Tag Archives: gaufi le Taung

Mosetsanyana wa kwa Modutung oneng a nyeletse mme a fitlhelwa a bolailwe, o fitlhilwe gompieno fa baagi ba le mo letsholong la go batla badiri ba tiragalo e

NEWS Leave a comment

Setshwantsho: Rethabile Molapo o neng a timetse le go bolawa o fitlhilwe  

Ka OBAKENG MAJE

20 Diphalane 2024- Ngwana wa dingwaga di le 11, oneng a fitlhelwa a bolailwe morago ga go timela kwa motseng wa Modutung, gaufi le Taung, o tlhotse a fitlhilwe mo letsatsing la gompieno. Go begwa fa Rethabile Molapo a ne a romiwa ke mmagwe go ya go tsaya seaparo sa kereke kwa gagabo ka Lamatlhatso o fetileng, mme one a thopiwa ke batho ba ba sa itsiweng.

Go ya ka dipego, batho bao, ba ile ba mo gogela kwa ntlung nngwe e e sa nneng batho, mme ba mo bolaya, pele ga ba ka mo fisa. Setopo sa ga Molapo se ile sa bonwa ke modisa mongwe o a ileng a bona go tuka molelo kwa ntlwana-boithusetso kwa ntlung eo.

Sebueledi sa sepodisi mo Bokone Bophirima, Brigadier Sabata Mokgwabone are: “Modisa o, o ile a leka go tima molelo mme one a bona setopo sa mosetsanyana o. O ile a bitsa bangwe ba baagi, ga mmogo le sepodisi. Go ile ga fitlhelwa setopo sa ga Molapo se se sheleng mohama.

“Kgetsi ya morago ga loso e ile ya bulwa ke sepodisi, mme go fitlha ga jaana, dipatlisiso di tsweletse,” Mokgwabone wa tlhalosa.     

Mmagwe Rethabile Molapo, eleng Keseneilwe Jackson are o utlwisitswe botlhoko ke tiragalo e. Jackson are badiri ba tiragalo e, ba setlhogo.

“Re bone ngwana bagolo, mme re ile ra tlhalosetswa gore ngwana ga nkitla a kgona go dula go fitlhelela dibeke tse di tlang, gonne one a setse a senyegile. Ke ka moo re mo fitlhang gompieno. Mme re ikuela go baagi go tlisa dithuso dingwe le dingwe tse ba tla di kgonang.

“Tota kgang e ya go bolawa ga ngwanake ga ya ntshwara sentle. Ke fela gore fa o le motsadi, o tshwanetse gore o eme ka dinao o lwanele ngwana wa gago,” Jackson wa tlhalosa.

Jackson are o botlhoko mo pelong gore ngwana o kana a ka bolawa setlhogo jaana. Are bogolo badiri ba tiragalo e, ba kabe ba tshotse ene.

“Tota o ka se itse gore ke eng tiragalo e, e diragetse mme mo lefatsheng ga nke motho a itse gore manaba a gagwe ke bo mang.

“Se ke se itseng ke gore fa o le motho o ka se tshele ntle le dira. Le Jesu Kreste le ene o ile a rekisiwa ke ba a neng a ja le bone mo sejaneng,” Jackson wa tlhalosa.

Moeteledipele wa baagi, Kenneth Jampane are: “Matsapa ke gore, ga re ise re nne le netefaletso ya gore re ka shupa mang ka monona, mme re tshwere bopaki jo re tla bo bayang mo tafoleng. Fela jaaka ke ne ke buile mo malobeng kere tiro e tshwana le e, e tsenyeleditseng botegeniki jwa boloi, go bonagala gore go setse go eme fela jalo.

“Gona le botegeniki jwa boloi jo bo dirisitsweng gore go nne le tiragalo e ya gore ngwana a tsewe. Tota re bua fela jana, mme ga nkitla re upulola dilo tse dingwe tse re di tsayang gore di bosisi thata gore di ka tswela mo setshabeng,” Jampane wa tlhalosa.

Jampane are mme tse dingwe tsa tsone ke dintlha dingwe tse go tshwanetswe gore di tsewe semolao go fitlhelela tharabololo. Jampane are o sentse a ipoeletsa gore ba tshwanetse go ka kopana jaaka baagi, mme ba dire mmogo, gonne se se diragalang se dirwa ke bangwe ba baagi.

