Ka REGINALD KANYANE
20 Moranang 2026 – Monna wa dingwaga di le 27 o atlholetswe dingwaga di le 15 kwa ntlo lefitshwana morago ga petelelo. Mmeteledi, Thulani Mathuka o ile a tshwarwa morago ga go betelela mosadi wa dingwaga di le 41.
Sebueledi sa sepodisi mono Bokone Bophirima, mokaptein Majang Skalkie are tiragalo e, ke ya di 30 Sedimonthole 2024 ka ura ya 9:55 mo bosigong. Skalkie are go begwa fa mosadi o, a ne a lebile kwa legae la gagwe go tswa kwa ntlung e rekisang nnotagi fa a ne a kgorogelwa ke molatofadiwa.
“Go begwa fa Mathuka a ile a mo gogela kwa mogwafatshe wa gagwe kwa a ileng a mo betelela gone. Mathuka o ile a tshwarwa fa kgwedi ya Sedimonthole e tlhola matsatsi a le 31 ka ngwaga wa 2024.
“Fa kgwedi ya Moranang 2026 e ne e tlhola matsatsi a le 14, Mathuka o ile a tlhagelela kwa kgotlhatshekelo ya sedika ya Koster kwa a ileng a bonwa molato le go atlholelwa dingwaga di le 15 gone,” Skalkie wa tlhalosa.
Kgabagare, mokomishinara sepodisi wa nama-o-tshwere mono Bokone Bophirima, Major General (Dr) Ryno Naidoo, o ile a akgola mmatlisisi wa kgetsi, Detective Constable Beauty Mogapi. Naidoo are sepodisi se tlile go tswelela ka go bolotsa ntwa kgatlhanong le tshotlakako ya bong.
The Guardian 