Ka OBAKENG MAJE
23 Moranang 2025- Kgetsi ya maiteko a polao le polao kgatlhanong le mong wa lebenkele le le rekisang nnotagi la The Meat Brother’s Pub, Tshwaro Mangwegape (42) e buseditswe morago go fitlha ka di 25 Seetebosigo 2025, ke kgotlhatshekelo ya Taung. Mangwegape one a tlhageletse ka boripana kwa kgotlhatshekelo ya Taung ka di 17 Moranang 2025.
Mangwegape o latofadiwa ka go bolaya motshameki o diphatsa wa setlhopha sa kgwele ya dinao sa NWU Institute, Undivile “Vilo” Mdi (28), ga mmogo le go tlogela tsala ya gagwe ya tlhogo ya kgomo, Aobakwe Ernest Kokwe (35) ka dikgobalo tse di masisi. Go begwa fa Mdi le Kokwe, ba ne ba le gareng ga batho ba ba neng ba etetse lefelo la The Meat Brother’s Pub ka di 16 Sedimonthole 2023, go ya go ijesa monate fa gone go runya thuntso.
Go ya ka Mangwegape, Mdi le Kokwe, ba ne ba le gareng ga setlhotshwana se seneng sa tsena ka dikgoka kwa lefelo la gagwe le go senya dithoto. Morago ga tiragalo e, Mangwegape one a ineela kwa sepodising. One a tshwarwa le go latofadiwa ka polao ga mmogo le maiteko a polao.
Kgabagare, go begwa fa ba lelapa la ga Mdi ba kwaletse tlhogo ya bosekisi mono porofenseng ya Bokone Bophirima, mme ba ikuela gore mosekisi ga mmogo le mmatlisisi mo kgetsi e, ba ikgogele morago. Se se tla morago ga dipego tsa gore phetishini e e neng e kwadilwe ke baagi e ntshiwe mo doketeng ya kgetsi ka motsi o molatofadiwa a ne a tsenya kopo ya beile kwa North West High Court kwa Mahikeng. Seo se ile sa lebisa kwa go reng Mangwegape a neelwe beile ya R5000.
Fela, ba bueledi ba molatofadiwa, le bone ba ile ba tlhalosa fa ba tlile go dira kopo ya gore magistrate mo kgetsing e, le ene a itokolole, gonne ba sena tshepo mo go ene.
The Guardian 