Tag Archives: gaufi le Taung

Maloko a le mararo a kwa Shaleng a fitlhilwe, fa molatofadiwa a boela kwa kgotlha-tshekelo go dira kopo ya beile

NEWS Leave a comment

Setshwantsho: Molekgotlha kwa masepaleng o mogolwane wa Taung, Itumeleng Maribe

By OBAKENG MAJE

25 Ngwanatsele 2024- Monna wa kwa motseng wa Shaleng, gaufi le Taung, o a latofadiwang ka go bolaya rragwe, Mosimanegape Kale (74), mmagwe eleng Phodisho Kale (68), ga mmogo le kgaitsadie, Bonolo Kale (27), o solofetswe go dira kopo ya beile kwa Kgotlha-tshekelong ya Kgomotso mo letsatsing la gompieno.

Molatofadiwa, Olebogeng Mampe Kale (33), o latofadiwa ka go ngata rragwe, mmagwe le kgaitsadie ka molamu mo ditlhogong, mme a ba bolaya ka gagwe dibeke di le pedi tse di fetileng.  

Go ya ka sebueledi sa sepodisi mo Bokone Bophirima, Colonel Adele Myburgh, Kale one a tsena kwa gagabo, mme a fitlhela ba losika la gagwe ba dutse mo tafoleng e go nwelwang mogodungwana mo go yone kwa mogwafatsheng wa bone. Myburgh are Kale o ile a ngata batsadi ba gagwe le kgaitsadie ka molamu mo ditlhogong.

“Go begwa fa maloko mangwe a losika ba ne ba tshaba ka letlhaba-phefo go efoga tiragalo e. Ba ile ba siele kwa baagisanyeng le go kopa thuso. Go begwa fa maloko mangwe a baagi, ba ile ba tswa letsholo le go batlana le monna o, morago ga gore a tsene ka lenga la seloko.

“Ba ile ba mo tshwara ka Lamatlhatso ka ura ya borataro mo mosong le go mo neela sepodisi. Ba thuso ya potlako ba ile ba bidiwa, mme ba netefatsa fa baswi ba tlhokafaletse kwa lefelong la tiragalo,” Myburgh wa tlhalosa.

Mokomishinara wa sepodisi mo Bokone Bophirima, Lieutenant General Sello Kwena, o ile a kgala tiragalo e e setlhogo e ka bogale. Kwena o ile akgola baagi morago ga go thusana le sepodisi mo go tshwareng molatofadiwa.

Kgabagare, baswi ba ile ba fitlhiwa ka Lamatlhatso teng kwa motseng wa Shaleng. Molekgotlha kwa masepaleng o mogolwane wa Taung, Itumeleng Maribe are, baagi ba le bantsi ba ile ba tlhalosa fa ba belaela gore molatofadiwa a ka tswa a ne a le mo tlase ga tshushumetso ya diritibatsi fa a ne a dira tiro e.

“Ba ikuetse go puso go ka bolotsa ntwa kgatlhanong le tiriso e botlhatswa ya diritibatsi. Baagi ba re jaaka puso e boloditse ntwa kgatlhanong le mabenkele a rekisang dijo tse di fetilweng ke nako, e tshwanetse gore e dire fela jalo kgatlhanong le tiriso e botlhatswa ya diritibatsi.

“Jaanong, ba tlhalositse gore botlhe ba ba rekisang diritibatsi, ba tshwarwe mme molao o tseye karolo. Ba re diritibatsi di senya bokamoso jwa basha ba le bantsi, mme seo se tseelwe tlhogong. Ba re basha botlhe ba ba dirisang diritibatsi, ba tshwanetse gore ba thusiwe, mme Lefapha la Katlatlelo-Loago le lone le thuse,” Maribe wa tlhalosa.

Are ba tlile go dirisana le sepodisi go ka leka go reba ditiragalo tse di ntseng jaana gore di se tlhola di diragala. Maribe are jaaka masepala, ba ile ba etela lelapa mogare ga beke le go neelana ka dithuso.

taungdailynews@gmail.com

  

Monna o tshwerwe morago ga go latofadiwa ka go bolaya rragwe, mmagwe ga mmogo le kgaitsadie kwa Shaleng

NEWS Leave a comment

Setshwantsho: Mongwe wa baswi, Bonolo Kale

Ka OBAKENG MAJE

16 Ngwanatsele 2024- Monna wa dingwaga di le 33 wa kwa motseng wa Shaleng, gaufi le Taung, o solofetswe go tlhagelela kwa Kgotlha-tshekelong ya Kgomotso ka Mosupulogo. Se se tla morago ga go latofadiwa ka go bolaya rragwe, Mosimanegape Kale (74), mmagwe eleng Phodisho Kale (68), ga mmogo le kgaitsadie, Bonolo Kale (26).

