Tag Archives: ga mmogo le kgaitsadie

Maloko a le mararo a kwa Shaleng a fitlhilwe, fa molatofadiwa a boela kwa kgotlha-tshekelo go dira kopo ya beile

NEWS Leave a comment

Setshwantsho: Molekgotlha kwa masepaleng o mogolwane wa Taung, Itumeleng Maribe

By OBAKENG MAJE

25 Ngwanatsele 2024- Monna wa kwa motseng wa Shaleng, gaufi le Taung, o a latofadiwang ka go bolaya rragwe, Mosimanegape Kale (74), mmagwe eleng Phodisho Kale (68), ga mmogo le kgaitsadie, Bonolo Kale (27), o solofetswe go dira kopo ya beile kwa Kgotlha-tshekelong ya Kgomotso mo letsatsing la gompieno.

Molatofadiwa, Olebogeng Mampe Kale (33), o latofadiwa ka go ngata rragwe, mmagwe le kgaitsadie ka molamu mo ditlhogong, mme a ba bolaya ka gagwe dibeke di le pedi tse di fetileng.  

Go ya ka sebueledi sa sepodisi mo Bokone Bophirima, Colonel Adele Myburgh, Kale one a tsena kwa gagabo, mme a fitlhela ba losika la gagwe ba dutse mo tafoleng e go nwelwang mogodungwana mo go yone kwa mogwafatsheng wa bone. Myburgh are Kale o ile a ngata batsadi ba gagwe le kgaitsadie ka molamu mo ditlhogong.

“Go begwa fa maloko mangwe a losika ba ne ba tshaba ka letlhaba-phefo go efoga tiragalo e. Ba ile ba siele kwa baagisanyeng le go kopa thuso. Go begwa fa maloko mangwe a baagi, ba ile ba tswa letsholo le go batlana le monna o, morago ga gore a tsene ka lenga la seloko.

“Ba ile ba mo tshwara ka Lamatlhatso ka ura ya borataro mo mosong le go mo neela sepodisi. Ba thuso ya potlako ba ile ba bidiwa, mme ba netefatsa fa baswi ba tlhokafaletse kwa lefelong la tiragalo,” Myburgh wa tlhalosa.

Mokomishinara wa sepodisi mo Bokone Bophirima, Lieutenant General Sello Kwena, o ile a kgala tiragalo e e setlhogo e ka bogale. Kwena o ile akgola baagi morago ga go thusana le sepodisi mo go tshwareng molatofadiwa.

Kgabagare, baswi ba ile ba fitlhiwa ka Lamatlhatso teng kwa motseng wa Shaleng. Molekgotlha kwa masepaleng o mogolwane wa Taung, Itumeleng Maribe are, baagi ba le bantsi ba ile ba tlhalosa fa ba belaela gore molatofadiwa a ka tswa a ne a le mo tlase ga tshushumetso ya diritibatsi fa a ne a dira tiro e.

“Ba ikuetse go puso go ka bolotsa ntwa kgatlhanong le tiriso e botlhatswa ya diritibatsi. Baagi ba re jaaka puso e boloditse ntwa kgatlhanong le mabenkele a rekisang dijo tse di fetilweng ke nako, e tshwanetse gore e dire fela jalo kgatlhanong le tiriso e botlhatswa ya diritibatsi.

“Jaanong, ba tlhalositse gore botlhe ba ba rekisang diritibatsi, ba tshwarwe mme molao o tseye karolo. Ba re diritibatsi di senya bokamoso jwa basha ba le bantsi, mme seo se tseelwe tlhogong. Ba re basha botlhe ba ba dirisang diritibatsi, ba tshwanetse gore ba thusiwe, mme Lefapha la Katlatlelo-Loago le lone le thuse,” Maribe wa tlhalosa.

Are ba tlile go dirisana le sepodisi go ka leka go reba ditiragalo tse di ntseng jaana gore di se tlhola di diragala. Maribe are jaaka masepala, ba ile ba etela lelapa mogare ga beke le go neelana ka dithuso.

taungdailynews@gmail.com

  

Meyara wa masepala o mogolwane wa Taung, Tumisang Gaoraelwe o etetse ba lelapa la rra Kale kwa Shaleng

NEWS Leave a comment

Setshwantsho: Meyara wa masepala o mogolwane wa Taung, Tumisang Gaoraelwe o thubega ka selelo      

Ka OBAKENG MAJE 

20 Ngwanatsele 2024- Ba lelapa la rra Kale la kwa motseng wa Shaleng, gaufi le Taung, ba tlhalositse fa ba tlhoka dithuso go ka tsweletsa phitlho. Se se tla morago ga gore mongwe wa leloko la lelapa, Olebogeng Mampe Kale (33), a latofadiwe ka go bolaya batsadi ba gagwe, Mosemanegape Kale (74), Phodisho Kale (68), ga mmogo le kgaitsadie, Bonolo Kale (27).   

Kale o ile a tshwarwa, mme kgetsi ya gagwe e buseditswe morago go fitlha di 25 Ngwanatsele 2024. 

Meyara wa masepala o mogolwane wa Taung, Tumisang Gaoraelwe, o ile a etela lelapa. Gaoraelwe yo oneng a patilwe ke molekgotlha Itumeleng Maribe are, ba ne ba ile go busa maoto kwa lelapeng morago ga tiragalo e setlhogo e. 

