Ka AGISANANG SCUFF
19 Ngwanatsele 2025- Monna wa dingwaga di le 27 o atlholetswe dingwaga di le robedi kwa kgolegelong ke kgotlhatshekelo ya sedika ya Richmond mabapi le polao. Go begwa fa kgwedi ya Diphalane e ne e tlhola matsatsi a 5 ka ngwaga wa 2024, sepodisi se ile sa amogela ngongora go tswa kwa bookelong mabapi le monna o tlhokafetseng morago ga go tlhabiwa.
Sebueledi sa sepodisi kwa porofenseng ya Kapa Bokone, Sarasanta Molefi Shemane are sepodisi se ile sa bolotsa dipatlisiso mabapi le kgang e. Shemane are dipatlisiso di ile tsa shupa fa molatofadiwa,
Koos Goliath ga mmogo le moswi, Jerome van Wyk (25), ba ile ba nna le dinganyisano.
“Go shupa fa dinganyisano tseo, di ile tsa lebisa kwa go tlhabiweng ga ga van Wyk. Dipatlisiso tsa sepodisi di ile tsa lebisa kwa go tshwarweng ga ga Goliath kwa New Extension, Ritchmond. Molatofadiwa o ile a tlhagelela kwa kgotlhatshekelo, mme a gololwa ka beile go fitlhelela kgetsi ya gagwe e ya bokhutlhong,” Shemane wa tlhalosa.
Kgabagare, mokomishinara wa sepodisi wa sedika sa Pixley Ka Seme, Major General Nomana Mtukushe, o akgotse mmatlisisi wa kgetsi e, eleng Detective Constable Rodney Julius mabapi le matsetseleko a a dirileng go batlisisa kgetsi e. Mtukushe are dipatlisiso tsa ga Julius di tsentse molatofadiwa ka kgolegelo.
“Se, se tla tlisa kagiso go ba lelapa la moswi,” Mtukushe wa tlhalosa.
The Guardian 