Go begwa fa monna o, a ile a tsena kwa mokhukhung wa kwa gagabo, mme a fitlhela ba lelapa la gagwe ba itisitse ka mogodungwana. Go begwa fa monna o, a ile a ba tlhasela ka molamu.

Sebueledi sa sepodisi mo Bokone Bophirima, Colonel Adele Myburgh are: “Go begwa fa monna o, a ile a ngata ba lelapa la gagwe ka molamu mo ditlhogong, mme a sia kwa lefelong la tiragalo. Tiragalo e, ke ya maabane bosigo.

“Maloko a lelapa a le mararo, a ile a netefadiwa fa a tlhokafetse ke ba ditirelo tsa tshoganyetso. Bangwe ba baagi ba ile ba tswa letsholo le go batlana le mmelaelwa. Monna o, o ile a lelelwa ke ditshipi mo mosong jaana, mme o solofetswe go ka shadikanya matlho kwa Kgotlha-tshekelo ya Kgomotso ka Mosupulogo.”

Myburgh are dikgetsi di le tharo tsa polao di butswe kgatlhanong le mmelaelwa, mme sebakwa sa tiro e, ga se se itsiwe. Myburgh are dipatlisiso mo tiragalong e, di tsweletse.

Modula-setilo wa setlamo sa Sino Themba se eseng sa puso, mme se dira ka ditshotlakako kgatlhanong le bong, Golekane Morwe are tiragalo e, e amile maikutlo a baagi. Morwe are ba ikuela go batho botlhe go ka lwa kgatlhanong le ditshotlakako tsa bong.

“Re ka netefasa fa tiragalo e, e tlogetse baagi ba gamaregile, ebile ba ipotsa gore sebakwa sa bosetlhogo jo bo kana-kana ke jwa eng. Re ikuela gore re le baagi, re eme ka dinao, mme re lwe kgatlhanong le ditiragalo tse,” Morwe wa tlhalosa.

Kgabagare, kemedi go tswa kwa masepaleng o mogolwane wa Taung, e solofetswe go ka etela lelapa ka Mosupulogo.

taungdailynews@gmail.com

 

Kgetsi ya polao ya kwa Majaneng e buseditswe morago

NEWS Leave a comment

Ka OBAKENG MAJE

13 Ngwanatsele 2024- Kgetsi ya polao kgatlhanong le monna wa kwa motseng wa Majaneng, gaufi le Taung, e buseditswe morago ke kgotlha-tshekelo ya Taung go fitlha di 6 Tlhakole 2025. Motseothata Nelson Seoleseng (35), o latofadiwa ka go tlhaba le go bolaya tsala ya gagwe, Mosimanegape Adam van Wyk (31), ka thiba.

Tiragalo e, e diragetse dikgwedi di le mmalwa kwa motseng wa Majaneng. Go begwa fa Seoleseng ga mmogo le moswi, ba ne ba le mmogo, mme ba ile ba ya kwa gabo molatofadiwa ko ba fitlhetseng morwa rragwe molatofadiwa ana le lekgarebe la gagwe.

Mongwe wa bo maratahelele wa tlhalosa: “Go begwa fa go ile ga runya kgakgauthano ya mafoko ma gareng ga molatofadiwa le monnawe. Sebakwa sa kgakgauthano ke gore, molatofadiwa one a botsa monnawe gore goreng a tlisa lekgarebe kwa gagabo.

“Ene ya re fa e ya matsogong, tsala ya molatofadiwa, van Wyk, one a leka go tsiriganya. Fela go begwa fa molatofadiwa a ne a mo tsogela kgatlhanong, mme a mo tsatsanka ka thipa. Go ya ka dipego, moswi one a rwalelwa kwa bookelong jwa sedika jwa Taung, fela one a balelelwa le badimo mo letsatsing le le latelang.”

Go begwa fa kgetsi ya polao ene ya bulwa, mme mmelaelwa one a tshwarwa.

Sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are, kgetsi ya polao e butswe.