Kgabagare, go begwa fa baagi batswile letsholo le go fisa matlo mangwe a bangwe ba batho ba ba ba belaelang fa ba amega mo tiragalong e ya go thopiwa ga ngwana.

taungdailynews@gmail.com

‘Monnamogolo o teketilwe a shupilwe ka dithunya’ 

NEWS Leave a comment

Setshwantsho: Monna wa kwa Dikhuting, Christopher More 

Ka OBAKENG MAJE 

16 Diphalane 2024- Monnamogolo wa kwa motseng wa Dikhuting, gaufi le Taung, are o tshelela mo letshogong, mme ga itse gore a lebe kae. Christopher More (70), are go na le banna ba ba itirileng kgogomodumo mo botshelo jwa gagwe, mme sepodisi ga se dire sepe. 

“Ke ile ka teketiwa ke banna ba ngwaga o fetileng, ba be ba sala ba fisa ntlo le sejanaga saka. Ke ile ka hudugelwa kwa Tlapeng, gape ba nteketile ba ntshupile ka dithunya. 

“Re ne re tsenetse kopano ya morafe kwa kgotlha, mme go ile ga fitlha moruti o a ileng a bula ka thapelo. Kopano ene ele mabapi le matikiri a epiwang motseng,” More wa tlhalosa. 

Are kwa kopanong eo, go ile ga nna le dikgoga-kgogano, mme ba ile ba gamarega fa ba bona moruti a tlogela kopano, mme a apara diaparo tsa tshireletso (bullet proof). More are moruti o ile a tsena mo sejanageng sa gagwe a tsamaya. 

“Rona re ile ra tsamaya, gonne nna ke ne ke ikutlwa tlala. Erile fa re sentse rele mo tseleng, re ne ra bona dijanaga di le pedi di feta ka lobelo, mme di lebile kwa kopano eneng e tshwaretswe teng. 

“Fela pele ga re tsena kwa re dulang teng, dijanaga tseo di ile tsa fitlha le go emisa fa thoko ga rona. Re ile ra makadiwa ke go bona banna ba le bane, ga mmogo le moruti, ba fologa ka dithunya. Ba ile ba re tshwara le go re teketa ba re shupile ka dithunya,” More wa tlhalosa. 

Are ene ya re morago ga moo, ba ile ba tsena mo dijanageng tsa bone ba tshaba. More are mme moragonyana, go ile ga fitlha sejanaga sa sepodisi. 

“Ke ile ka ba lotlegela se se diragetseng. Re ne ra tsena mo sejanageng sa sepodisi, le go leka go lelekisa dijanaga tseo, mme ene ya re fa re tsena kwa motseng wa Manthe, re ile ra bolelelwa fa dijanaga tseo di ile kwa kgosing. 

“Re ile ra leta le mapodisi kwa tseleng, mme moragonyana, re ile ra bona dijanaga tseo di tswa kwa kgosing le go leba kwa motseng wa Dikhuting. Mapodisi a ile are a leka go di lelekisa, fela go ile ga retela,” More wa tlhalosa. 

Are go ile ga tlhaga sejanaga se sengwe kwa morago, mme se ile sa kgoreletsa sejanaga sa sepodisi gore se se tshware dijanaga tse ba neng ba di beile maroa. More are, sepodisi se ile sa itlhoboga fa se tsena ka Dikhuting. 

Kgabagare, sebueledi sa sepodisi mo Bokone Bophrima, Colonel Adele Myburgh are: “Sepodisi se butse kgetsi ya go teketa ka maikaelelo a go ntsha dikgobalo. Fela, ga gona ope o tshwerweng go fitlha ga jaana, mme dipatlisiso di tsweletse.”

taungdailynews@gmail.com

Kgetsi ya polao kgatlhanong le Molale e buseditswe morago

NEWS Leave a comment

Setshwantsho: Molatofadiwa wa polao, Simon Molale/Facebook

Ka OBAKENG MAJE

14 Diphalane 2024- Kgetsi ya polao kgatlhanong le lekawana la kwa motseng wa Lokgabeng, gaufi le Taung, e buseditswe morago go fitlha ka di 5 Ngwanatsele 2024. Simon Molale (22), o a latofadiwang ka go tlhaba le go bolaya lekgarebe la gagwe, Tshepiso Medichane (19), o tla nama a letile kwa ntlo-lefitshwana morago ga go ganelwa ka beile ke kgotlha-tshekelo ya Taung.

