagwe ka selepe le go mo tlhaba ka thiba go fitlha a tlhokafala ka di 21 Sedimonthole 2024. Gape, go begwa fa mmelaelwa a ile a tlhaba kgaitsadie ka thipa.

Sebueledi sa sepodisi mo Bokone Bophirima, Lieutenant Colonel Sam Tselanyane, are go begwa fa mmelaelwa a ne a tsena kwa ntlung le go batla madi mo go mmagwe ka dikgoka. Tselanyane are mmagwe mmelaelwa, one a letsetsa ngwana wa gagwe wa mosetsanyana, Masego Gabadise go tla go mo thusa.

“Go begwa fa Masego a ne a fitlhela mmelaewa a teketa mmagwe. O ile a leka go tsireganya, fela go begwa fa mmelaelwa a ile a mo tsogela kgatlhanong le go mo tlhasela.

“Go begwa fa a ile a ntsha thipa, mme a mo tlhaba. Go ya ka dipego, Masego o ile a tabogisediwa kwa bookelo go bona thuso ya potlako,” Tselanyane wa tlhalosa.

Tselanyane are go begwa fa mmelaelwa a ile a tlhasela mmagwe ka selepe le go mo tlhaba ka thipa. Go begwa fa mmelaelwa a ile a sia kwa lefelong la tiragalo.

“Mmelaelwa o ile a tshwarwa, mme o solofetswe go tlhagelela kwa kgotlha-tshekelo,” Tselanyane wa tlhalosa.

taungdailynews@gmail.com

Kgetsi ya polao kgatlhanong le Mogongwa e buseditswe morago

NEWS Leave a comment

Setshwantsho: Molatofadiwa wa polao, Kabelo Mogongwa

Ka OBAKENG MAJE

15 Sedimonthole 2024- Kgetsi ya polao kgatlhanong le molatofadiwa wa kwa motseng wa Khibicwane, gaufi le Taung, Kabelo Mogongwa (47), e buseditswe morwgo go fitlha di 5 Ferikgong 2025, ke kgotlhatshekelo ya sedika ya Taung. Mogongwa yo a begang fa a tlile go ipuelela mo kgetsing e, o ile a tshwarwa morago ga dipego tsa gore o thuntsitse lekgarebe la gagwe, Tsholofelo Nde Emphukile (38). 

Go begwa fa lekawana le le lekgarebe la gagwe, ba ne ba dula botlhe kwa phaphosing e e hirilweng kwa motseng wa Khibicwane, gaufi le Taung. Go ya ka sebueledi sa sepodisi mo Bokone Bophirima, Mokaptein Aaftje Botma, yo a rotseng tiro ga jaana, moagisani wa monna o, o ile a tlhalosetsa sepodisi fa baratani ba, ba gorogile ka ura ya bongwe mo mosong, mme go ile ga tsoga kgakgauthano magareng ga bone.

“O kaile fa a utlwile modumo wa sethunya. Sepodisi se ile sa biletswa kwa lefelong la tiragalo, mme se ile sa fitlhela moswi a le mogare ga bophadiphadi jwa madi.

“Sepodisi se ile sa patelesega go shaga burglars, gore ba kgone go tsena mo ntlung. Molatofadiwa o ile a tshwarwa, mme one a ganelwa ka beile,” Botma wa tlhalosa.

taungdailynews@gmail.com

Mankuroane o kgala ka bogale go thubiwa ga mephato

NEWS Leave a comment

Setshwantsho-papiso: Mophato o haladitswe mono Bokone Bophirima

Ka OBAKENG MAJE 

10 Sedimonthole 2024- Mephato ele mebedi e thubilwe kwa motseng wa Mabereng, gaufi le Taung, ka di 6 Sedimonthole 2024. Se se tla morago ga magatwe a gore bangwe ba borra-mophato jaaka Kgethisi Kgethisi, Mogote Pico ga mmogo le Spengwane Bareetseng, ba ile ba tsenya mophato ntle le ditlankana tse di maleba. 

Komiti ya porofense e e ikarabelang ka tsa go tlhatlhela ga mephato (Provincial Initiation Coordinating Committee), e e leng karolo ya Lefapha la Merero ya Setso mo Bokone Bophirima, ga mmogo le sepodisi, ba ne ba tsoga ka makuku a naka tsa kgomo go ya go halatsa mephato eo. 

Modula-setilo wa komiti eo, Kgosi Godfrey Ramosetlhe Gasebone are, batho ga ba utlwe, mme ke tlolo-molao go tlhatlhela mophato ntle le ditlankana tse di maleba. Gasebone are gore motho a feleletse a sa neelwe setlankana se se maleba go ka tlhatlhela, seo se raya gore ga a dira jaaka a ne a laetswe. 

“Jaanong, batho ba rona ga ba utlwe. Ba fetotse setso se sa rona kgwebo. Bana ba isitswe kwa dikolong tse dingwe tse di siameng tse di nang le ditlankana. 

“Gona le metse e mengwe e go neng go sa tshwanelwa go tlhatlhelwa mophato mo go yone, gonne gona le dikgosi tse di tlhokafetseng,” Gasebone wa tlhalosa. 

Mongwe wa bo rra-mophato e e thubilweng, Mogote Pico are: “Ba thubile mephato ya rona, mme ba re ba batla ditlankana tsa go tlhatlhela. Setlankana seo, ba se nyeleditse fela mo tafoleng ya bone. Rona re ile ra bona go le maleba gore re tlhatlhele fela. 

“Ga re itse gore sepodisi se tsaya kae maatla a go thuba mophato. Nna ke itse fa Lefapha la tsa Merero ya Setso fa le thuba mophato, le tshwanetse go tla go bona pele. Ba tshwanetse go tlhalosa gore mophato o thubiwa motlase ga mabaka a fe.” 

