Ka OBAKENG MAJE

21 Phukwi 2025- Sepodisi sa Taung se netefaditse fa se butse kgetsi ya polao ntle le maikaelelo. Se, se tla morago ga go tlhokafala ga Onkgomotse Pona Matlhaku (32) mo kotsing ya sejanaga.

Sebueledi sa sepodisi mono Bokone Bophirima, Lieutenant Colonel Sam Tselanyane are go begwa fa Matlhaku ene ele mopalami mo sejanageng sa Nissan Almera fa sene se thulwa ke sejanaga sa NP 200 LDV. Tselanyane are kotsi e, e diragetse kwa circle mo tsela-kgolo ya N18 ka Lamatlhatso bosigo.

“Go begwa fa sejanaga sa Nissan Almera se ne se se tswa kwa toropong ya Taung, mme se leba kwa motseng wa Mokgareng. Go begwa fa sejanaga se, se ne se setse sele mogare ga circle fa se thulwa ke sejanaga sa NP 200 LDV, se se neng se tswa kwa Hartswater, mme se leba kwa Vryburg.

“Moswi o ile a tlhokafalela kwa lefelong la tiragalo, fa bakgweetsi ba dijanaga di le pedi ba rwaletswe kwa bookelong jwa selegae. Ga gona ope o tshwerweng, mme sepodisi ga se belaele fa go ka tswa go na le botsukunape mo kotsing e,” Tselanyane wa tlhalosa.

taungdailynews@gmail.com