Ka OBAKENG MAJE
Mongwebi o a itsegeng mo Taung, ebile ele mong wa maloba wa lefelo le le rekisang bojalwa la The Meat Brothers, Tshwaro Mangwegape (41) o solofetswe go tlhagelela ka boripana kwa kgotlhatshekelo ya Taung mo letsatsing la gompieno.
Mangwegape, o latofadiwa ka go bolaya motshameki o diphatsa wa setlhopha sa kgwele ya dinao sa NWU Institute, Undivile “Vilo” Mdi (28) ga mmogo le go tlogela tsala ya gagwe ya tlhogo ya kgomo, Aobakwe Ernest Kokwe (33) ka dikgobalo tse di masisi.
Go begwa fa Mdi le Kokwe, ba ne ba le magareng ga batho ba ba neng ba etetse lefelo la The Meat Brothers Pub ka di 16 Sedimonthole 2023, go ya go ijesa monate fa gone go runya thuntso.
Go ya ka Mangwegape, Mdi le Kokwe, ba ne ba le gareng ga setlhotshwana se se neng sa tsena ka dikgoka kwa lefelo la gagwe le go senya dithoto. Morago ga tiragalo e, Mangwegape one a ineela kwa sepodising.
One a tshwarwa le go latofadiwa ka polao, ga mmogo le maiteko a polao. Go begwa fa Mangwegape a dirile kopo ya ditheetso tsa go ikuela kgatlhanong le go ganelwa ka beile mo kgetsing ya gagwe ya polao le maiteko a polao kwa kgotlha-tshekelo e kgolwane ya North West High Court kwa Mahikeng.
Kgabagare, mongwe wa baeteledipele wa baagi, Kgakololo Koji are: “Rona re batla gore molao o diragadiwe, mme le ene ona le ditshwanelo tseo. Fela, rona jaaaka re le baagi, re tla romela dikemedi tsa rona tse di tla netefatsang fa molao o diragadiwa.
“Re bone molaetsa wa gore monna o, o tsentse kopo ya ditheetso tsa beile mo kgetsing ya gagwe go tswa kwa motsading wa moswi.”
Mmueledi o diphatsa wa ga Mangwegape, go tswa kwa Isang Nakale Attorneys, Isang Nakale are ke nnete ba tsentse kopo ya ditheetso tsa go ikuela kgatlhanong le go ganelwa ka beile kwa North West High Court kwa Mahikeng.
TaungDailyNews 