13 Mopitlwe 2025- Monna (35) wa kwa motseng wa Modutung kwa Magogong, gaufi le Taung, o solofetswe go rotola matlho fa pele ga magistrata wa kgotlhatshekelo ya Taung mo letsatsing la kamoso. Monna o, o ile a tshwarwa mabapi le polao ya ga mmagwe, Masego Irene Nkwane (56).
Go begwa fa go ile ga tsoga thefosano ya mafoko magareng ga moswi le mmelaelwa. Go ya ka dipego, mmelaelwa one a tsaya garawe le go kgenetha mmagwe ka yone.
Sebueledi sa sepodisi mono Bokone Bophirima, Brigadier Sabata Mokgwabone are, kegtsi e butswe, mme mmelaelwa o lebagane ke kgetsi ya polao.
Go begwa fa mmelaelwa a ne a lebotsa phokoje morago ga tiragalo. Sepodisi se ile sa mo tshwara ka Laboraro.
Kgabagare, baagi ba ikuela go puso go ka tlhoma seteishene sa sepodisi kwa motseng wa Magogong, gonne o fetogile kgapamadi.
13 Mopitlwe 2025- Kgetsi ya polao kgatlhanong le Mietjie Babiki Fischer (44), wa kwa motseng wa Diplankeng kwa Magogong, gaufi le Taung, e buseditswe morago go fitlha di 17 Mopitlwe 2025. Se se tla morago ga gore Fischer a latofadiwe ka go bolaya Boitumelo Sebekedi wa kwa motseng wa Lokaleng matsatsi a le marataro a fitileng.
Go begwa fa Sebekedi a ne a latofadiwa ka go utswa Jojo tank, mme a tlhaselwa ke baagi. Go ya ka dipego, Sebekedi o ile a teketiwa ka ketane le go tlhabiwa ka thipa pele ga a ka bidiwa ka garawe.
Go begwa fa baagi ba ile ba mo tsenya mo kgetsing, mme ba mo latlhela kwa forong. Ene ya re morago ga nakonyana, go begwa fa baagi ba ile ba ntsha Sebekedi kwa forong eo.
Go begwa fa baagi ba ile ba mo isa kwa godimo le kwa tlase makgetlhonyana, pele ga ba mo tshela ka motlhapo le makgome. Go begwa fa sepodisi se ile sa tshwara basadi ba le bararo, fela ba le babedi ba ile ba ntshiwa gonne go se bopaki jo bo tletseng kgatlhanong le bone.
Sepodisi se ile sa tshwara Fischer, mme ba mo latofatsa ka polao. Fischer o solofetswe go dira kopo ya beile ka di 17 Mopitlwe 2025.
Kgabagare, sepodisi se ganne go tshwaela mo tiragalong e, gonne ba tlhalositse fa seo se tla kgoreletsa dipatlisiso tsa bone mo kgetsing.
11 Mopitlwe 2025- Modulasetilo wa setlhopha sa Indomitable Lions FC sa kwa motsesetoropong wa Pudimoe, gaufi le Taung, Archibald Aotlotlwe Seothaeng (50), o fitlhilwe kwa dirapeng tsa baswi kwa motseng wa Dryharts, mono Taung ka Lamatlhatso. Seothaeng o neetswe phitlho ya manobonobo, o kailwe jaaka motho o neng a le boikobo, bonolo, ebile a rata thuto.
Batla phitlhong ba ne ba tlile ka bontsi jo bo thibang letsatsi go tla go felegetse Seothaeng.
Mokatisi wa setlhopa sa Indomitable Lions FC, Olebogeng Kalabatane are ba simolotse go dira le Seothaeng ka 2021, fa ba ne ba aga setlhopa sa seo. Kalabatane are Seothaeng, one a le botlhale, mme ba fitlheletse dilo di le dintsi thata motlase ga tsamaiso ya gagwe.
“Bontsi jwa nako, re kopane le mathata mme Seothaeng one a dumela mo go baleng. One a itse melao ya kgwele ya dinao. One o tla bona seo fa go na le dikgogakgogano. Gape, Seothaeng one a dumela mo go tsweleleng pele.
