Ka REGINALD KANYANE
Ba lelapa la ga Chupane kwa motseng wa Cokonyane, gaufi le Taung ba kaile fa loso la ga Tshepang Chupane le ba utlwisitse botlhoko. Go begwa fa Tshepang a tlhabilwe ka sengwe se se bogale ke molatofadiwa, Thatayaone Senyasamore (29) mo legetleng.
Go ya ka sebueledi sa sepodisi mo sedikeng sa Dr Ruth Segomotsi Mompati, Warrant Officer Tryphosa van Rooyen, o kaile fa tiragalo e ele ya ha masigo a sa mo letsatsing la Tshipi. Van Rooyen are, sepodisi se ile sa bilediwa kwa kliniking ya selegae kwa Cokonyane morago ga gore banna ba le bararo ba ise moswi, Tshepang yo one a na le dintho tsa go tlhabiwa teng go bona thuso.
“Fela, go kaiwa fa Tshepang a ne a sentse a tlogetse lefatshe le le ka kwano fa a goroga kwa kliniking. Dipatlisiso tsa sepodisi di kaile fa gone ga bulwa kgetsi ya polao, mme Senyasamore one a tshwarwa. One a tlhageletse kwa kgotlha-tshekelo ya Taung, mme kgetsi e buseditswe morago go fitlha ka Mosupologo mo bekeng e e tlang,” Van Rooyen wa tlhalosa.
Kgabagare, motlogole Tshepang, Nonosi Chupane are se se diragaletseng lelapa la bone se botlhoko.
“Tota nna ke le esi, kene kere a mo hitlhe. Ga re itse gore sebakwa sa tiragalo e ke eng gonne batho ba bangwe ba kaya fa Senyasamore a ne a nolwe ke lekgarebe lengwe, mme lene la kopa go tsamaya le Tshepang. Go kaiwa fa lekgarebe leo, le dula mo kgaolong e le nngwe le Tshepang.
“Fela, ga re itse bo nnete jwa kgang gonne re ne re seo. Go tlhalositswer fa seo se ile sa tlhola ntwa gareng ga Senyasamore le Tshepang. Gatwe, Senyasamore o ile a lwantsha Tshepang le go mo tlhaba ka screw driver. Hela jaaka ke buile, ga re na bo nnete jwa kgang eo, gonne nna ke ne ke seo,” Chupane wa tlhalosa.
The Guardian 