Ka OBAKENG MAJE

26 Ferikgong 2025- Banna ba le babedi ba ba letseng ba tshwerwe ke sepodisi mabapi le polao ya ga Tumelo Seokame (22), ba golotswe ke sepodisi. Go ya ka sebueledi sa sepodisi mono Bokone Bophirima, Colonel Adele Myburgh, banna bao, ba letse ba tshotswe ke sepodisi sa Vryburg go ya go botsolodiwa mabapi le polao ya ga Seokame.

“Ke nnete, sepodisi se letse se tshotse banna ba le babedi go ya go ba tlhoma dipotso mabapi le polao ya ga Seokame, mme go fitlhetswe fa ele gore ga ba na kamano le go bolaiwa ga ga Seokame. Ka jalo, ba ile ba gololwa.

“Go fitlha ga jaana, ga gona ope o tshwerweng, mme dipatlisiso di tsweletse,” Myburgh wa tlhalosa.

Seokame one a thuntsiwa le go bolawa ke banna bangwe ba ba sa itsiweng kwa motseng wa Morokweng, gaufi le Ganyesa. Go begwa fa tiragalo e, e diragetse ka masa a letsatsi la Tshipi (19 Ferikgong 2025).

Go ya ka dipego, go bonwe sejanaga sa modiro wa VW Polo sa mmala o motala wa loapi ka nomoro plata ya porofense ya Gauteng, se se neng se kaila-kaila gaufi le legae la moswi eleng Tumelo Seokame. Go begwa fa ka nako eo, Seokame one a le kwa lefelong la boiketlo ga mmogo le lekgarebe la gagwe.

Go begwa fa Seokame ane a tsamaya le lekgarebe la gagwe go ya go robala. Go ya ka dipego, banna ba, ba ile ba ya go mo batla kwa gagabo, mme ba motlhoka.

Fela go begwa fa Seokame ya re a sentse a itheeditse kwa lelapeng la kgarebe ya gagwe, banna ba le bane ba ba sa itsiweng ba ne ba itelekela teng koo, mme ba kopa thuso mabapi le sejanaga sa bone se seneng se ba fa mathata.

Go begwa fa seo, ene ele tsela ya bone ya go gogela Seokame kwa ntle gore ba kgone go mo tlhasela. Go begwa fa lekgarebe la ga Seokame le ne la utlwa sethunya se gelebetega kwa ntle, mme moraganyana, one a bona Seokame oneng a phukga-phukga madi a tla a taboga le go siela mo ntlung.

Go ya ka dipego, Seokame one a laela lekgarebe la gagwe go le botsa phokoje fa ene a ne a leka go thiba setswalo. Go begwa fa lekgarebe la gagwe le ile la betsega ka letlhaba-phefo, fela one a kopana le mongwe wa banna ba kwa ntle.

Go begwa fa ka lesego, monna owa a sa montsha dikgobalo. Go begwa fa mongwe wa banna ba, a ile a tswelela ka go raga setswalo, mme one a tsena le go thuntsa Seokame makgetlho a le supa.

Go ya ka dipego, Seokame o thuntsitswe mo tlhogong makgetlho ale mabedi, gangwe mo letsogong, le mo mokwatla. Bathuso ya potlako ba ne ba bidiwa le go netefatsa fa Seokame a ragile kika kwa lefelong la tiragalo.

Kgabagare, sepodisi sa mono Bokone Bophirima, ga ise se netefatse bonnete jwa kgang e.

taungdailynews@gmail.com