Ka KEDIBONE MOLAETSI
Monna wa dingwaga di le 37 o tshwerwe morago ga go latofadiwa ka go bolaya ngwana wa gagwe o eseng wa madi. Go begwa fa setopo sa ga Olebogeng Molebangwe (13), se ne sena le dintho tsa go tlhabiwa, se bonwe ke moagisani kwa ntlung kwa Oos einde, Rustenburg mo thapameng ka Labotlhano.
Go ya ka sebueledi sa sepodisi mo Bokone Bophirima, Brig Sabata Mokgwabone, moagisani one a itsise sepodisi ka tiragalo eo. Mokgwabone are sepodisi sene sa goroga kwa lefelong la tiragalo, mme se ile sa fitlhela molatofadiwa a tshwere lebante le go bontshang fa a ne a tekeka moswi ka lone.
“Molatofadiwa o ile a kaela mapodisi fa a ne a teketa moswi ka ntlheng ya gore one a tlogetse morwa-rragwe a le nosi kwa ntlung. Setopo sa moswi sene se sana le matshwao a go teketwa, ga mmogo le dintho tsa go tlhabiwa mo leruding la gagwe.
“Kgetsi ya polao ene ya bulwa morago ga gore molatofadiwa a tshwarwe. Molatofadiwa o solofetswe go tlhagelela kwa kgotlhatshekelo ya Rustenburg mo letsatsing la Mosupulogo go lebana le tatofatso ya polao,” Mokgwabone wa tlhalosa.
Kgabagare, Mokomishinara wa sepodisi mo Bokone Bophirima, Lieutenant General Sello Kwena are: “Re kgala tiragalo e e setlhogo e, gonne fa o tla go lebelela, moswi o latlhegetswe ke motshelo mo diatleng tsa motho o a neng a tshwanetse a mo sireletse.
“Jaanong, re laetse ba lephata la rona la dipatlisiso go ka batlisisa kgetsi e ka botlalo, mme ba netefatse gore moswi o bona bosiamisi.”
The Guardian 