Go begwa fa Molale a ne a tlhabakaka Medichane le go mo bolaya, mme one a tshaba kwa lefelong la tiragalo fa a bona batho.

Fela, go begwa fa ba lelapa la gagwe ba ne ba mo tshwara le go mo isa kwa seteisheneng sa sepodisi sa Taung di ura morago ga tiragalo e.  

Kgabagare, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are Molale one a tshwarwa le go latofadiwa ka polao ya ga Medichane.

“Ke nnete molatofadiwa mo kgetsing e ya polao o tshwerwe. Molatofadiwa one a isiwa kwa seteisheneng sa sepodisi ke ba lelapa la gagwe.

“One a na le dikgobalo, mme o ile a amogelwa kwa bookelong jwa selegae. Molatofadiwa o lebagane le kgetsi ya polao, mme thipa e e dirisitsweng go bolaya moswi ene ya fitlhelwa kwa lefelong la tiragalo.”

taungdailynews@gmail.com

Molekgotlha o latofadiwa ka go neela ba lelapa la kwa ga bo mosadi wa gagwe diporojeke 

NEWS Leave a comment

  

Setshwantsho: Molekgotlha, Kagiso Pudule

Ka OBAKENG MAJE 

8 Diphalane 2024- Baagi ba kwa motseng wa Dryharts, gaufi le Taung, ba latofatsa molekgotlha wa bone, Kagiso Pudule ka go sa nne le tirisano-mmogo. Ba re ebile Pudule wa ungwelwa mo diporojekeng tsa baagi, ga mmogo le ba kwa bogogadie. 

Go begwa fa go ile ga nna le porojeke ya mantlwana-boithusetso kwa motseng wa Dryharts, fela Pudule le ene o ungwetswe, le mororo a direla masepala o mogolwane wa Taung. Baagi ba, ba latofaditse Pudule ka go ba ikgatholosa, fela o neela ba kwa bogogadie le ditsala tsa gagwe ke porojeke tsa motse. 

Mosadimogolo Getrude Ngithi (64) are ntlwana-boithusetso ya gagwe e wele, mme o lobaka a itsisitse Pudule. Ngithi are fela ga go tle gore a agelwe ntlwana-boithusetso.  

“Ke tshaba le go e dirisa, gonne ke tla wela mo teng. Ke dula le bana, mme re patelesega gore re ithusetse kwa patlelong. 

“Ke lebaka le le telele ke itsisitse Pudule gore ntlwana-boithusetso yame e wele, fela ga ke bone thuso. Se ke se itseng ke gore, ntlwana-boithusetso yame e tswile gore e agiwe, mme ga ke itse gore e tshwerwe ke eng,” Ngithi wa tlhalosa. 

O mongwe wa baagi le ene o lela selelo sa ga Ragele. Molemoeng Modise le ene o latofatsa Pudule ka go ikaba ka letlhakuri fa a rebola ditirelo. 

“Thebolo ya ditirelo mo Dryharts ke tlhoba-boroko. Erile fa porojeke ya mantlwana-boithusetso e tsena mo motseng, re ne re ikwadisitse. Fela, Pudule o direla lelapa le le lengwe fela, eleng la kwa ga bo mosadi wa gagwe. 

“Rona ba bangwe ra a tlodiwa, mme fela fa o bua le molekgotlha are o tla tla. Kgang eo ga e re tseye sentle, gonne le fa ditirelo di tla mo motseng, o neela batho ba gagwe ditirelo ntle le baagi,” Modise. 

Mongwe wa kemedi ya baagi, Philemon Motsewabone are: “Go bua nnete fela, ga gona tirisano-mmogo magareng ga kemedi ya baagi (ward committee) le Pudule. Re ile ra kwala makwalo re kopa mmusa-kgotlha wa masepala, Grace Moipolai go tla go tsereganya kgatlhanong le maitshwaro a makgasa a ga Pudule. 