“Seothaeng o thusitse setlhopa ka keteledi-pele ya gagwe e manontlhotlho. Se se utlwisang botlhoko ke gore, ga nke re itse nako ya loso ke leng. Gona le dilo di le dintsi tse oneng a batlile go di direla setlhopa mo ngwageng o,” Kalabatane wa tlhalosa.
Mokhuduthamaga kwa LGSETA, Inneeleng Molete, o tlhalositse Seothaeng jaaka motho oneng a rata tiro ya gagwe. Molete are LGSETA tiro ya bona ke go rotloetsa basha le go bula ditshono tsa ditiro le dithuto.
“Kgang ya rona ke go bula ditshono, mme re dira gore go nne le kgolagano magareng ga dimasepala tsotlhe go ralala naga. Re thusa bana ba dikobo dikhutsane gore ba bone madi a go tsweletsa dithuto tsa bone kwa di unibesiti tse di farologaneng.
“Karolo eo, e tshamikilwe ke Seothaeng mo porofenseng ya Bokone Bophirima. Boeteledipele jwa gagwe ene ele jo bo namatshang,” Molete wa tlhalosa.
Modiri-mmogo wa maloba wa ga Seothaeng kwa Lefapheng La Badiri, Paul Motshweneng are Seothaeng o dirile jaaka Employment Officer kwa lefapheng la bone, mme one a le bonolo. Motshweneng are Seothaeng o iponetse dikgele di le mmalwa jaaka modiri o gaisitseng wa ngwaga.
Kgabagare, morwadia Seothaeng, Kganya, o tlhalositse rragwe jaaka motho oneng a dula a ba rotloetsa thata gore ba tseye dithuto tsa bone tsia. Kganya are bat la dula ba mogopola ka dinako tsotlhe.
Setshwantsho: Modulasetilo wa setlhopha sa kwele ya dinao sa Indomitable Lions FC/Facebook
Ka REGINALD KANYANE
28 Tlhakole 2025- Melaetsa ya matshidiso e tsweletse go goroga kwa lelapeng la ga Seothaeng morago ga go tlhokafala ga morwa wa bone, Archie Seothaeng (50). Seothaeng yo eneng ele modulasetilo wa setlhopha sa Indomitable Lions FC, sa kwa Pudimoe, gaufi le Taung, o tlhokafetse mo kotsing e masisi ya sejanaga mo tseleng ya Koster ga mmogo le Lichtenburg, mo letsatsing la Labobedi.
Go begwa fa sejanaga se Seothaeng aneng a tsamaya ka sone, se ile sa thulana le lori eneng e rwele katakata.
Go ya ka sebueledi sa sepodisi mo Bokone Bophirima, Mokapteine Mpho Manyoba, dipatlisiso di tsweletse mo kgetsing e. Manyoba are dipatlisiso di tla tlhalosa gore tlholo ya kotsi ke eng.
“Ke nnete monna wa dingwaga di le 50 o tlhokafetse mo kotsi ya sejanaga mo letsatsing la Labobedi. Dintlha tshotlhe mabapi le kgetsi e, di tla rebolwa morago ga dipatlisiso,” Manyoba wa tlhalosa.
Kgabagare, morulaganyi wa tonamente ya metsameko, Mothusi Dikwelana are: “Re kwala jaana re le botsamaisi jwa Mothusi Dikwelana Sports Tournament ka mowa o ko tlase re utlwetse botlhoko ko teng. Tsamao ya gago ya tshoganyetso e re amile thata. Seothaeng o tshamikile karolo e tona mo Mothusi Dikwelana Sports Tournament go tloga fela kwa tshimologong.
“One a sa tshabe, ebile a sa itsemeletse go tsaya mogala a ntetsetsa le go neelana ka dikgakololo mabapi le Mothusi Dikwelana Sports Tournament. One a nna teng ngwaga le ngwaga ntle fa fela fa na le ditshwarego. Re latlhegetswe ke motho yo o neng a rata kgwele ya dinao le metshameko ka kakaretso, ebile a le bonolo le boikokobetso.”
