Setshwantsho: Baagi ba Manokwane ba gwantela kwa kgotlha-tshekelo ya Taung/Facebook
Ka OBAKENG MAJE
Baagi ba kwa motseng wa Manokwane gaufi le Taung, ba mina ka nko ele nosi morago ga go bolawa ga bagodi ba le babedi kwa motseng wa bone ka letsatsing la Lamatlhatso. Go begwa fa Kelebogile Mirriam Mokgalagadi (70) le Mapulana Polinah Mmusi (80), ba ile ba tlhaselwa le go bolawa ke batho ba ba sa itsiweng.
Go ya ka dipego tsa sepodisi, ene ya re ka Labotlhano mo mosong, Mmusi le Mokgalagadi ba ne ba tswa kwa malapeng a bone go ya go rwalela dikgong kwa nageng. Fela, ba masika a bone ba ile ba se nnisege fa Mmusi le Mokgalagadi ba palelwa ke go boela gae ka tlatlana.
Baagi ba ile ba bolotsa letsholo la go ba batla, mme ene ya re ka ura ya bongwe masigo a sa, bane ba bona ditopo tsa bone tse dineng di na le dikgobalo tse di masisi kwa nageng. Gape go kaiwa fa baswi ba ka tswa ba beteletswe gonne, ditopo tsa bone di ne di sa apara marokgwe a kha teng.
Gone ga tshwarwa banna bale bararo ba batswa-kwa, kwa motseng wa Maphoitsile, fela go fitlha ga jaana, ga go bopaki jo bo ba golaganyang le kgetsi e ya polao. Go begwa fa banna bao, ba sena ditlankana tse di maleba go ka nna mo nageng ya Afrika Borwa, mme ba tshwaretswe go tlola melao ya boditshaba.
Sebueledi sa sepodisi mo Bokone Bophirima, Col Adele Myburgh wa tlhalosa: “Ga gona ope yo o tshwerweng go fitlha ga jaana mo dikgetsing dile pedi tsa polao kwa Manokwane. Re le ba sepodisi, re sentse re ikuela go baagi go ka re thusa ka tshedimosetso e ka lebisang kwa go tshwarweng ga balatofadiwa mo kgetsing e.
“Mongwe le mongwe yo o nang le tshedimosetso, a ka letsetsa mobatlisisi mo kgetsing e, eleng Warrant Officer, Peace Babe mo dinomorong tse di latelang 0824438680. Gape ba ka letsetsa dinomoro tsa 08600 10111. Mongwe le mongwe o sa batleng leina la gagwe le itsiwe a ka romela molaetsa go MySAPS App.”
Mongwe wa baagi, Eddie Mogorwe are se ba se itseng jaaka baagi ke gore, balatofadiwa ba ba tshwerweng ba golagangwa le kgetsi ya polao ya bagodi ba. Mogorwe are, Manokwane Community Forum e ne ya tsamaya le mapodisi go ya go tshwarwa balatofadiwa bao.
“Re tlhaloganya gore diaparo tsa mongwe wa balatofadiwa di ne di na le madi. Gona le bopaki jo bo tsepameng jo bo ba golaganyang le dipolao tse. Gape go dilo di le dintsi jaaka dipolao tse di diragalang mo Taung, mme rele baagi, re tshwanetse go ema ka dinao.
“O mongwe wa balatofadiwa, o ntshitswe kwa kgolegelong mme ga re itse gore jang. Gape gona le mme mongwe o o neng a tlhaselwa le go bolawa kwa sekgweng kwa motseng wa Maphoitsile mo dikgweding tse di fetileng.
The Guardian 