Ka OBAKENG MAJE
Baagi ka kakaretso go ralala metse ya Taung, ba re ba setse ba itlhobogile mo go boneng metsi a phepha, ebile a nwega. Baagi ba, ba re ba tsweletse go itewa ke lenyora le mororo masepala wa sedika wa Dr Ruth Segomotsi Mompati, ga mmogo le setlamo se se rebolang metsi sa Magalies Water, se ba tshepisitse gore batla bona metsi a sa kgaleng go tloga ka letsatsi la Mosupulogo.
Seno se ile sa pateletsa baeteledipele ba mokgatlho wa Tlhokego Ya Metsi Concerned Group, go leba kwa dikantorong tsa Magalies Water mo letsatsing la maabane. Mongwe wa baeteledipele wa mokgatlho o, Letlhogonolo Phutieagae, are ba dirile se ele go leka go bona dikarabo mo ntlheng ya tlhokego ya metsi.
“Jaanong, re dumalane fela ka bongwe jwa pelo le baagi ba Taung gore, re tlile go bolotsa mogwanto mo letsatsing la Mosupologo wa beke e e tlang fa dingongorego tsa rona di sa sekegelwe tsebe. Re ne re le mo kopanong mo bekeng e fetileng, mme masepala wa sedika, ga mmogo le Magalies Water, ba ile ba re tshepisa gore re tlile go bona metsi go tloga ka Mosupulogo.
“Fela dipompo di tsweletse go kgala, mme ga re tlhaloganye gore sebakwa sa seno ke eng. Re ne re tsenetse kopano le ba Magalies Water mo letsatsing la maabane, fela ga ra bona dikarabo. Ke ka moo o bonang re ile ra ya kwa dikantorong tsa Batlhaping Baga Phuduhucwana go ya go kopana le Kgosi Tshepo Mankuroane,” Phutieagae wa tlhalosa.
Are masepala wa sedika, ga mmogo le Magalies Water, ba dirile maitlamo a mo pele ga kgosi, jaanong ba ne ba batla go mo itsise gore, se sene se buiwa ko kopanong ya maloba sene se sena bonnete.
Kgabagare, molekgotlha kwa masepaleng wa Dr Ruth Segomotsi Mompati, Pico Seepamere yo ebileng a ikarabela ka mafaratlhatlha kwa komiting ya ga majoro are: “Re tla itsise baagi gore re okeditse dirori tse di neelanang ka metsi mo Taung. Gape, re emetse ditanka di le 15 tse re tlileng go diphasalatsang le metse e farologaneng ya Taung.
“Se, se tlile go re thusa gore metse yotlhe e fitlhelele metsi. Jaanong, re kopile ka tswedintswe gore, baagi ba ba kgonang gore beela ditanka tse mo dijarateng tsa bone, ba dire jalo. Seo se tla thusa gore metsi ao a se kgotlhelege.”
Seepamere are mo bekeng e e fitileng, ba ne ba tsenetse kopano le setlamo sa Vaalharts.
“Re dumalane le bone gore re tshwanetswe gore re okeletswe metsi. O tla gopola gore, diperesente di le 70 tsa metsi are a bonang, a fetela kwa temo-thuong. Jaanong, seo se re tlogele ka diperesente di le 30 tsa metsi a nowang.
“Maswabi ke gore, le one metsi ao, re a kgaoganya le balemi ba mo Taung. Jaanong, seo se dira gore go nne le tlhokego e e tseneletseng ya metsi. Fela re setse re kwaletse ba lefapha la metsi ga mmogo le kgelelo-leswe, gore ba re okeletse metsi,” Seepamere wa tlhalosa.
Seepamere are masepala o tsweletse ka go aga madutelo, mme mangwe a one a tla dirisetswa go tlhatswa metsi. Seepamere are, metsi a bonwang kwa Taung, ana le iron e ntsi go fitlha ga jaana.
The Guardian 