Kgabagare, mmagwe moswi, Pulane Van Wyk are: “Pelo ya ka e setse e rotha kgodu e khibidu. Jaaka ke bua le wena jaana, ke dula ke tshogile ka gore monnawe molatofadiwa, Tshotlhego, o dula a mpolelela gore molatofadiwa o dula a mo letsetsa, mme are nna ke mo ntshe mo kgolegelong, mme o tla nnaya madi.

“Jaanong, potso ke gore a ke sireletsegile fa go direga dilo tse. Ke ile ka itsise le sepodisi gore a go siame gore ere molatofadiwa a mmpolaetse ngwana a be a dula a romela batho mo go nna gore ke mo ntshe mo kholegelong o tla nnaya madi.”

Van Wyk are o boleletse monnawe molatofadiwa gore fa a sa batle a mo tsenya ka ntlo-lefitshwana, a ye go mo nnaya ngwana wa gagwe. Are Motseothata ene o botokwa gonne ba lelapa la gagwe ba dula ba mo bona kwa kgotlha-tshekelo, mme ene ngwana wa gagwe ga a mo bone.

taungdailynews@gmail.com

Kgetsi ya polao ya kwa Majaneng e boela kgotlha-tshekelo

NEWS Leave a comment

Ka OBAKENG MAJE

12 Ngwanatsele 2024- Kgetsi ya polao kgatlhanong le monna wa kwa motseng wa Majaneng, gaufi le Taung, e boela kgotlha-tshekelo mo letsatsing la gompieno. Motseothata Nelson Seoleseng (35), o latofadiwa ka go tlhaba tsala ya gagwe, Mosimanegape Adam van Wyk (31) ka thiba go fitlhelela a tlhokafala.

Tiragalo e, e diragetse dikgwedi di le mmalwa kwa motseng wa Majaneng. Go begwa fa Seoleseng ga mmogo le moswi, ba ne ba le mmogo, mme ba ile ba ya kwa gabo molatofadiwa ko ba fitlhetseng morwa rragwe molatofadiwa ana le lekgarebe la gagwe.

Mongwe wa bo maratahelele wa tlhalosa: “Go begwa fa go ile ga runya kgakgauthano ya mafoko ma gareng ga molatofadiwa le monnawe. Sebakwa sa kgakgauthano ke gore, molatofadiwa one a botsa monnawe gore goreng a tlisa lekgarebe kwa gagabo.

“Ene ya re fa e ya matsogong, tsala ya molatofadiwa, van Wyk, one a leka go tsiriganya. Fela go begwa fa molatofadiwa a ne a mo tsogela kgatlhanong, mme a mo tsatsanka ka thipa. Go ya ka dipego, moswi one a rwalelwa kwa bookelong jwa sedika jwa Taung, fela one a balelelwa le badimo mo letsatsing le le latelang.”

Go begwa fa kgetsi ya polao ene ya bulwa, mme mmelaelwa one a tshwarwa.

Sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are, kgetsi ya polao e butswe. Kgetsi e buseditswe morago go fitlha 7 Phatwe 2024, go tla go utlwa letsatsi la tsheko. 

Kgabagre, mmagwe moswi, Pulane Van Wyk are: “Pelo ya ka e setse e rotha kgodu e khibidu. Jaaka ke bua le wena jaana, ke dula ke tshogile ka gore monnawe molatofadiwa, Tshotlhego, o dula a mpolelela gore molatofadiwa o dula a mo letsetsa, mme are nna ke mo ntshe mo kgolegelong, mme o tla nnaya madi.

“Jaanong, potso ke gore a ke sireletsegile fa go direga dilo tse. Ke ile ka itsise le sepodisi gore a go siame gore ere molatofadiwa a mmpolaetse ngwana a be a dula a romela batho mo go nna gore ke mo ntshe mo kholegelong o tla nnaya madi.”

Van Wyk are o boleletse monnawe molatofadiwa gore fa a sa batle a mo tsenya ka ntlo-lefitshwana, a ye go mo nnaya ngwana wa gagwe. Are Motseothata ene o botokwa gonne ba lelapa la gagwe ba dula ba mo bona kwa kgotlha-tshekelo, mme ene ngwana wa gagwe ga a mo bone.

taungdailynews@gmail.com

Mosadi o tlhokafetse morago ga go idibala

NEWS Leave a comment

Setshwantsho: Monna wa moswi o dikaganyeditswe ke baagi morago ga tiragalo

Ka OBAKENG MAJE

28 Diphalane 2024- Mosadi wa kwa motseng wa Magogong, gaufi le Taung, o tlhokafetse morago ga go idibala. Go begwa fa Bontleeng Matseko (41), a ne a tsamaya le mogatse go ya kwa toropong fa tiragalo e, e diragala.

