Tag Archives: Baagi ba kwa motseng wa Kolong

Porojeke ya metsi e tsweletse kwa Kolong

NEWS Leave a comment

Setshwantsho: Porojeke ya metsi e tsweletse kwa Kolong  

Ka OBAKENG MAJE

Porojeke ya dimilione di feta R80m e eneng ya puagangwa ke rakonteraka wa Phala Borwa le Amawakawaka, e tsweletse. Se se tla morago ga gore masepala wa Sedika wa Dr Ruth Segomotsi Mompati, o kgaogane le rakonteraka wa Phala Borwa le Amawakawaka, mme o ile wa thapa rakontereka o montsha wa Ultimate Dynamic.

Bontsi jwa baagi, ba ile ba tlhalosa fa tlhokego ya metsi jaanong ele selo-modiro kwa metseng ya bone. Baagi ba, ba tlhalositse fa ba patelesega go tsamaya dikilometara di feta 10 go ka bona metsi. Ene ya re mo dikgweding tse di fetileng, baagi ba kwa motseng wa Kolong, ba ile ba bolotsa mogwanto le go thibela ditsela ka dikala tsa ditlhare, ga mmogo le makgetlhe, ba ipelaetsa kgatlhanong le tlhokego ya metsi.

Kgabagare, go ya ka molekgotlha kwa masepaleng wa Sedika wa Dr Ruth Segomotsi Mompati, yo ebileng ele leloko la kabinete ya ga majoro, mme a ikarabela ka tsa mafaratlhatlha, Pico Seepamere are ba itumetse thata go ka itsise baagi ba kwa metseng e tshwana le Manthe, Kolong, Mothanthanyaneng, Sekhing le metse e mabapi gore e se kgale ba tla be ba nwa metsi, mme ba siele ba bangwe.  

“Ke tla netefatsa gore ke nnete dirori tsa konteraka ya Ultimate Dynamic, di setse di gorogile kwa lefelong la porojeke. Ba simolotse go dira, mme re dumalane le bone gore pele ga Sedimonthole 2024, ba be ba setse ba neetse bagaetsho metsi. Bone ke dikomponi tse dikgolo, mme ra ba tshepang.

“O tla gopola gore re ile ra nna le matsapa mabapi le konteraka ya Phala Borwa le ya Mawakawaka, mo ebile re ile ra tshwanelwa ke go khutlhisa konteraka ya bone. Jaanong, re semeletse mme re ikuela go ba garona ba ba tlileng ba nna le di kontereka tse dinnye (sub-contractors), go ka iponatsa,” Seepamere wa tlhalosa.

Seepamere are ba rata go leboga tirisano-mmogo e ba e boneng go batsaya-karolo botlhe. Are mme ba na le tshepo ya gore leshekere la tlhokego ya metsi e tlile go nna selo sa maloba kwa metseng e farologaneng mono Taung.

“Re tla tlhalosa gape gore botlhe ba baneng ba sa duelwa madi a bone a neng a saletse kwa morago, ba setse ba duetswe. Ba baneng ba sa duelwa, ke bo rakonteraka ba bannye (sub-contractors), mme dithulaganyo di tsweletse gore ba lefiwe moputso wa bone.

“Tota wa itse gore tiro e tshaba diatla. Jaanong, re tlile go tswelela fela jalo ka tirisano mmogo. Re lebogela tirisano-mmogo ya magosi, ga mmogo le balekgotlha ba ba farologaneng, ba ba tshotseng karolo. Re tla tswelela fela jalo ka go netefatsa gore re lwa ntwa e ya tlhokego ya metsi, mme kwa bofelong baagi ba rona ba nwe metsi,” Seepamere wa tlhalosa.

taungdailynews@gmail.com

Baagi ba Kolong ba batla gore meepo o bulwe

NEWS Leave a comment

Setshwantsho: Moepo o sa tlhomamang/Setshwantsho-papiso

Ka OBAKENG MAJE 

Baagi ba kwa motseng wa Kolong, gaufi le Taung, ba tlhalositse fa ba latlhegetswe ke tshepo mo bogosing jwa Batlhaping Baga Phuduhutswana. Baagi ba tlhaloitse fa ba na le nako e telele ba ikuela go Kgosi Tshepo Mankuroane go ba neela katlenegiso ya go epa dimenerale jaaka ditemane kwa motseng wa bone. 

