Ka OBAKENG MAJE
15 Lwetse 2025- Sepodisi sa Taung se batlisisa kgetsi ya go phamphololwa ga motshini o ntshang madi (ATM) ka bomo. Se, se tla morago ga gore motshini o ntshang madi wa Standard Bank, o phamphololwe ka bomo ka masa a letsatsi la Moshupulogo.
Go begwa fa tiragalo e, e diragetse ka ura ya bobedi mo mosong. Go ya ka dipego, go tshotswe madi a sa totobalang.
Sebueledi sa sepodisi mono Bokone Bophirima, Brigadier Sabata Mokgwabone are: “Ga gona ope o tshwerweng go fitlha ga jaana.”
Kgabagare, ke tiragalo ya boraro e dirigala mo motseng wa Taung mo dikgweding tse pedi. Ka kgwedi ya Phatwe 2025, motshini o ntshang madi wa kwa motseng wa Manthe, o ile wa phamphololwa ka bomo, fa motshini wa kwa Reivilo one wa phamphololwa ka bomo beke e e fetileng.
The Guardian 