“Selo seo se re tshwenya thata, mme fa go sena botsitso magareng ga molekgotlha le kemedi ya baagi, seo se tlile go ama thata ditirelo mo motseng. Jaanong, ga ese re bone karabo go tswa go Moipolai, mme re tshepa fa a ka tla ka tharabololo.”

Kgabagare, Pudule o a neng a angwa fela ke tse a neng a di apereng are, baagi ga ba na dingongorego. Are batho ba ba ntshitseng dingongorego ke maloko a lekoko la sepolotiki la EFF, mme ene ga dire le batho ba go tshwana le bao. 

taungdailynews@gmail.com

Kgetsi ya petelelo kgatlhanong le motaki o a itsegeng e boela kgotlha-tshekelo

NEWS Leave a comment

Setshwantsho: Motaki o a itsegeng, Kagiso Clifford Mogokotleng/Facebook

Ka OBAKENG MAJE

3 Diphalane 2024- Kgetsi ya petelelo kgatlhanong le motaki o a itsegeng wa kwa motseng wa Veertien, gaufi le Taung, Clifford Kagiso Mogokotleng (42), e boela kwa kgotlha-tshekelo. Mogokotleng yo o reboletswe beile ya R500 ke kgotlha-tshekelo ya Taung, one a tshwarwa mabapi le ditatofatso tsa petelelo.

Go begwa fa ka di 7 Diphalane 2023, Mogokotleng a ile a betelela lekgarebe la dingwaga di le 17 kwa gagabo. Go ya ka tshedimosetso ya kwa kgotlha-tshekelo, lekgarebe le, le dula kwa Kimberly kwa profenseng ya Northern Cape, mme ba ne ba tlile phitlhong ya mongwe wa losika mono Taung, ga mmogo le mmagwe ka motsi wa tiragalo.

Go begwa fa mmagwe motswa-setlhabelo, a ne a na le dikamano tsa marato le mogoloe Mogokotleng. Go ya ka motaki o, ga ana dikgetsi tse dingwe tse di fetileng, ga mmogo le lekwalo la mosepele (passport).

Bosekisi jwa National Prosecuting Authority (NPA), ga bowa ema kgatlhanong le kopo eno ya beile ya molatofadiwa. Bosekisi bo tlhalositse fa bo sa belaele fa Mogokotleng a ka itshona-tshona nko mo di patlisisong tsa kgetsi e, gape motswa-setlhabelo o dula kwa Kimberly. 

Bosekisi bo tlhalosistse gape fa paki enngwe mo kgetsing e, e dula kwa porofenseng ya Limpopo.

taungdailynews@gmail.com

Banna ba le supa ba ba latofadiwang ka go fisa matlo a le mararo le sejanaga kwa Manthe ga ba bonwa molato

NEWS Leave a comment

Setshwantsho: Banna ba baneng ba latofadiwa ka go fisa matlo a le mararo le go thuba kwa thaveneng

By OBAKENG MAJE

3 Diphalane 2024- Banna ba le supa ba kwa motseng wa Manthe, gaufi le Taung, ba re ba itumetse thata morago ga gore kgotlha-tshekelo ya Taung e se ba bone molato mo kgetsing ya go fisa le go thuba.

Naledi ya maloba ya kgwele ya dinao, Odiseng “Teenage” Komane (43), mokatisi o diphatsa wa kgwele ya dinao, Obakeng “Prosto” Mogabale (48), Mothusi Motimeng, Pretty “Zero” Masibelele (38), Ali Sakiele (52), Ontiretse Patrick Gosenyegang (40) ga mmogo le motshwara-dino wa maloba o a itsegeng wa setlhopa sa Mega Stars FC, Katlego “Makgasa” Tikane (34), ba ile batshwarwa le go latofadiwa ka go fisa matlo a le mararo a rra Katong le go thuba kwa lefelong la bone le le rekisang nnotagi, kwa Disoufeng.

Banna ba, gape ba lotofadiwa ka go ja ka molelo sejanaga sa ga mmeteledi, Bakang Katong, yo gape a latofadiwang ka polao. Go begwa fa ka di 2 Motsheganong 2022, baagi ba motse wa Manthe, ba ne ba tswa letsholo le go fisa matlo a le mabedi aga Bakang Katong, ga mmogo le sejanaga sa gagwe, mme ba fisa gape le ntlo ya morwa-rragwe, Phenyo Katong.