Dikwelana are o gopola ngwaga o fetileng fa ba ne ba neela setlhopha sa Indomitable Lions FC kits, Seothaeng one a tshameka le bone are, nnyaa lo tla re bolaisa mmala o mo khibidu. Dikwelana are Seothaeng one a bua seo ka monyebo, mme a bontsha boitumelo.
“One a buile gore ngwaga o jaaka ba sireletsa sejana sa bone lekgetlho la boraro ka tatelano, wa go tla a golegile setlhopa go gaisa. One a buisiwa se ka gore, re ne re mo boleleletse gore re mo batlela ditlhopha tsa kgwele ya dinao tse di diphatsa. A bo a tshega, a amogela dikabo ka lerato a bo a leboga.
“Jannong, jaaka botsamaisi jwa Mothusi Dikwelana Sports Tournament, re are go ba losika le ditsala, botsamaisi, batshamiki, balatedi botlhe ba Indomitable Lions FC, Modimo ke botshabelo, thuso le maatla ka nako ya ditlalelo. Lo gomotsegeleng ruri, ebile re tshepele mo thapelong,” Dikwelana wa tlhalosa.
Setshwantsho: Balatofadiwa ba le bararo go ba le bane mo kgetsing ya polao
OBAKENG MAJE
25 Tlhakole 2025- Kgetsi ya polao kgatlhanong le banna ba le bane ba kwa motseng wa Manthe, gaufi le Taung, e buseditswe morago go fitlha kgwedi ya Motsheganong e tlhola matsatsi a le 5. Bakang Katong (32), yo o atlholetsweng dingwaga di le robedi kwa kgolegelong mo kgetsing ya petelelo, ga mmogo le balatofadiwa nae mo kgetsing ya polao, Thabang Lenyai (23), Katlego Mosimege (31) le Phenyo Katong (34), ba ne ba tlhageletse ka boripana kwa kgotlha-tshekelo ya Taung mo letsatsing la Moshupulogo.
Balatofadiwa ba, ba ile ba tshwarwa dingwaga di le pedi tse di fetileng morago ga go latofadiwa ka go bolaya Thabiso Mothibedi (35), setlhogo. Go begwa fa ba ile ba mo teketa le go mo golegelela mo generateng.
Seno se tla morago ga gore ba latofatse Mothibedi ka go ba utswetsa madi a seatleng a lekang ka R20 000 le motsoko wa R600.
Sebueledi sa sepodisi mo Bokone Bophirima, mokaptein Sam Tselanyane, o ile a tlhalosetsa ba lekwalo-dikgang la Taung DailyNews gore dipatlisiso di shupa fa tiragalo e, ele ya di 29 Moranang 2022. Tselanyane are go ile ga begwa fa moswi a ile a siela kwa motseng wa Longaneng.
“Fela, go begwa fa balatofadiwa ba ile ba tswa letsholo le go mo latela. Go begwa fa go gorogeng ga bone kwa motseng wa Manthe, ba ile ba gokelela moswi mo generateng, mme ba mo teketa go fitlhelela a tlhokafala.
“Go begwa fa balatofadiwa ba ile ba tabogisetsa moswi kwa kliniking ya selegae fa ba bona a neela mowa. Baoki ba ne ba tlhalosa fa go se sepe se ba ka se dirang go boloka moswi, gonne one a setse a balelelwa le badimo,” Tselanyane wa tlhalosa.
Kgabagare, ka di 1 Motsheganong 2022, baagi ba ile ba bolotsa mogwanto kgatlhanong le balatofadiwa, mme ba ile ba fisa matlo a bone a le mararo mo tiragalong e. Gape, baagi ba ile thuba le go senya ntlo-maitiso ya balatofadiwa, mme ba itseela le nnotagi.
Go begwa fa Katong le Lenyai ba boleletse lekgotlha ka mokgwa wa toriso ya lekwalo gore, ba ipona molato mo ditatofatso tsotlhe kgatlhanong le bone, mme ba tlhalositse fa Mosimege le Phenyo, ba ne ba sena seabe mo tiragalong e.