Sebueledi sa sepodisi mo Bokone Bophirima, Brigadier Sabata Mokgwabone are ene ya re mo go boeng ga bone, Matseko one a ikutlwa e kare otshwerwe ke sedidi.  Mokgwabone are tiragalo e, ke ya Lamatlhatso, mme moswi one a le mo tekesing fa e diragala.

“O ile a bewa mo tlase ga setlhare, mme go ile ga bidiwa ambulance. Ka maswabi, o ile a begwa fa tlhokafetse, mme kgetsi ya morago ga loso e butswe.  

“Go fitlha ga jaana, dipatlisiso di tsweletse, mme ga go belaelwe fa go nnile le letsogo la tshwene,” Mokgwabone wa tlhalosa.

taungdailynews@gmail.com

Baithuti ba le supa kwa Cokonyane ba aparetswe ke moya wa ‘matimone’   

NEWS Leave a comment

Setshwantsho: Sekolo se segolwane sa Marubising

Ka OBAKENG MAJE

21 Diphalane 2024- Go begwa fa seemo se tlhotse se tswile mo taolong, mme dithuto di batlile di kgorelesege kwa sekolong se segolwane sa Marubising le kwa sekolong se se potlana sa Keikanamang kwa motseng wa Cokonyane, gaufi le Taung, mo letsatsing la gompieno.

Go belaelwe fa baithuti ba le mmalwa ba ile ba tshwarwa ke moya wa matimone mo mosong. Se se tla morago ga gore moruti Moses Motlhale a rapelele baithuti pele ga ba tla tshimolola ka go kwala ditlhatlhobo tsa bone tsa mafelo a ngwaga.

Go begwa fa Motlhale, a ile a biletswa kwa dikolong tse pedi tse go ya go rapelela baithuti. Fela go ya ka bo maratahelele, baithuti bangwe ba ile ba aparelwa ke moya wa matimone, mme ba ile ba lela le go gowa.

Go begwa fa baithuti bao, ba ile ba tlhalosa fa ba bona dilo dingwe jaaka dinoga le tse dingwe.

Sebueledi sa Lefapha la Thuto mo Bokone Bophirima, Mphata Molokwane are, bagokgo ba dikolo tse pedi tseo, ba tlhalositse fa gone go tsweletswe ka thapelo jaaka go ke go dirwe ngwaga le ngwaga pele ga baithuti ba kwala ditlhatlhobo tsa bone tsa mafelo a ngwaga.

“Fela, go ile ga tlhalosiwa fa baithuti ba le supa ba mephato e kwa tlase ba ile ba bontsha fa ba na le kgatelelo ya maikutlo, mme ba simolola go lela le go gowa. Baithuti bao, ba ile ba rwalelwa kwa kliniking ya selegae go ka leka go ba neela thobo ya maikutlo.

“Jaaka re bua le wena jaana, baithuti bao ba siame. Ga gwa nna le di kgoreletsi mo go kwaleng ga ditlhatlhobo tsa marematlou kwa sekolong sa Marubising,” Molokwane wa tlhalosa.

Kgabagare, moruti o a neng a rapelela baithuti ba, Moses Motlhale are: “Ke ne ke ile go rapelela baithuti kwa sekolong se segolwane sa Marubising le se se potlana sa Keikanyamang. Se se diragetseng ke gore, baithuti ba ile ba nna mo seemong se sengwe.

“O tla fitlhela ba na le matsapa a farologaneng go tswa kwa malapeng a bone. Jaanong, erile fa dilo tseo di kopana le thapelo, di be di ba dira gore ba nne mo seemong se ba neng ba le mo go sone.”

Motlhale are go bua nnete, ene ga a rapele mong wa leina thapelo fa a rapela. Motlhale are o tsaya matsatsi a le supa pele ga a ya kwa go tshwanetsweng gore a ye go rapela teng.

