Ka KEDIBONE MOLAETSI
4 Lwetse 2025- Kgetsi ya polao kagtlhanong le monna wa kwa kgaolong ya Marikana kwa motse-setoropong wa Utlwanang kwa Christiana, Olebile Jan Sereetsi (40), e tlhotse e buseditswe morago go fitlha di 28 Diphalane 2025, ke kgotlhatshekelo ya Christiana go ka ipaakanyetsa letlha la tsheko. Sereetsi yo oneng a solofetswe go dira kopo ya beile, o ile a puaganya kopo eo.
Sereetsi o latofadiwang ka go bolaya mokapelo wa lekgarebe la gagwe la maloba. Go begwa fa ka di 26 Lwetse 2024, molatofadiwa a ile a leba kwa ntlung ya mokapelo wa gagwe wa maloba, mme a mo fitlhela a na le lekau la gagwe, Charlie Kati (31), mme go ile ga runya kgotlhang.
Go ya ka sebueledi sa sepodisi mo Bokone Bophirima, Lieutenant Colonel Amanda Funani, go begwa fa Sereetsi a ile a tlhaba Kati ka thipa, mme a mo gogela kwa sekgweng se se gaufi.
“Go begwa fa Sereetsi, a ile a kgabetlhelela moswi ka go mo kgaola maoto le go mo segolola serwe sa gagwe sa senna. Go begwa fa Sereetsi, a ile a latlhela dikarolo dingwe tsa mmele mo molapong, ga mmogo le setopo sa moswi.
“Go begwa fa lekgarebe la moswi, le ile la lotlegela sepodisi ka se se diragetseng, mme a bega fa lekau la gagwe le timetse. Seo, se ile sa lebisa kwa go batlaneng le moswi,” Funani wa tlhalosa.
Funani are mongwe wa baagi one a loma sepodisi tsebe gore o bone Sereetsi a kgorometsa kereibaye, mme a lebile kwa molapong. Funani are, lekala la sepodisi le le sapang, le ile la bidiwa le go batlana le setopo sa ga Kati kwa molapong.
“Sepodisi se ile sa bona serwe sa moswi sa senna, ga mmogo le dikarolo dingwe tsa mmele di latlhetswe mo molapong,” Funani wa tlhalosa.
The Guardian 