Ka OBAKENG MAJE
Monna o latofadiwang ka ditlolo molao di le pedi tsa kgothoso ka maikaelelo a go ntsha dikgobalo tse di tseneletseng, ga mmogo le ditlolomolao di le pedi tsa go thopa ka dikgoka, Modisaotsile Lebitse (51), o tlhotse a reboletswe beile e kanang ka R500 ke kgotlhatshekelo ya Taung mo letsatsing la gompieno.
Go begwa fa Lebitse, yo eleng moeteledipele wa mokgatlho wa Re Aga Taung Civic Organisation, ga mmogo le banna bangwe ba babedi, ba ile ba kgorogela monna mongwe, Panki Mongwaketsi le go mo thopa ka dikgoka. Go begwa fa tiragalong e, e diragetse kwa Ext 6 mo Taung ka di 11 Seetebosigo 2017.
Go ya ka mmatlisisi mo kgetsing e, Boingotlo Tokwe, go begwa fa banna ba, ba ile ba tsaya Mokgwaketsi le go leba le ene kwa ga gagwe kwa Hartswater, kwa ba ileng ba mo pateletsa go ntsha madi a seatleng ga mmogo le sethunya.
Fela, Tokwe o boleletse kgotlhatshekelo fa go ile ga utswiwa tshupanako, madi a seatleng, ga mmogo le megala ya letheka ele mebedi. Are go begwa fa banna ba, ba ile ba tlogela mongongoregi kwa motseng wa Mokassa 1, gaufi le Taung morago ga tiragalo le go tlogela sejanaga sa gagwe kwa Ext 7 mono Taung.
“Re ile ra golaganya molatofadiwa ka dikgatiso tsa menwana tse di bonweng mo sejanageng. Fela, baitsanape ba dikgatiso tsa menwana, ga baka ba tlhalosa gore dikgatiso tsa menwana ya ga Lebitse di bonwe fa kae mo sejanageng sa mongongoregi.
“Jaanong, nna ga ke kgatlhanong le gore molatofadiwa a ka rebolelwa beile. Fa ke ne ke mo tshwara, one a na le tirisano mmogo. Ebile, ga ke tshepe fa a ka se tle tshekong ya kgetsi e. Dikgatiso tsa menwana ke tsone fela bopaki jo re nang le bone kgatlhanong le molatofadiwa,” Tokwe wa tlhalosa.
Gape Tokwe o tlhalositse fa Lebitse a tsena sekolo, mme a ipaaknyetsa go kwala ditlhatlhobo tsa gagwe tsa marematlou.
Bosekise le bone ga boaka jwa nna le bothata mo go rebolelweng beile ga ga Lebitse. Magistrata Thabo Letsapa, one a rebolela Lebitse beile ya R500 mo letsatsing la gompieno, mme dipatlisiso mo kgetsing e, di a tswelela.
Kgetsi ene ya busediwa morago go fitlha ka di 29 Moranang 2024, mme babelaelwa ba bangwe ga se ba tshwarwe.
Kgabagare, mmueledi wa ga Lebitse, o tlhalositse fa Lebitse ele motho o ratang go kopa go pegiwa (hiking) dijanaga fa a ya mafelong a tshwana le Pudimoe, Taung ga mmogo le Hartswater. Are gongwe dikgatiso tsa menwana ya ga Lebitse di ka tswa di fitlhile jalo kwa sejanageng sa ga Mongwaketsi.
TaungDailyNews 