“Se ke se buang ka leganong la ka, ke se se tlileng go ntsha dilo tse di maswe. Baithuti ba ne ba sa ngatege, mme ba ne ba wa le go gowa ekete ba bona dilo tsa boloi. Ke tswa go katolola dineo tsa bana, mme bangwe ba tlhalositse fa ba bona digaga le diphala. Ba bangwe ba tlhalosisitse fa ba bone bannabagolo ba tshwere dithobane.

“Ke selo se kgale se direga kwa Marubising. Jaanong, ke ile ka bilediwa le kwa Keikanamang. Ke utlwile gotwe bana ba wa. Fela, ga se ke utlwe sepe kwa sekolong se se potlana sa Lekang. Mme fa go ka nna le mokgwasa le gone, re tlile go ya,” Motlhale wa tlhalosa.

Motlhale are kwa Marubising ga are gatwe, mme o tswa teng. Are baithuti ba bangwe ba buseditswe magaeng, gonne barutabana ba ne ba tlhalosa fa ba kgoreletsa ditlhatlhobo tsa baithuti ba marematlou.

taungdailynews@gmail.com

Mosadi mongwe o bolailwe ke baagi kwa Modutung morago ga go mo latofatsa ka boloi

NEWS Leave a comment

Setshwantsho: Ntlo ya ga Omphile Mothusiemang-Legodu ga mmogo le setopo sa gagwe di jelwe ka molelo

Ka OBAKENG MAJE

21 Diphalane 2024- Baagi ba ba shakgetseng ba kwa motseng wa Modutung, gaufi le Taung, ba letse ba fisitse le go bolaya mme mongwe, Omphile Mothusiemang-Legodu (40), morago ga gore ba mo latofatsang ka boloi le go nna le seabe mo go bolaweng ga ga Rethabile Molapo (11).

Molapo o ile a timele ka di 13 Diphalane 2024, fa a ne a romilwe go ya go tsaya seaparo sa kereke kwa gagabo. Go begwa fa a ile a thopiwa ke batho bangwe ba ba sa itsiweng.

Setopo se se neng se senyegile sa ga Molapo, se ne sa fitlhelwa se fisitswe kwa ntlwaneng-boithusetso kwa ntlung nngwe e go sa duleng batho kwa go yone. Seo, se ile sa shakgatsa baagi, mme ene ya re morago ga phitlho ya ga Molapo mo letsatsing la maabane, ba ile ba ya go fisa Mothusiemang-Legodu le go mo bolaya.

Go ya ka sebueledi sa sepodisi mono Bokone Bophirima, Brigadier Sabata Mokgwabone, are go begwa fa baagi ba fisitse ntlo ya ga Mothusiemang-Legodu. Gape Mokgwabone are, baagi ba ile ba tsaya dilwana kwa lebenkeleng lengwe la motswa-kwa.

“Molapo o ile a timela ka di 13 Diphalane 2024. Fela, sepodisi se ile sa itsiswe morago ga matsatsi a le mararo. Ba lelapa ga ba ka ba itsise sepodisi, gonne ba ne ba setse ba ikopantsha le dingaka tse di farologaneng.

“Sepodisi se ile sa bidiwa, mme go fitlha ga jaana seemo se retibetse. Sepodisi se butse kgetsi ya polao, ya go fisa le bogodu, fela ga go ope o tshwerweng go fitlha ga jaana. Dipatlisiso di tsweletse, mme sepodisi se ikuela go baagi go se itseele molao mo matsogong,” Mokgwabone wa tlahosa.

taungdailynews@gmail.com

Mosetsanyana wa kwa Modutung oneng a nyeletse mme a fitlhelwa a bolailwe, o fitlhilwe gompieno fa baagi ba le mo letsholong la go batla badiri ba tiragalo e

NEWS Leave a comment

Setshwantsho: Rethabile Molapo o neng a timetse le go bolawa o fitlhilwe  

Ka OBAKENG MAJE

20 Diphalane 2024- Ngwana wa dingwaga di le 11, oneng a fitlhelwa a bolailwe morago ga go timela kwa motseng wa Modutung, gaufi le Taung, o tlhotse a fitlhilwe mo letsatsing la gompieno. Go begwa fa Rethabile Molapo a ne a romiwa ke mmagwe go ya go tsaya seaparo sa kereke kwa gagabo ka Lamatlhatso o fetileng, mme one a thopiwa ke batho ba ba sa itsiweng.

