Ka OBAKENG MAJE
Mokgweetsi wa sejanaga sa modiro wa Toyota Tazz o tlhokafetse mo kotsing ya sejanaga mo letsatsing la Labotlhano. Go begwa fa mokgweetsi wa dingwaga di le 48, a ile a thulana le tekesi ya modiro wa Toyota Quantum, e eneng e pegile bapagami.
Go ya ka sebueledi sa sepodisi mo Bokone Bophirima, Brigadier Sabata Mokgwabone, kotsi e e diragetse gaufi le Taung Agricultural College mo tseleng e e tswang kwa Taung District Hospital, mme e lebile kwa toropong ya Taung. Go begwa fa mokgweetsi wa sejanaga sa Toyota Tazz, ane a sega dijanaga tse dingwe tsebe, mme a latlhegelwa ke taolo.
“Mokgweetsi wa sejanaga sa Toyota Tazz, o ile a thulana le tekesi ya Toyota Quantum, mme a tlhokafalela kwa lefelong la kotsi. Go begwa fa bapagami ba le babedi ba tekesi, ba ile ba tswa dikgobalo, mme ba ile ba rwalelwa kwa bookelong jwa selegae.
“Sepodisi se butse kgetsi ya polao ntle le maikaelelo, mme ga gona ope o tshwerweng go fitlha ga jaana,” Mokgwabone wa tlhalosa.
The Guardian 