Ka OBAKENG MAJE

20 Ferikgong 2025- Monna wa dingwaga di le 32, o solofetswe go tlhagelela kwa kgotlhatshekelo ya Christiana mo letsatsing la gompieno. Se setla morago ga go latofadiwa ka go betelela mosetsanyana wa dingwaga di le 17.

Go begwa fa tiragalo e, e diragetse kwa motsesetoropong wa Utlwanang, gaufi le Christiana mo letsatsing la Labotlhano.

Go ya ka sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen, moroba o, one a romilwe kwa lebenkeleng fa a ne a kopana le monna wa dingwaga di le 32. Van Rooyen are go begwa fa mokola a ile a tshosetsa moroba o ka thipa, mme a mo betelela.

“Kgetsi ya petelelo e ile ya bulwa kwa seteisheneng sa sepodisi sa Christiana, mme mokola o ile a tshwarwa. O solofetswe go tlhagelela kwa kgotlhatshekelo, mme ene o lebagane le kgetsi ya petelelo,” van Rooyen wa tlhalosa.

taungdailynews@gmail.com