“Ga re kitla re lo naya sepe se se tla busetsang tiragalo e kwa morago. Go le gantsi fa re etela malapa a diragaletsweng ke sengwe sa go tshwana le se, ba fitlha ba re tlhalosetsa gore go diragetseng. 

“Jaanong, mo kgannyeng e, re bone go se botlhokwa gore re tlhole re lo botsa gore go diragetseng, gonne mongwe le mongwe wa itse. Re tlhaloseditswe fa ba lelapa ba kaile fa ba na le makasi a baswi le serame, mme ba tlhoka thuso tsa dijo. 

“Re tla bua le bo rrakgwebo bangwe go ka thusa ntle le go ikgolega. Rona jaaka masepala ga re ntshe dijo. Fela re ile ra leka go batlana le dithuso go batho bangwe ba re dirang le bone (service providers),” Gaoraelwe wa tlhalosa. 

Gaoraelwe are ba itse gore dintsho tse di ntseng jaana, di oka batho ba le bantsi. Are jaanong, fa go ka nna le sengwe, ba tla boela mo lelapeng.  

Kgabagare, Modulasetilo wa setheo se eseng sa puso sa Sino Themba, eleng Golekane Morwe are: “Modiredi-loago wa rona, Goitsemang Sehako, one a etela sekolo se segolwane sa Motheletsi, gonne gona le baithuti ba rra Kale teng. 

“Baithuti bao ke Mphoentle Kale (17) yo o dirang Mophato wa 11, ga mmogo le Tlhalefo Kale (16) wa Mophato wa 8. Fela, Sehako o tlhalositse fa ba se kitla ba thoba bana bao maikutlo go fitlha ba fetsa go kwala ditlhatlhobo tsa bone tsa mafelo a ngwaga.”

Morwe are Sehako o tlhalositse fa seo se ka ba tsosetsa diletseng, mme se ba kgoreletse mo ditlhatlhobong tsa bone. Are jaanong, ba tlhalositse fa ba tla ba thoba maikutlo morago ga ditlhatlhobo. 

“Go tloga moo, ba ile ba etela lelapa, mme ba buisana le Gomolemo Kale (39). Ba lelapa ba ile ba tlhalosa fa ba tlhoka dithuso gore ba ka tsweletsa phitlho. 

taungdailynews@gmail.com

Monna o tshwerwe morago ga go latofadiwa ka go bolaya rragwe, mmagwe ga mmogo le kgaitsadie kwa Shaleng

NEWS Leave a comment

Setshwantsho: Mongwe wa baswi, Bonolo Kale

Ka OBAKENG MAJE

16 Ngwanatsele 2024- Monna wa dingwaga di le 33 wa kwa motseng wa Shaleng, gaufi le Taung, o solofetswe go tlhagelela kwa Kgotlha-tshekelong ya Kgomotso ka Mosupulogo. Se se tla morago ga go latofadiwa ka go bolaya rragwe, Mosimanegape Kale (74), mmagwe eleng Phodisho Kale (68), ga mmogo le kgaitsadie, Bonolo Kale (26).

Go begwa fa monna o, a ile a tsena kwa mokhukhung wa kwa gagabo, mme a fitlhela ba lelapa la gagwe ba itisitse ka mogodungwana. Go begwa fa monna o, a ile a ba tlhasela ka molamu.

Sebueledi sa sepodisi mo Bokone Bophirima, Colonel Adele Myburgh are: “Go begwa fa monna o, a ile a ngata ba lelapa la gagwe ka molamu mo ditlhogong, mme a sia kwa lefelong la tiragalo. Tiragalo e, ke ya maabane bosigo.

“Maloko a lelapa a le mararo, a ile a netefadiwa fa a tlhokafetse ke ba ditirelo tsa tshoganyetso. Bangwe ba baagi ba ile ba tswa letsholo le go batlana le mmelaelwa. Monna o, o ile a lelelwa ke ditshipi mo mosong jaana, mme o solofetswe go ka shadikanya matlho kwa Kgotlha-tshekelo ya Kgomotso ka Mosupulogo.”

Myburgh are dikgetsi di le tharo tsa polao di butswe kgatlhanong le mmelaelwa, mme sebakwa sa tiro e, ga se se itsiwe. Myburgh are dipatlisiso mo tiragalong e, di tsweletse.

Modula-setilo wa setlamo sa Sino Themba se eseng sa puso, mme se dira ka ditshotlakako kgatlhanong le bong, Golekane Morwe are tiragalo e, e amile maikutlo a baagi. Morwe are ba ikuela go batho botlhe go ka lwa kgatlhanong le ditshotlakako tsa bong.

“Re ka netefasa fa tiragalo e, e tlogetse baagi ba gamaregile, ebile ba ipotsa gore sebakwa sa bosetlhogo jo bo kana-kana ke jwa eng. Re ikuela gore re le baagi, re eme ka dinao, mme re lwe kgatlhanong le ditiragalo tse,” Morwe wa tlhalosa.

Kgabagare, kemedi go tswa kwa masepaleng o mogolwane wa Taung, e solofetswe go ka etela lelapa ka Mosupulogo.

taungdailynews@gmail.com