Kgabagre, Kgosi Sam Mankuroane are: “Go thuba mophato ke botubi. Ga o kake wa tlogela mophato o tsene nako e telele jalo, mme o be o tla go o thuba. Goreng lefapha le ne le sa lebe kwa kgotlha-tshekelo go kopa lekwalo-thibelo?

“Gatwe go tlhokafetse dikgosana di le tharo, mme ba re bangwe ba seka ba tlhatlhela. Ra tlhaloganya gore ko ga Baga-Maidi, go tlhokafetse Kgosi Kelebonye Motlhabane.” 

Mankuroane are se seneng se tshwanetswe ke go dirwa, ke go itsise borra-mophato botlhe gore ga ba tlhatlhele ngwaga o go ilela kgosi. Mankuroane are se se makatsang ke gore, ba bangwe ba neilwe ditlankana fa ba bangwe ba timilwe. 

taungdailynews@gmail.com

Ngwana o tlhokafetse kwa Ranstad morago ga go ja mazimba

NEWS Leave a comment

Setshwantsho-papiso: Ngwana o tlhokofetse kwa Ranstad morago ga go ja mazimba

Ka OBAKENG MAJE

26 Ngwanatsele 2024- Kgang ya go tlhokafala ga bana ba ba jeleng mazimba a fetilweng ke letlha ya tswelela. Se se tla morago ga dipego tsa gore ngwana a le mongwe wa kwa motseng wa Ranstad, gaufi le Taung, o tlhokofetse ka Lamatlhatso morago ga dipego tsa gore o jele mazimba.

Go begwa fa Oarabile Nthibogelang (2), ga mmogo le ditsala tsa gagwe di le tharo, ba ne ba etela mongwe wa bagwebi ba kwa mebileng, le go reka mazimba.

Sebueledi sa sepodisi mo sedikeng sa Dr Ruth Segomotsi Mompati, Sarasanta Tryphosa van Rooyen are, tiragalo e ke ya di 23 Ngwanatsele 2024. Van Rooyen are bana ba, ba ile ba reka le go ja mazimba ao, mme ba ne ba tshimolola go menekega.

“Batsadi ba bana ba ba ile ba itsiswe, mme ba ne ba ba tabogisetsa kwa bookelong jwa selegae. Ka maswabi, Nthibogelang one a tlhokafala moragonyana, fa bana ba bangwe ba le bararo ba le mo tlase ga tlhokomelo ya dingaka.

“Kgetsi ya morago ga loso ile ya bulwa, mme dipatlisiso di tsweletse. Ga gona ope o tshwerweng go fitlha ga jaana,” van Rooyen wa tlhalosa.

Kgabagare, modulasetilo wa mokgatlho wa baagi wa South African National Civic Organisation (SANCO) mo Greater Taung, Joseph Tanyane are: “Re le maloko a mokgatlho wa baagi wa SANCO, re sentse re le mo letsholong la go etela mabenkele a farologaneng, ga mmogo le dikgwebo. Maitlhomo a letsholo le, ke go lebelela gore a dijo tse ba di rekisang ga di a fetwa ke nako.

“Re rata gape go leboga masepala wa sedika wa Dr Ruth Segomotsi Mompati, ga mmogo le masepala o mogolwane wa Taung, gonne ba ne ba rulagantse letsholo le le ntseng jalo dibeke tse di fetileng.”

Tanyane are le bone jaaka SANCO, ene ele karolo ya letsholo leo. Tanyane are, jaaka mokgatlho wa baagi, ba sentse ba ikuela go batsadi go sefe bana madi.

“Seo se tla thusa gore bana ba se etele dikgwebo tse di farologaneng le go reka mazimba. Selo seo, se feleletsa se dira gore ba latlhagelwe ke botshelo. Re tlile go rulaganya letsholo le lengwe gape.

“Re tlile go mema mafapha a farologaneng go nna karolo ya letsholo. Re kopa baagi ban ne pudi matsepa, gonne  setshaba sa ga rantsho sa nyelela. Re batla gore fa re etela mabenkele a farologaneng, re be re latela molao morago,” Tanyane wa tlhaosa.  

taungdailynews@gmail.com

Monna wa kwa motseng wa Mokassa o ikaleditse  

NEWS Leave a comment

Ka OBAKENG MAJE

25 Ngwanatsele 2024- Sepodisi sa Taung sa kaile fa se boloditse dipatlisiso tsa morago ga loso. Se se tla morago ga gore monna wa dingwaga di le 63, wa kwa motseng wa Mokassa, gaufi le Taung, a fitlhelwe a ikgwageditse kwa sekgweng gaufi le molapo kwa motseng wa Lokgabeng.

Go ya ka sebueledi sa sepodisi mo Bokone Bophirima, Sarasanta Tryphosa van Rooyen, Molebatsi Edward Maine, one a tswa kwa lelapeng la gagwe ka di 20 Ngwanatsele 2024, mme ga ka a itsise ope gore o ya kae.

“Go ile ga bulwa kgetsi ya motho o timetseng, mme dipatlisiso di ile tsa bolodiwa. Fela ka di 23 Ngwanatsele 2024, setopo sa ga Maine se se neng se kaleditswe, se ile sa bonwa kwa motseng wa Lokgabeng.

“Sepodisi ga se belaele fa go ka tswa gona le letsogo la tshwene mo tiraglong e. Kgetsi ya morago ga loso e butswe kwa seteisheneng sa sepodisi sa Taung,” van Rooyen wa tlhalosa.

taungdailynews@gmail.com