Ka OBAKENG MAJE

Setheo sa Katiso sa temo-thuo, Taung College of Agriculture se tlile go rebolwa jaaka kholeje ya Thuto go simologa 1 Moranang 2023. Kitsiso eno, e dirilwe ke ba lefapha la Thuto e Kgolwane, Saense le Boitshimololedi (Department of High Education and Training).

Go ya ka rre Athenkosi Sibiza go tswa kwa kantorong ya molaodi-kakaretso kwa lefapheng la Thuto e Kgolwane, Saense le Boitshimololedi, are kitsiso e, e dirilwe go latela karolo 21 (3)(b)(i) ya molao wa thuto e kgolwane Nr 101 2997 jaaka o mametleletswe.

“Fano go neelanwa ka kitso gore ka 1 Moranang 2023, Tona ya Thuto e Kgolwane, Saense le Boitshimololedi o ikaelela go rebola Taung College of Agriculture e e kwa Taung jaaka kholeje ya Thuto go latela karolo 21(3)(a) ya molao wa thuto e kgolwane, Nr 102 wa 1997 jaaka e mametleletswe.

“Mabaka a thebolo e ya kholeje jaaka kholeje ya Thuto e Kgolwane ke gore, Sejule 4 ya Molaotheo wa Afrika Borwa e netefatsa gore thuto e kgolwane ke tshwanelego ya bosetshaba. Lefapha la thuto e kgolwane (DHET) le tlhamilwe go kgontsha neelano ka thuto e kgolwane e e momaganeng le go tlhalosiwa sentle, thuto ya ditiro mmogo le tlhabololo ya dikgono go dirisiwa ditheo tse di farologaneng tsa thuto morago ga sekolo,” Sibiza wa tlhalosa.

Gape Sibiza are, DHET, lefapha la temo-thuo mmogo le lefapha la ntshwafatso ya mafatshe le tlhabololo ya magae, a tsene go tumalano ya porothokholo go dirisana mo go mekamekaneng le maikarabelo a mokopanelwa a thuto le go dira mmogo go rebola dikholeje tsa setshaba tsa temo-thuo jaaka kholeje ya thuto e kgolwane eo e leng nngwe ya mefuta ya semolao e e akantsweng go molao wa thuto e kgolwane.

Are, kholeje ya thuto e kgolwane ke setheo se se ikemetseng se se dirang fa gare ga sebopego sa bobusi mo tlase ga lefapha la bosetshaba.

“Dikholeje tse, di tla letlelelwa go neelana ka ditifikheiti, dipoloma le digerata fa di fitlheletse ditlhokego tsa tumelelo ka khansele ya thuto e kgolwane, mme ditshwanelego tseno di kwadisitswe go letlhoneso la bosetshaba la ditshwanelego ke bolaodi jwa ditshwanelego jwa Afrika Borwa.

“Kitsiso eno e rebotswe go latela karolo 21(3)(b)(i) ya molao wa thuto e kgolwane, go gwetlha batho botlhe bao banang le kgatlhego go rulaganya ditlhagiso tse di kwadilweng tse di malebana le thebolo e e akantsweng,” Sibiza wa tlhalosa.

Kgabagare, ditlhagiso tsotlhe di tshwanetse go romelwa go kantoro ya molaodi-kakaretso, mme di lebisiwe go rre Athenkosi Sibiza ka emeile go Siziba.A@dhet.gov.za kgotsa ka tiriso nngwe fela e e amogelesegang semolao ya tlhaeletsano. Di tshwanetswe go fitlha go kantoro eno pele ga 16 Ferikgong 2023.

taungdailynews@gmail.com