Mo letlhakuring le lengwe, bosekisi le bone bo tlhalositse fa boitekanetse go ka tswelela ka tsheko, mme bo shupa fa bona le kgetsi e kwenneng kgatlhanong le banna ba, ba le bane.
23 February 2025- Ngwana wa dingwaga di le pedi o tlhokafetse kwa motseng wa Rooiwal, gaufi le Taung, morago ga go wela le go nwela mo khuting e tletseng metsi. Go begwa fa Lethabo Comfort Moroko, a ile a wela mo khuting e tletseng metsi kwa morago ga ntlo fa a ne a tshameka.
Sebueledi sa sepodisi mo Bokone Bophirima, Brigadier Sabata Mokgwabone are tiragalo e, ke ya Labotlhabo thapama.
“Sepodisi se butse kgetsi ya morago ga loso. Go begwa fa ngwana o, a ile wela mo khuting. Go ile ga bidiwa ba ditirelo tsa potlako (Emergency Medical Response Services). Fela ba ne ba fitlhela ngwana o, a setse a ntshitswe mo khuting ke bangwe ba baagi, ebile a iketse badimong.
“Jaaka ba sepodisi, ga re belaele fa go ka tswa go na le letsogo la tshwene mo losong la ngwana o,” Mokgwabone wa tlhalosa.
19 Tlhakole 2025- Kgetsi ya polao kgatlhanong le lekawana la kwa motseng wa Lokgabeng, gaufi le Taung, e buseditswe morago go fitlha di 202 Tlhakole 2025, ke kgotlhatshekelo ya Taung. Simon Molale (22), yo a latofadiwang ka go tlhaba le go bolaya lekgarebe la gagwe, Tshepiso Medichane (21), o kwa ntlo-lefitshwana morago ga go ganelwa ka beile.
Go begwa fa Molale a ne a tlhaba Medichane le go mo bolaya, mme one a tshaba kwa lefelong la tiragalo morago ga go bona batho. Fela, go begwa fa ba lelapa la gagwe ba ne ba mo tshwara le go mo isa kwa seteisheneng sa sepodisi sa Taung di ura morago ga tiragalo e.
Go begwa fa Molale a lekile go tsaya botshelo jwa gagwe pele ga ba lelapa la gagwe ba ka mo neela sepodisi ka motsi o. Molale o ile a amogelwa kwa bookelo jwa selegae jwa Taung morago ga magatwe a gore o ile a itlhaba ka thipa.
Kgabagare, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are Molale one a tshwarwa le go latofadiwa ka polao ya ga Medichane.
“Ke nnete molatofadiwa mo kgetsing e ya polao o tshwerwe. Molatofadiwa one a isiwa kwa seteisheneng sa sepodisi ke ba lelapa la gagwe.
“One a na le dikgobalo, mme o ile a amogelwa kwa bookelong jwa selegae. Molatofadiwa o lebagane le kgetsi ya polao, mme thipa e e dirisitsweng go bolaya moswi ene ya fitlhelwa kwa lefelong la tiragalo.”
Go fitlha ga jaana, bosekisi bo tlhalositse fa bo setse bo emetse dipholo tsa diteko tsa thipa e go begwang fa Molale a e dirisitse go bolaya Medichane, mme dipatlisiso mo kgetsing di a tswelela.
17 Tlhakole 2025- Kgetsi ya polao kgatlhanong le lekawana la kwa motseng wa Lokgabeng, gaufi le Taung, e tla boela kwa kgotlhatshekelo ya Taung mo letsatsing la gompieno. Simon Molale (22), yo a latofadiwang ka go tlhaba le go bolaya lekgarebe la gagwe, Tshepiso Medichane (21), o kwa ntlo-lefitshwana morago ga go ganelwa ka beile ke kgotlha-tshekelo ya Taung mo nakong e e fetileng.
Go begwa fa Molale a ne a tlhaba Medichane le go mo bolaya, mme one a tshaba kwa lefelong la tiragalo morago ga go bona batho.