Se se tla morago ga gore ba ba latofatse ka go bolaya Thabiso “W” Mothibedi (35). Go begwa fa ba rra Katong, ba ne ba latofatsa Mothibedi ka go ba utswetswa madi a kanang ka R20 000 le motsoko wa boleng jwa R600.

Magistrata Buti Zulu are le fa a dumela dipego go tswa go dipaki tsa puso ga mmogo le tsa balatofadiwa, bosekise bo paletswe ke go neelana ka bopaki jo bo kwenneng kgatlhanong le balatofadiwa. Zulu are dipaki dingwe tsa puso, di tlhalositse fa ba ne ba le kwa thabeng fa ba bona balatofadiwa ba fisa.

“Fela, sekgala se ba supang fa ba ne ba eme kwa go sone, se kgakajana mme ke ipotsa gore ba bone jang gore batho ba ba fisitseg ke balatofadiwa, gonne batho ba ne ba le bantsi ebile go begwa fa go ne go opelwa dipina tsa mogwanto.

“Paki enngwe, Samuel Gaeadingwe o tlhalositse fa a bone bangwe ba balatofadiwa fa ba ne ba thuba kwa thaveneng ya gagwe, fela are bangwe ba batho ba baneng ba utswa, ga ba tshwarwa,” Zulu wa tlhalosa.

Gape Zulu are, Phenyo Katong, o tlhalosisitse fa a ne a romelelwa melaetsa ke mongwe wa batho ba ba boneng ka matlho, mme ene o bidiwa Zabs. Zulu are, fela bosekise kgotsa sepodisi se paletswe ke go tlisa Zabs mo pele ga lekgotlha go tla go neelana ka bopaki.

“Se sengwe se se makatsang ke gore molato o, o diragetsa ka di 2 Motsheganong 2022, fela balatofadiwa ba tshwerwe dikgwedi morago ga moo. Se ke se boleletsweng ke gore, dipaki di ne di tshaba go neelana ka bopaki ka nako eo, gonne ba ne ba boifa.

“Jaanong, pheleletso ba feleleditse ba neelane ka bopaki. Potso ke gore ke eng se se ntshitseng letshogo mo go bone. Gape, gona le dipaki tse dingwe tsa puso tsa rra Seetelo,” Zulu wa tlhalosa.

Zulu are banna ba, ba dula kwa ga Katong mme ba unngwelwa. Zulu are jaanong ga go makatse go bona ele dipaki tsa bangongoregi.

“Jaanong, ga ke bone banna ba molato, gonne bosekisi bo paletswe ke go neelana ka bopaki jo bo tiileng kgatlhanong le bone,” Zulu wa tlhalosa.

Kgabagare, mongwe wa banna ba baneng ba latofadiwa, Ontiretse Patrick Gosenyegang are: “Tota bagaetsho, re lobaka re goga mo kgetsing e, mme pheleletsong re ile ra feleletsa re fentse. Molato o, ga ona bopaki kgatlhanong le rona, mme ke rata thata go leboga baagi ba motse wa Manthe go re ema nokeng.

“Ba ile ba re thusa thata ka go ntsha madi go re thusa go ka duela mmueledi. Jaanong, re rata go ba leboga mme re re lekamoso-lekamoso. Re ka rata thata gape go leboga bosiamisi gore bo be bo sa tsaya letlhakuri.”

O mongwe wa banna ba baneng ba latofadiwa, Katlego Tikane, are katlholo mo kgetsing e, e bontsha fa bosiamisi bo diragaditswe.

“Re itumetse thata mme ke kgale re tlhalosa gore ga re itse sepe ka ditatofatso tse. Ke leboga baagi ba Manthe, mme ke rata go akgola bosiamisi gore bo be bo sa tsaya letlhakuri.