Fela, ba tlhalositse fa Mankuroane a ba beile letsogo mo phatlheng, mme go se nko e tswa lemina go fitlha ga jaana.   

Mongwe wa baeteledipele wa baagi, Leburu Dutch Moatshetsi are mathata a ba nang le one ke gore, bogosi jwa bone le magosana, ba palelwa ke go ba thusa. Moashetsi are ba lobaka ba tsenela dikopano le bogosi, fela ga gona thuso. 

“Mo letsatsing la maabane, rene rena le Kgosi ya rona, Kgosi Sylvester Phatlhanaye, fela one a bua puo ele nosi fela are, ga gona matekiri ape a tlileng go nnang teng fa a sentse ale mo botshelong. Rona re lelela bana ba rona, gonne ga ba dire. 

“Fela, Mankuroane le ne one a re tshepisitse gore o tla kopana le rona, mme ga gwa nna jalo. Jaaka re le komiti, baagi ba re bona jaaka batho ba ba maaka. Mankuroane le ene ga ayo, ga mmogo le magosana a gagwe,” Moashetsi wa tlhalosa. 

O mongwe wa baagi, Rapelang Tapiso are ba lapile ke go boa-boa kwa kgotlha, mme ba ipotsa gore go baneng Mankuroane a sia-sia. Tapiso are morafe o tlhoka dikarabo, mme se se makatsang ke gore, Mankuroane kgale a boa-boa kwa go bone. 

“Kgosi o ile are tshepisa gore se re se batlang re tlile go se bona. Kgosi o tshwere selo sa rona, mme o gana go re se naya. Potso ke gore o ganelang ka sone, gonne dilo tse ke tsa morafe. 

“Matekiri a, a tshwanetswe ke go berekiwa ke morafe, mme jaaka re bua jaana, batho ba tsena kwa matekiring ao, mme ba itseela ditemane tsa morafe. Fela, basha ba le bantsi ga ba dire, mme re ikuela go Mankuroane gore are neele se eleng sa rona,” Tapiso wa tlhalosa. 

Moeteledipele wa morafe, Modiri Phatlhanyane are: “Ga e sale re tsenela dikopane le Kgosi Tshepo Mankuroane, mme re kopa gore are neele lekwalo le le re atlenegisang gore rele morafe, re ka tsweletsa kepo ya matikiri. Fela, o re tshepisitse makgetlho a le mantsi, mme re ntse re boa-boa fa gonne o ile are tshepisa gore beke e e fetileng ga nkitla e fela re ise re bone dikarabo. 

“Jaanong, baagi ba re shupa ka monwana, ebile ba re latofatsa ka go sireletsa Kgosi gonne bontsi jwa nako, go tsamaya komiti ebe e tlisa pegelo kwa morafeng. Jaanong, baagi ba ile ba tsaya tshwetso ya go tla le rona go tla go itseela ka tsebe.” 

Phatlhanyane are dilo di pedi fela tse baagi ba di batlang. Are ke gore a Mankuroane wa ba thusa kgotsa nnyaa. 

Kgabagare, Mankurone are ba sentse ba le mo tseleng ya go dira kopo ya lekwalo le le tla ba letlelelang gore matikiri a nne teng karolong eo. Mankuroane are kgang ya gagwe e tlhamaletse fela jaaka tsela ya Kgalagadi, ebile ga nkitla a tsamaya a fetogile. 

“Morafe ka ngwaga wa 2012, o ile wa tsaya tshwetso ya gore bogosi bo dire kopo ya dikepo, mme re dirile fela jalo. Ga jaana re mo tseleng eo, mme seo se tlile gore thusa thata mo go rebeng botlhoka-tiro le lehuma mo kgaolong ya rona ya Taung. Re ka se phuthi matsogo re ntse re bona bana ba rona ba sa dire. 

“Tota ga go ope o tla ratang se. Re tshepa gore letsatsi lengwe, Modimo o tla re nesetsa pula, mme botlhoka-tiro, ga mmogo le lehuma di fele mo kgaolong ya rona ya Taung,” Mankuroane wa tlhalosa. 

taungdailynews@gmail.com