Ka OBAKENG MAJE
26 Ngwanatsele 2025- Kgetsi ya go teketa le go shupa ka sethunya kgatlhanong le molatofadiwa, Korononea Jeremia Modise (34), e buseditswe morago go fitlha Sedimonthole a tlhola matsatsi a le 11 ke kgotlhatshekelo ya Taung. Modise, yo eleng monna wa kwa motseng wa Dikhuting, gaufi le Taung, one a tshwarwa le go latofadiwa ka go teketa le go shupa ka sethunya.
Go ya ka dipego, monna wa kwa Picong, Batsile Eric Sebico (43) one a tlhaselwa le go teketwa ke Modise ka kgwedi ya Seetebosigo mono ngwaga. Go begwa fa Sebico a ile a kgorogelwa ke banna ba ba neng ba tsamaya ka sejanaga sa Toyota GD6 ga mmogo le Volkswagen Polo e khibidu kwa legaeng la gagwe.
Ka nako eo, sebueledi sa sepodisi mono Bokone Bophirima, Brigadier Sabata Mokgwabone are go begwa fa banna bangwe ba ile ba tsena kwa legae la mongongoregi le go mo teketa. Mokgwabone are go begwa fa banna ba, ba ile ba thuntsa dikolo di le pedi mo setswalong sa mongongoregi pele ga ba ka tsamaya.
“Sepodisi se butse dikgetsi di le tharo kgatlhanong le molatofadiwa, eleng kgetsi ya go teketa, tshenyo ya dithoto ga mmogo le go shupa ka sethunya,” Mokgwabone wa tlhalosa.
Ene ya re fa lekwalo-dikgang la rona la The Guardian le botsa Mokgwabone ka magatwe a gore babelaelwa ba, ba latofadiwa ka go ja ga mmogo le batlhankela bangwe ba sepodisi, ebile go kaiwa fa ba tshabiwa, one a araba ka gore bone jaaka sepodisi ga ba itse sepe ka magatwe ao.
“Jaaka sepodisi, ga re na bopaki jwa gore banna ba, ba tshabiwa ke sepodisi, ebile ba amega mo dikgetsing tse dingwe. Jaanong, re ikuela go mongwe le mongwe o a nang le bopaki mabapi le seo go tsenya ngongora gore sepodisi se batlisise ntlha eo,” Mokgwabone wa tlhalosa.
Sebueledi sa National Prosecuting Authority (NPA) mono porofenseng ya Bokone Bophirima, Sivenathi Gunya are kgetsi ya go teketa ga mmogo le go shupa ka sethunya kgatlhanong le Modise, e ile ya busediwa morago ga bofelo ke kgotlhatshekelo ya Taung.
Kgabagare, go begwa fa sepodisi mono Bokone Bophirima se batlisisa kgetsi ya go thubiwa ga dikantoro tsa babatlisisi (Detectives) ba dikgetsi tse di farologaneng mono Taung. Se, se tla morago ga magatwe a gore dikantoro tsa babatlisi ba sepodisi mono Taung di robiwe, mme ga utswiwa dokete ya ga Modise.
Go begwa fa e se ga ntlha dokete e, e utswiwa. Go begwa fa go tlile ga utswiwa foromo ya J88 ya mongongoregi mo go yone.
Go begwa fa gape Modise a buletswe kgetsi ya go teketa Christopher More (70). More one a tlhaselwa gabedi ka dinako tse difarologaneng kwa motseng wa gagabo wa Picong le go fisetswa ntlo ga mmogo le sejanaga.
Gape, go begwa fa a ne a tlhaselwa le go shupiwa ka sethunya kwa legaeng la gagwe kwa Monoto-mosetlha kwa motseng wa Tlapeng.
Mokgwabone ga tshwaela mabapi le magatwe a dokete ya ga Modise e e utswitsweng kwa dikantorong tsa sepodisi mono Taung.
The Guardian 