“Re leboga thata kemo-nokeng go tswa go batho botlhe, mme re setse re lebagane le kgetsi ya banna ba ba latofadiwang ka go bolaya nkgonne, Thabiso Mothibedi, mme re batla go bona bosiamisi bo diragadiwa,” Tikane wa tlhalosa.

taungdailynews@gmail.com

Kago ya Multi-Purpose Centre ya boleng jwa R27m e butswe semmuso

NEWS Leave a comment

Setshwantsho: Mokhuduthamaga wa Botaki, Setso, Metshameko ga mmogo le Tlhabololo, Collen Maine ga mmogo le Kgosi Khanana Nnyoko Motlhabane  

Ka OBAKENG MAJE

30 Lwetse 2024- Mokhuduthamaga wa Botaki, Setso, Metshameko ga mmogo le Tlhabololo, Collen Maine o neelane ka kago ya Multi-Purpose Centre go baagi kwa motseng wa Manthe, gaufi le Taung, mo letsatsing la Labone. Maine are kago e, e sale e agiwa dingwaga di le 12 tse di fetileng, mme e jetse puso madi a kanang ka R27 million.  

Are jaaka lefapha, ba itumeletse go fediwa ga kago e, mme go mo diatleng tsa baagi gore ba e tlhokomele. Maine are jaanong kago e, ba e neetse masepala o mogolwane wa Taung, mme ba tlile go dula ba tla go lekola seemo sa yone nako le nako.

“Re batlang basha ba rona ba tswe ko mebileng. Ba tshwanetse gore ba dirise kago e go ka ikatisa. Fela jaaka Kgosi a buile, re tlile go aga lefelo la go sapa (swimming pool), gore bana ba ithute go sapa.

“Re rekile ditshipi tsa go ikatisa tse di tshwanang le tsa bo Virgin Active, mme ga jaana re di beile kwa Mmabana Taung. Go na le kago e e tshwanetsweng gore re e agiwe fa thoko ga kago e, mme ke yone e e tlileng go tsenya ditshipi tseo mo teng. Seo se tlile go netefatsha fa kago e, e fetoga lefelo la go ikatisa la ma nnete,” Maine wa tlhalosa.

Are jaanong, ditshipi tseo di tla nama di dutse kwa Mmabana Taung, mme mo ngwageng o tlang wa ditshelete, kago eo e tlile go agiwa gore ditshipi tseo di tlisiwe fa. Maine are seo se tlile go thusa basha ba mo metse-selegae go ka ikatisa.

“Ke boleletswe gore bontsi jwa basha ba ba tswang mo magaeng, ba leba kwa ditoropong go tsenela metshameko e farologaneng, gonne ba ngokelwa ke ditheo tse di farologaneng tsa go ikatisa.

“Re ikopela thata go baagi ba rona gore kago e, ke ya bone. Mme fa ba na le matshwenyego, ba se e fise. Kago e e tshwanetse gore e ba tswele mosola, mme ba bue le mafapha a maleba go ntsha matshwenyego a bone,” Maine wa tlhalosa.

Are puso e mo tseleng ya go aga Afrika Borwa o botokwa, fela go tlile go tsamaya go nna le dikgwetlho. Maine are mme dikgwetlho tseo, di tshwanetswe go rarabololwa ntle le go fisa.

“Bana ba Isiraele fa ba ne ba tswa kwa Egepeto go leba kwa Kanana, ba tsamaile ba nna le dikgwetlho mo tseleng. Fela, ba ile ba nna le tshepo ya gore batla fitlhelela kwa ba yang kwa teng.

“Jaanaong, le rona re kopa baagi gore fa ba na le matshwenyego, ba se fise dikago gonne madi a puso e nang le one a mannye, mme re tshwantse gore re a kgaoganye gore re kgone go aga dikago tsa mofuta o kwa mafelong a mangwe,” Maine wa tlhalosa.

Maine are metshameko le botaki, ke maikarabelo a bone mo porofenseng ya Bokone Bophirima, mme ba dirisana le Lefapha la Thuto le dimasepala.

Kgabagare, Kgosi Khanana Nnyoko Motlhabane wa Batlhaping Baga Maidi, one a gana go tsenela di potsolotso (interviews) le Taung DailyNews, mme one a bolelela babega-dikgang ba rona gore ba tswe mo go ene.

taungdailynews@gmail.com

 

Seipone o kailwe jaaka motho o neng a na le lerato ebile a le boikobo

NEWS Leave a comment

Setshwantsho: Moswi Collen Modiriemang Seipone

Ka OBAKENG MAJE

29 Lwetse 2024- Monna oneng a begwa a nyeletse, Collen Modiriemang Seipone (35), wa kwa motseng wa Kolong, gaufi le Taung, o fitlhilwe kwa dirapeng tsa baswi teng kwa Kolong ka Lamatlhatso. Bontsi jwa ditsala tsa gagwe ga mmogo le ba dira-mmogo, ba mo tlhalositse fa ene ele motho oneng a na le boikobo, ebile a le lerato.

