Ka OBAKENG MAJE
17 Mopitlwe 2025- Monna wa kwa Ranstad, mono Taung, o solofetswe go rotola matlho mo pele ga magistrata wa Taung mo letsatsing la gompieno. Se se tla morago ga ditatofatsa tsa go tlhabakaka Kegomoditswe Mphahlele ka thipa.
Go begwa fa tirago e, ele ya beke e fetileng teng kwa motseng wa Ranstad.
Ka OBAKENG MAJE
18 Sedimonthole 2024- Lekgotlha-tsamaiso la sekolo se se potlana sa Motswedi Thuto, gaufi le motse wa Magogong, mono Taung, le ikuela go Lefapha La Thuto kwa Kapa Bokone, go ka batlisisa botsukunape kwa sekolong.
Se se tla morago ga ditatofatso tsa gore madi a sekolo a lekanyediwang go feta milione a nyelele, mme go sa itsiwe gore a ile kae.
Modulasetilo wa lekgotlha-tsamaiso la sekolo, Kealeboga Sebe, o latofatsa mogokgo, Victor Nkukane, ga mmogo le tlelaka ya sekolo, Connie Monnahela ka go nna bofitlha. Sebe are ba lobaka ba ikuela go botsamaisi jwa sekolo go ka ba neela dikarabo, fela maiteko a bone a iteile sefololetsa.
“Re itemogetse matsapa a le mantsi kwa sekolong jaaka go latlhegelwa ke madi. Ka di 24 Phukwi 2024, re ne ra tsenela kopano ya sekolo jaaka lekgotlha-tsamaiso, ga mmogo le botsamaisi.
“Mme kwa kopanong eo, re ile ra itsisiwe fa madi a sekolo ene ele R1 370 000.00. Fela re ile ra makadiwa ke gore fa dikolo di bulwa, re ile ra itsisiwe fa go setse R135 000.00,” Sebe wa tlhalosa.
Sebe are ba ile ba leka go botsa botsamaisi jwa sekolo gore madi ao a ile kae, fela ga ba ka ba bona dikarabo. Sebe are se ba se tlhaloganyang ke gore, madi a sekolo ga a tswe fa dikolo di tswadilwe.
“Se se botlhoko ke gore kgwedi le kgwedi go tswa madi a kanang ka R2000 mo polokelong ya sekolo, mme ga re itse gore a ya kae. Ke tlhaloganya gore jaaka lekgotlha-taolo la sekolo, modulasetilo ga mmogo le motshwara-matlotlo, ke bone ba ba tshwanetseng go ka dira ka letlole la sekolo.
“Fela go fitlha ga jaana, botsamaisi jwa sekolo ga bo botla gore re itsise sepe ka letlole leo. Bonyenyane jo re bo fitlhelelang ke go goga setlankana sa dichelete (statement) fela,” Sebe wa tlhalosa.
Are ga ba letlelelwa go ka nna karolo ya setlhopa se se tsayang ditshwetso mo tirisong ya madi kwa sekolo. Gape Sebe are, gona le madi a ntshiwang mme go begwe fa ele a go feba baithuti.
“Mo bekeng ba kgona go ntsha madi a kanang ka R48 000. Seo se bakile kgotlhang magareng ga lekgotlha-taolo le botsamaisi jwa sekolo. Gape, bothata jo re bo itemogetseng ke gore, botsamaisi jwa sekolo bo setse bo dirisa maina a maloko a maloba a lekgotlha-taolo la sekolo a aneng a tlhopiwa ka 2015, le ba sa tlhole ele maloko.
“Batho bao kgale ba ne ba tswa mo ditilong tseo. Fela re tlile go lwantsha botsukunape jo bo diragalang kwa sekolong. Re kgona go tsena kopano le botsamaisi, mme re dumalane, fela o tla be o bona ba setse ba fetogile mme ba itirele fele jaaka ba batla,” Sebe wa tlhalosa.
Kgabagare, sebueledi sa Lefapha La Thuto kwa Kapa Bokone, Geoffrey van de Merwe are, lefapha le boloditse dipatlisiso mo kgannyeng e.
Ka OBAKENG MAJE
22 Diphalane 2024- Setlamo sa Ultimate Dynamic se se tsenyang dipeipi tsa metsi magareng ga motse wa Manthe le Makwating, mono Taung, se tsibosa ba dirisi ba tsela ka kgoreletsego e tlileng go nnang teng mo letsatsing la kamoso (23 Diphalane 2024).
Modiri wa tsa Pholo le Tshireletsego (Health and Safety) kwa Ultimate Dynamic, Peter Bareng, are ba rata go itsise baagi, ga mmogo le badirisi ba tsela ka letsholo le le tla thankgololwang la go thujwa ga matlapa magareng ga motse wa Manthe le Makwating.
“Tiragalo e, ke ya letsatsi la kamoso (23 Diphalane 2024). Letsholo le, le tlile go tsaya ura mme re ikuela go badirisi ba tsela go nna kelo-tlhoko. Letsholo le, le thankgololwa jaana ele go letla konteraka ya Utlimate Dynamic e e tsenyana dipeipi tsa metsi, go ka thuba matlapa gore e kgone go epa mosele wa go tsenya dipeipi sentle.
“Re tlile go leka ka bojotlhe gore dikgato tse di maleba tsa tshireletsego di tsenngwe tirisong. Gape, re tla netefatsa fa badirisi ba tsela le bone ba sireletsegile, mme rena le ditlabakelo tsotlhe tse di maleba, ga mmogo le tetla ya go ka thuba matlapa ao go ya ka semolao,” Bareng wa tlhalosa.
Are tshireletsego ya baagi go ralala metse e e tla amegang e tseetswe kwa setlhoeng, mme go tla tsenngwa tirisong melao ya tshireletsego jaaka Seismographs go lekola thoromo ya lefatshe fa go thubiwa matlapa. Bareng are go tla netefatswa fa go diriwa seo go ya ka tshireletsego le sekgala se se rileng.
“Kgaolo ya tshireletsego (safety zone) e tla dirwa go potologa lefelo le go thubiwang matlapa mo go lone, mme baitsaanape ba ba rupeletsweng go utlwala ba tla be ba le teng go ele tlhoko seemo mo tulong eo.
“Baagi ga mmogo le dikgwebo tse di gaufi le lefelo le, ba tla itsisiwe ka nako pele ga go thubiwa matlapa ao. Go ka nna ga itemogelwa modumo o sa tlwaelesegang, ga mmogo le thoromo ya lefatshe e namatshang mo karolong e go thubiwang matlapa mo go yone,” Bareng wa tlhalosa.
Are tsela e tla tswalwa nakwana, mme bakgweetsi ba tla lemosiwa gore ba lebe kae go ka efoga se. Bareng are ba kopa maitshwarelo go botlhe ba ba tla amiwang ke tiragalo e, mme botlhe ba ba nang le dipotso ba ka letsetsa dinomoro tsa 0765157782 go ka tlhalosetswa botokwa.
Kgabagare, sebueledi sa mokgatlho wa ditekesi wa Taung Taxi Association, Tshidi Letlhaku are: “Re ikuela go maloko a rona a ditekesi go tsaya tsiboso e tsia. Seo se tla ba thusa gore ba ba rwalelang baithuti go ya kwa dikolong tse di farologaneng, thata jang ba marematlou ba efoge tiego eo.
“Ka jalo, re ba rotloetsa go tsaya tsela ya Taung Dam, gore ba se itemogele tiego epe.”
The Guardian 