Tag Archives: ke kgotlhatshekelo ya Taung. Se

Kgetsi ya polao kgatlhanong le banna ba le bane ba kwa Manthe e buseditswe morago

NEWS Leave a comment

Setshwantsho: Kotapini Maphasane, Charles Sakiele le Mompati Mocumi/Facebook

Ka OBAKENG MAJE

19 Mopitlwe 2026- Kgetsi ya polao kgatlhanong le banna ba le bane ba kwa motseng wa Manthe, gaufi le Taung, e buseditswe morago go fitlha 23 Mopitlwe 2026, ke kgotlhatshekelo ya Taung. Se, ke go neela balatofadiwa tshono ya go dira kopo ya semmuso ya beile.

Balatofadiwa eleng, Kotapini Maphasane, Charles Sakiele, Mashome Katong ga mmogo le Mompati Mocumi, ba ne ba tshwarwa le go latofadiwa ka go bolaya monna wa kwa motseng wa Mothanthanyaneng, gone mono Taung, eleng Robert Rapelang Molale, morago ga go mo latofatsa ka bogodu jwa leruo.  

Go begwa fa Molale a ile a teketiwa le go tsenngwa mo metsing kwa molapong. Go begwa fa Molale a ile a tlhokafala morago ga moo.

Tiragalo e, ke ya ngwaga o o fetileng. Balatofadiwa ba tshwerwe mo letsatsing la maabane ke lephata la matseka la sepodisi kwa motseng wa Manthe.

Sebueledi sa sepodisi mono porofenseng ya Bokone Bophirima, mokaptein Majang Skalkie are babelaelwa ba, ba lebagane le kgetsi ya polao.

Kgabagare, go begwa fa go sentse go tlile go tshwarwa babelaelwa ba bangwe gape mabapi le tiragalo e.

taungdailynews@gmail.com

Kgetsi ya polao ya kwa Diplankeng e buseditswe morago

NEWS Leave a comment

Ka OBAKENG MAJE

18 Mopitlwe 2025- Kgetsi ya polao kgatlhanong le Mietjie Babiki Fischer (44), wa kwa motseng wa Diplankeng kwa Magogong, gaufi le Taung, e buseditswe morago go fitlha di 20 Mopitlwe 2025, ke kgotlhatshekelo ya Taung. Se, se tla morago ga gore Fischer a latofadiwe ka go bolaya Boitumelo Sebekedi wa kwa motseng wa Lokaleng dibeke tse pedi tse di fetileng.  

Go begwa fa Sebekedi a ne a latofadiwa ka go utswa Jojo tank, mme a tlhaselwa ke baagi. Go ya ka dipego, Sebekedi o ile a teketiwa ka ketane le go tlhabiwa ka thipa pele ga a ka bidiwa ka garawe.

Go begwa fa baagi ba ile ba mo tsenya mo kgetsing, mme ba mo latlhela kwa forong. Ene ya re morago ga nakonyana, go begwa fa baagi ba ile ba ntsha Sebekedi kwa forong eo.

Go begwa fa baagi ba ile ba mo isa kwa godimo le kwa tlase makgetlhonyana, pele ga ba mo tshela ka motlhapo le makgome. Go begwa fa sepodisi se ile sa tshwara basadi ba le bararo, fela ba le babedi ba ile ba ntshiwa gonne go se bopaki jo bo tletseng kgatlhanong le bone.

Sepodisi se ile sa tshwara Fischer, mme ba mo latofatsa ka polao. Fischer o solofetswe go dira kopo ya beile ka di 20 Mopitlwe 2025.

Kgabagare, sepodisi se ganne go tshwaela mo tiragalong e, gonne ba tlhalositse fa seo se tla kgoreletsa dipatlisiso tsa bone mo kgetsing.

taungdailynews@gmail.com