Moruti Sylvester Aiseng are batho ga batla go dulela ruri mo lefatsheng, fela botshelo jwa motho bo itsiwe ke Modimo. Aiseng are batho ba ka dira tsotlhe tsa lefatshe, ba je monate, fela molaodi wa botshelo ke Modimo.

“Jaanong are se tsamaye ka kakabalo, mme re tlhaloganye gore botshelo re bo neilwe ke Modimo, ebile ke ene o tla bo khutlisang. Akere fa ngwana a tla mo lefatsheng o tla a kuparetse? Ke rata batho ba tlhaloganye lefoko la Modimo.

“Batho ba lefatshe ba ratile monate go feta lefoko la Modimo. Setlogolo sa ka se ile sa kopana le matsogo a sa siama. Matsogo ao, a ile a mo nyeletsa ebile re ile ra dula re maketse. Fela, re ile ra kopa gore Morena gore are arabe,” Aiseng wa tlhalosa.

Mongwe wa dibue ka letsatsi la tirelo matshidiso, Kgalolo Koji are Seipone one a sa tshwane le batho ba bangwe. Koji are one a itse Seipone, ga mmogo le metsamao ya gagwe.

“Lefatshe le kgona go go tlhoa, ba sa itse gore ba go tlhoela eng. Ke bua ka motho o eneng ele podile mo bathung ba bagwe, mme fa o botsa lebaka, ga gona karabo.

“Ke bua ka motho o montsho ka mmala, mme a le mosesane batho ba ipotsa gore go baneng a sa none. Batho ba kwala, mme ke bone le ngwana mongwe o neng a paletswe ke mophato wa marematlou, a beile setshwantsho sa ga Collen, mme ke ipotsa gore go baneng ane sa beye le setshwantsho sa gagwe sa marematlou,” Koji wa tlhalosa.

Are batho ba rata dilo tsa batho. Koji are ba lelapa la rra Seipone ba se ikobonye gore ba be ba na le ngwana o neng a bidiwang Collen.

“Ke itumelela selo se le sengwe fela, gonne Collen one a sena sepe le motho o sa itsholelang jaaka nna jaana. Fela one a tlhoilwe ke batho ba ba senang sepe jaaka nna jaana.

“Botlhe ba ba tsholotseng madi a gagwe, le bone ka letsatsi lengwe, madi a bone a tla latswa ke ditsha. Collen ene ele lekau, mme ene ere ka nako tse dingwe ha ke kopana le ene ko Ditshilong, ke be ke mmotsa gore o tswa kae, a be are: “kena le tsoga re omane ha go dume hao,” Koji wa tlhalosa.

Tikane Motsage are: “Collen ene ele mmotlana, mme re godile mmogo. Ke gopola ha kene ke kgaogana le ene, gone gole di 21, mme ke ene oneng a ntseisa dibeke. Ene ere fa a le ko Potchefstroom, one a kgona go nketela.

“Ka letsatsi le aneng a nyelela ka lone, one aga metsi mme ka Laboraro, ke fa ke utlwa gotwe o nyeletse. Go ne go se monate. Ke latlhegetswe ke nnake.”

Kgabagare, go ne ga utlwala go gelebetega ga modumo wa dithunya kwa mabitleng morago ga phitlho.

taungdailynews@gmail.com

Monna o bolailwe ka go tlhabiwa ka thipa kwa Nommer 1

NEWS Leave a comment

Setshwantsho: Moswi, Letlhogonolo Bogosi 

Ka OBAKENG MAJE

Monna wa dingwaga di le 22 wa kwa motseng wa Nommer 1, gaufi le Taung, o tshwerwe go latela polao ya ga Letlhogonolo Bogosi wa dingwaga di le 33. Go begwa fa go ile ga runya ntwa kwa mmileng kwa Nommer 1 mo letsatsing la Lamatlhatso, mme Bogosi o ile a leka go thiba ntwa eo.