Go ya ka dipego, batho bao, ba ile ba mo gogela kwa ntlung nngwe e e sa nneng batho, mme ba mo bolaya, pele ga ba ka mo fisa. Setopo sa ga Molapo se ile sa bonwa ke modisa mongwe o a ileng a bona go tuka molelo kwa ntlwana-boithusetso kwa ntlung eo.

Sebueledi sa sepodisi mo Bokone Bophirima, Brigadier Sabata Mokgwabone are: “Modisa o, o ile a leka go tima molelo mme one a bona setopo sa mosetsanyana o. O ile a bitsa bangwe ba baagi, ga mmogo le sepodisi. Go ile ga fitlhelwa setopo sa ga Molapo se se sheleng mohama.

“Kgetsi ya morago ga loso e ile ya bulwa ke sepodisi, mme go fitlha ga jaana, dipatlisiso di tsweletse,” Mokgwabone wa tlhalosa.     

Mmagwe Rethabile Molapo, eleng Keseneilwe Jackson are o utlwisitswe botlhoko ke tiragalo e. Jackson are badiri ba tiragalo e, ba setlhogo.

“Re bone ngwana bagolo, mme re ile ra tlhalosetswa gore ngwana ga nkitla a kgona go dula go fitlhelela dibeke tse di tlang, gonne one a setse a senyegile. Ke ka moo re mo fitlhang gompieno. Mme re ikuela go baagi go tlisa dithuso dingwe le dingwe tse ba tla di kgonang.

“Tota kgang e ya go bolawa ga ngwanake ga ya ntshwara sentle. Ke fela gore fa o le motsadi, o tshwanetse gore o eme ka dinao o lwanele ngwana wa gago,” Jackson wa tlhalosa.

Jackson are o botlhoko mo pelong gore ngwana o kana a ka bolawa setlhogo jaana. Are bogolo badiri ba tiragalo e, ba kabe ba tshotse ene.

“Tota o ka se itse gore ke eng tiragalo e, e diragetse mme mo lefatsheng ga nke motho a itse gore manaba a gagwe ke bo mang.

“Se ke se itseng ke gore fa o le motho o ka se tshele ntle le dira. Le Jesu Kreste le ene o ile a rekisiwa ke ba a neng a ja le bone mo sejaneng,” Jackson wa tlhalosa.

Moeteledipele wa baagi, Kenneth Jampane are: “Matsapa ke gore, ga re ise re nne le netefaletso ya gore re ka shupa mang ka monona, mme re tshwere bopaki jo re tla bo bayang mo tafoleng. Fela jaaka ke ne ke buile mo malobeng kere tiro e tshwana le e, e tsenyeleditseng botegeniki jwa boloi, go bonagala gore go setse go eme fela jalo.

“Gona le botegeniki jwa boloi jo bo dirisitsweng gore go nne le tiragalo e ya gore ngwana a tsewe. Tota re bua fela jana, mme ga nkitla re upulola dilo tse dingwe tse re di tsayang gore di bosisi thata gore di ka tswela mo setshabeng,” Jampane wa tlhalosa.

Jampane are mme tse dingwe tsa tsone ke dintlha dingwe tse go tshwanetswe gore di tsewe semolao go fitlhelela tharabololo. Jampane are o sentse a ipoeletsa gore ba tshwanetse go ka kopana jaaka baagi, mme ba dire mmogo, gonne se se diragalang se dirwa ke bangwe ba baagi.

Kgabagare, go begwa fa baagi batswile letsholo le go fisa matlo mangwe a bangwe ba batho ba ba ba belaelang fa ba amega mo tiragalong e ya go thopiwa ga ngwana.

taungdailynews@gmail.com

‘Monnamogolo o teketilwe a shupilwe ka dithunya’ 

NEWS Leave a comment

Setshwantsho: Monna wa kwa Dikhuting, Christopher More 

Ka OBAKENG MAJE 

16 Diphalane 2024- Monnamogolo wa kwa motseng wa Dikhuting, gaufi le Taung, are o tshelela mo letshogong, mme ga itse gore a lebe kae. Christopher More (70), are go na le banna ba ba itirileng kgogomodumo mo botshelo jwa gagwe, mme sepodisi ga se dire sepe. 

“Ke ile ka teketiwa ke banna ba ngwaga o fetileng, ba be ba sala ba fisa ntlo le sejanaga saka. Ke ile ka hudugelwa kwa Tlapeng, gape ba nteketile ba ntshupile ka dithunya. 