Fela, go begwa fa ba lelapa la gagwe ba ne ba mo tshwara le go mo isa kwa seteisheneng sa sepodisi sa Taung di ura morago ga tiragalo e. Go begwa fa Molale a lekile go tsaya botshelo jwa gagwe pele ga ba lelapa la gagwe ba ka mo neela sepodisi ka motsi o.
Molale o ile a amogelwa kwa bookelo jwa selegae jwa Taung morago ga magatwe a gore o ile a itlhaba ka thipa.
Kgabagare, sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen are Molale one a tshwarwa le go latofadiwa ka polao ya ga Medichane.
“Ke nnete molatofadiwa mo kgetsing e ya polao o tshwerwe. Molatofadiwa one a isiwa kwa seteisheneng sa sepodisi ke ba lelapa la gagwe.
“One a na le dikgobalo, mme o ile a amogelwa kwa bookelong jwa selegae. Molatofadiwa o lebagane le kgetsi ya polao, mme thipa e e dirisitsweng go bolaya moswi ene ya fitlhelwa kwa lefelong la tiragalo.”
Go fitlha ga jaana, bosekisi bo tlhalositse fa bo setse bo emetse dipholo tsa diteko tsa thipa e go begwang fa Molale a e dirisitse go bolaya Medichane, mme dipatlisiso mo kgetsing di a tswelela.
11 Tlhakole 2025- Ba lelapa la ga Senyasamore kwa kgaolong ya Lehatlheng kwa motseng wa Dryharts, gaufi le Taung, ba re ba itumeletse dithuso tse ba di amogetseng go tswa go puso. Se setla morago ga gore ntlo ya diphaposi di le tharo ya lelapa, e phepheulwe ke phefo, morago ga dipula tse di maatla.
Seo, se ile sa tlogela ba lelapa ba iphotlhere, ebile ba sena legae. Maloko a le mararo a lelapa, ba ile ba iponela dikgobalo tse dimasisi.
Go ya ka sebueledi sa lelapa, Thabo Senyasamore, dipula tse di maatla, di ile tsa tsaya marulelo a ntlo, ga mmogo le go senya dilwana tsa mo ntlung. Fela, Senyasamore are ba itumeletse kemo-nokeng e ba e boneng go puso.
“Go fitlha ga jaana, re itumeletse dithuso tse re di boneng go tswa kwa lefapheng la katlatlelo-loago mono Bokone Bophirima. Ba tlisitse diphuthelwana tsa dijo, mme ga ke itse gore a e tlile go nna selo sa kgwedi le kgwedi kgotsa jang.
“Re ile ra neelwa le madi a seatleng a lekanang ka R2100. Kwa masepaleng o mogolwane wa Taung, ba ile ba kopa gore re dire tekanyetso-kabo ya gore madi a ka baakanyang ntlo e ka nna bokae. Ke ile ka ba neela tekanyetso-kabo eo, jaanong re setse re emetse go utlwa go tswa mo go bone gore ba ka tla leng go baakanya ntlo,” Senyasamore wa tlhalosa.
Kgabagare, sebueledi sa lefapha la katlatlelo-loago mo Bokone Bophirima, Petrus Siko are, badiri ba bone ba katlatlelo-loago, ba neetse ba lelapa la ga Senyasamore thobo-maikutlo le go ba thusa gore ba amogele seemo sa bone sa botshelo morago ga tiragalo e. Siko are, lelapa le neetswe ditlabakelo tsotlhe tse di tlhokegang.
“Ba ile ba golagangwa le lefapha la SASSA go ka ikwadisetsa madi a ba a tlhokang (social relief of distress in a form of cash) go ba thusa go ka aga ntlo ya bone gape, ga mmogo le go bona dilo tse di botlhokwa.
“Modiri wa rona wa katlatlelo-loago, o ka tswelela ka go ela seemo tlhoko le go tlisa pharologanyo go ba lelapa. Re ile ra neela lelapa diphuthelwana tsa dijo, mme re ka tswelela go ela tlhoko seemo kwa lelapeng go fitlhelela go nna le botsitso,” Siko wa tlhalosa.