Fela go begwa fa mmelaelwa a ile a tlhaba Bogosi ka thipa mo sehubeng, mme a mmolaya ka gangwe.

Sebueledi sa sepodisi mo Bokone Bophirima, Colonel Adele Myburgh are, sepodisi se ile sa bilediwa kwa lefelong la tiragalo. Myburgh are fela ba ile ba fitlhela setopo sa ga Bogosi.

“Kgetsi ya polao e ile ya bulwa kgatlhanong le mmelaelwa, mme ene o ile a tshwarwa. One a latofadiwa ka polao.

“Mmelaelwa o solofetswe go ka shadikanya matlho kwa kgotlha-tshekelo ya Taung mo letsatsing la Mosupulogo, fa dipatlisiso mo kgetsing di tswelela,” Myburgh wa tlhalosa.

taungdailynews@gmail.com

Lelapa la ga Moabi le kopa thuso morago ga go shelwa ke ntlo 

NEWS Leave a comment

Setshwantsho: Ntlo ya diphaphosi di le tharo e lakaitswe ke molelo

Ka OBAKENG MAJE 

23 Lwetse 2024- Ba lelapa la ga Moabi kwa motseng wa Myra, gaufi le Taung, ba ikuela go mongwe le mongwe o ka thusang go ka tsenya letsogo. Se, se tla morago ga gore ntlo ya bone ya diphaphosi di le tharo, e jewe ke molelo. 

Go ya ka Seitebaleng Moabi, ba ne ba robetse, mme ba ile ba tsosiwa ke kgabo ya molelo mo gare ga bosigo ka di 8 Lwetse 2024. Moabi are, o ile a tshoga thata go bona ntlo ya bone e lakailwa ke molelo.

“Ke ile ka tsosa bana, mme ra bula letlhaba-phefo la phaphosing e ke neng ke robetse mo go yone. Re ile ra tswa ka letlhaba-phefo leo, gonne go ne go sena kwa re ka tswa teng ka ntlheng ya gore molelo one o setse o lakaila dikgoro. 

“Ka nako eo, molelo one o setse o taboga ka lebelo le le kwa godimo, mme re ile ra siela kwa ntlung ya ga ausi waka ga mmogo le bana. Re ile ra fitlha ra tsosa bana ba ga ausi waka le go ba lotlegela ka mathata are kopaneng le one,” Moabi wa tlhalosa. 

Are, ba ile ba leba kwa ntlung, le go tsosa batho ba bangwe mo motseng go tla go ba thusa go tima molelo. Fela Moabi are, ka maswabi, ga ba ka ba kgona go o tima, gonne one o setse o ile magoletsa. 

“Re shetswe ke makwalo itshupo, bana bone ba shetswe ke dibuka tsa sekolo ga mmogo le diaparo tsa sekolo (uniform). Fela se se botlhokwa thata se ke tla kopang go thusiwa ka sone go fitisa, ke diaparo tsa sekolo (uniform) tsa bana. 

“Ngwanake o dira Grade 11, mme ene o tsena kwa Maatla Secondary School kwa Pudimoe, fa o mongwe a dira Grade 8 kwa Thakung Secondary School, teng mo Myra,” Moabi wa tlhalosa. 

Kgabagare, modulasetilo wa bosetshaba wa lekoko la sepolotiki la F4SD, Mika Moeti are: “Ke gorogile kwa lelapeng leo, mme seemo sa teng ga se itumedise. Diaparo ga mmogo le dibuka tsa bana ba sekolo dishele lore-lore. 

“Ke nagana gore lelapa le, le tlhoka thuso. Jaanong, re ile ra buisana gape le ba Lefapha la Katlatlelo-Loago, mme ba tshepisitse gore ba tla romela kemedi ya bone go tla go thoba maloko a lelapa le maikutlo.”

Moeti are gape o buile le molekgotlha wa bone, fela o ba tlhaloseditse fa masepala o mogolwane wa Taung o se o tsiboge. Are ba ikuela go mongwe le mongwe o ka thusang lelapa le, go ka tsenya letsogo.  

taungdailynews@gmail.com