“Re ne re tsenetse kopano ya morafe kwa kgotlha, mme go ile ga fitlha moruti o a ileng a bula ka thapelo. Kopano ene ele mabapi le matikiri a epiwang motseng,” More wa tlhalosa. 

Are kwa kopanong eo, go ile ga nna le dikgoga-kgogano, mme ba ile ba gamarega fa ba bona moruti a tlogela kopano, mme a apara diaparo tsa tshireletso (bullet proof). More are moruti o ile a tsena mo sejanageng sa gagwe a tsamaya. 

“Rona re ile ra tsamaya, gonne nna ke ne ke ikutlwa tlala. Erile fa re sentse rele mo tseleng, re ne ra bona dijanaga di le pedi di feta ka lobelo, mme di lebile kwa kopano eneng e tshwaretswe teng. 

“Fela pele ga re tsena kwa re dulang teng, dijanaga tseo di ile tsa fitlha le go emisa fa thoko ga rona. Re ile ra makadiwa ke go bona banna ba le bane, ga mmogo le moruti, ba fologa ka dithunya. Ba ile ba re tshwara le go re teketa ba re shupile ka dithunya,” More wa tlhalosa. 

Are ene ya re morago ga moo, ba ile ba tsena mo dijanageng tsa bone ba tshaba. More are mme moragonyana, go ile ga fitlha sejanaga sa sepodisi. 

“Ke ile ka ba lotlegela se se diragetseng. Re ne ra tsena mo sejanageng sa sepodisi, le go leka go lelekisa dijanaga tseo, mme ene ya re fa re tsena kwa motseng wa Manthe, re ile ra bolelelwa fa dijanaga tseo di ile kwa kgosing. 

“Re ile ra leta le mapodisi kwa tseleng, mme moragonyana, re ile ra bona dijanaga tseo di tswa kwa kgosing le go leba kwa motseng wa Dikhuting. Mapodisi a ile are a leka go di lelekisa, fela go ile ga retela,” More wa tlhalosa. 

Are go ile ga tlhaga sejanaga se sengwe kwa morago, mme se ile sa kgoreletsa sejanaga sa sepodisi gore se se tshware dijanaga tse ba neng ba di beile maroa. More are, sepodisi se ile sa itlhoboga fa se tsena ka Dikhuting. 

Kgabagare, sebueledi sa sepodisi mo Bokone Bophrima, Colonel Adele Myburgh are: “Sepodisi se butse kgetsi ya go teketa ka maikaelelo a go ntsha dikgobalo. Fela, ga gona ope o tshwerweng go fitlha ga jaana, mme dipatlisiso di tsweletse.”

taungdailynews@gmail.com

Kgetsi ya polao kgatlhanong le Molale e buseditswe morago

NEWS Leave a comment

Setshwantsho: Molatofadiwa wa polao, Simon Molale/Facebook

Ka OBAKENG MAJE

14 Diphalane 2024- Kgetsi ya polao kgatlhanong le lekawana la kwa motseng wa Lokgabeng, gaufi le Taung, e buseditswe morago go fitlha ka di 5 Ngwanatsele 2024. Simon Molale (22), o a latofadiwang ka go tlhaba le go bolaya lekgarebe la gagwe, Tshepiso Medichane (19), o tla nama a letile kwa ntlo-lefitshwana morago ga go ganelwa ka beile ke kgotlha-tshekelo ya Taung.

Go begwa fa Molale a ne a tlhabakaka Medichane le go mo bolaya, mme one a tshaba kwa lefelong la tiragalo fa a bona batho.

Fela, go begwa fa ba lelapa la gagwe ba ne ba mo tshwara le go mo isa kwa seteisheneng sa sepodisi sa Taung di ura morago ga tiragalo e.  

Kgabagare, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are Molale one a tshwarwa le go latofadiwa ka polao ya ga Medichane.

“Ke nnete molatofadiwa mo kgetsing e ya polao o tshwerwe. Molatofadiwa one a isiwa kwa seteisheneng sa sepodisi ke ba lelapa la gagwe.

“One a na le dikgobalo, mme o ile a amogelwa kwa bookelong jwa selegae. Molatofadiwa o lebagane le kgetsi ya polao, mme thipa e e dirisitsweng go bolaya moswi ene ya fitlhelwa kwa lefelong la tiragalo.”

taungdailynews@gmail.com