Ka OBAKENG MAJE
1 Diphalane 2024- Monna wa kwa kgaolong ya Marikana kwa motse-setoropong wa Utlwanang kwa Christiana, Olebile Jan Sereetsi (40), yo o latofadiwang ka go bolaya mokapelo wa lekgarebe la gagwe la maloba, o ganetswe ka beile ke kgotlha-tshekelo ya Christiana mo letsatsing la maabane.
Go begwa fa ka di 26 Lwetse 2024, molatofadiwa a ile a leba kwa ntlung ya mokapelo wa gagwe wa maloba, mme a mo fitlhela a na le lekau la gagwe, Charlie Kate (31), mme go ile ga runya kgotlhang.
Go ya ka sebueledi sa sepodisi mo Bokone Bophirima, Lieutenant Colonel Amanda Funani, go begwa fa Sereetsi a ile a tlhaba Kate ka thipa, mme a mo gogela kwa sekgweng se se gaufi.
“Go begwa fa Seetsi, a ile a kgabetlhela moswi ka go mo kgaola maoto le go mo segolola serwe sa gagwe sa senna. Go begwa fa Sereetsi, a ile a latlhela dikarolo dingwe tsa mmele mo molapong, ga mmogo le setopo sa moswi.
“Go begwa fa lekgarebe la moswi, le ile la lotlegela sepodisi ka se se diragetseng, mme a bega fa lekau la gagwe le timetse. Seo, se ile sa lebisa kwa sepodising go ka batlana le moswi,” Funani wa tlhalosa.
Funani are mongwe wa baagi one a loma sepodisi tsebe gore o bone Sereetsi a kgorometsa kereibaye, mme a lebile kwa molapong. Funani are, lekala la sepodisi le le sapang, le ile la bidiwa le go batlana le setopo sa ga Kate kwa molapong.
“Sepodisi se ile sa bona serwe sa moswi sa senna, ga mmogo le dikarolo dingwe tsa mmele di latlhetswe mo molapong,” Funani wa tlhalosa.
Kgetsi kagtlhanong le Sereetsi, e buseditswe morago go fitlhelela ka Labotlhano.
Kgabagare, Mokomishinara wa sepodisi mo Bokone Bophirima, Lieutenant General Sello Kwena, o kgadile tiragalo e ka bogale. Kwena are batho ba ithute go rarabolola dikgotlhang tsa bone ntle le ntwa.
“Re rata go akgola sepodisi go ka tshwara molatofadiwa ka bonako. Re kgala tiragalo e ka bogale,” Kwena wa tlhalosa.
The Guardian 