Setshwantsho: Sekolo se segolwane sa Seabo
Ka OBAKENG MAJE
Go begwa fa moithuti wa Grade 11 kwa sekolong se segolwane sa Seabo kwa Kokomeng, gaufi le Taung, a tlogetswe ka dikgobalo morago ga go thulwa ke morutabana ka sejanaga. Go ya ka dipego, tiragalo e, e diragetse kwa motseng ka di 13 Diphalane 2023.
Go begwa fa morutabana wa sekolo sa Seabo, mme a tswa kwa porofenseng ya Kwazulu Natal, a ne a kopana le moithuti o, Trimony Mmekwane (17) mo tseleng mme a mo thula ka sejanaga. Go ya ka dipego, morutabana o, one a inaya naga morago ga tiragalo.
Sebueledi sa Lefapha la Thuto mo Bokone Bophirima, Mphata Molokwane are, moithuti o, one a itemogela dikgobalo mo leotong le mo mokotleng. Molokwane are, moithuti o, one a rwalelwa kwa bookelong, mme one a lokololwa morago ga matsatsi a le mararo.
“Ga jaana, moithuti o, o kwala ditlhatlhobo tsa bofelo jwa ngwaga. Go begwa fa morutabana o, a ne a setse a itokolotse kwa tirelong fa tiragalo e e diragala.
“Batsadi ba moithuti o, ba ne ba ya go bega molato kwa sepodisi, mme go begwa fa morutabana o, a setse a boetse kwa gabo kwa Kwazulu Natal. Go fitlha ga jaana, dipatlisiso di tsweletse,” Molokwane wa tlhalosa.
Kgabagare, sebueledi sa sepodisi mo Bokone Bophirima kwa sedikeng sa Dr Ruth Segomotsi Mompati, Warrant Officer Tryphosa van Rooyen are: “Ga gona kgetsi e e butsweng kgatlhanong le mokgweetsi wa sejanaga, gonne go sena motho o a boning dikgobalo. Jaaka sepodisi, re ile ra bula kgetsi ya kotsi ya sejanaga (Accident Report) fela.
The Guardian 