Gape Siko are, ba tlile go tswelela go dirisana le mafapha a farologaneng go netefatsa fa thuso nngwe le nngwe e lelapa le e tlhokang la e bona.
7 Tlhakole 2025- Baagi ba kwa motseng wa Leshobo, gaufi le Taung, ba mina ka nko ele nosi mme ba ikuela go puso go tswala mabenkele (spaza shops) tsotlhe kwa motseng wa bone gore go diriwe ditlhatlhobo. Se setla morago ga gore moithuti wa kwa sekolong se se potlana sa Leshobo, a reke mazimba kwa lebenkeleng lengwe, mme a lwala.
Go ya ka moeteledipele wa baagi, Shimmy Gaseranye, tiragalo e, ke ya letsatsi la Laboraro. Gaseranye are go begwa fa baithuti ba ile ba go reka mazimba, mme gwa fitlhelwa fa a na le dipilisi mo teng.
“Ka maswabi, ngwana o jeleng mazimba ao, o ile a tlhaka-tlhakana. O ile a tabogisetswa kwa kliniking, mme kliniki yone e ile ya mo romela kwa bookelong jwa selegae jwa Taung.
“Re ikuela go batsadi go ela tlhoko fa bana ba sa reke mazimba kwa mabenkeleng a ba tswa kwa. Go begwa fa batlhatlhobi ba dijo go tswa kwa masepaleng wa sedika wa Dr Ruth Segomotsi Mompati, ba ile ba etela lebenkele leo, le go tlhatlhoba dijo tsotlhe tse di rekisiwang koo,” Gaseranye wa tlhalosa.
Are, jaaka baagi, ga se maikaelelo a bona go baka ditlhakatlhakano, fela ba ne a tlile go kopa mong wa lebenkele go le tswala, mme go diriwe dipatlisiso. Gaseranye are, batlhatlhobi ba setse ba tshotse mazimba ao, mme ba setse ba bone gore a rekilwe kae.
“Jaanong, potso ya rona jaaka baagi ke gore, ra reng ka mabenkele a mabapi a le one a rekileng mazimba teng kwa mong wa lebenkele le a rekileng teng? Jaaka re bua jaana, bana ba bangwe le bone ba tsweletse go ja mazimba go tswa kwa mabekeleng a mabapi,” Gaseranye wa tlhalosa.
Sebueledi sa Lefapha la Boitekanelo mo Bokone Bophirima, Lucas Mothibedi are, ke nnete ngwana wa dingwaga di le 15, o amogetswe kwa bookelong jwa selegae morago ga go ja mazimba. Mothibedi are, go begwa fa ngwana o, a rekile mazimba go lebenkele lengwe mme o ile a lwala.
“Molwetsi o, o gorogile kwa bookelong jwa Taung a tlhatsa, mme a shupa gape fa ana le ditlhabi. Dingaka ga mmogo le baooki, ba ile ba mo thusa. Mme go fitlhelela ga jaana, molwetsi o, o mo maemong a siame,” Mothibedi wa tlhalosa.
Kgabagare, mokhudutahmaga wa dipuso selegae, ga mmogo le tsamaiso ya segosi, Oageng Molapisi are: “Go ya kwa mafelelong a ngwaga, naga e ile ya itemogela dikgetsi di le dintsi tsa bana ba ba tlhokafalang mabapi le go ja dijo tse bontsi jwa tsone direkilweng kwa mabenkeleng (spaza shop) a selegae.
“Go latela go tlhatlhoga ga dikgetsi tseo, mopresidente Cyril Ramaphosa, o ile a kopa gore mabenkele (spaza shops) otlhe, ga mmogo le ditheo tse di rekisang dijo, di ikwadise kwa di masepaleng tse di farologaneng pele ga matsatsi a le 21.”
Molapisi are fela nako ya ikwadiso ile ya okediwa go fitlha ka di 28 Tlhakole 2025. Are go nnile le dintsho tse di bakilweng ke dijo tseo tse di kgotlhelegileng mo porofenseng, ebile go nnile le dikgetsi di le 85 tse di kwadisitsweng, ga mmogo le dintsho di 5.
The Guardian 