Ka BAKANG MOKOTO
Sepodisi sa Taung se kaile fa se butse kgetse ya go fisiwa ga ntlo ga mmogo le dijanaga dile pedi. Seno se tla morago ga tlhatlharuwane e ene ya tsoga ka Labobedi magareng ga baagi ba motse wa Modimong, Manthe ga mmogo le ba kwa Dikhuting.
Go ya ka tshedimosetso, go begwa fa baagi ba motse wa Manthe le ba Modimong, ba ne ba tswa letsholo le go ya go batlana le segongwana se sene se latofadiwa ka go utswa leruo kwa Dikhuting, mme ba ne ba kopana le dinta di huduga.
Go ya ka mongwe o boneng ka matlho, mme a sa batle fa leina la gagwe le ka itsiwe, o kaile fa go ne ga tsoga nganyisano magareng ga baagi ba Dikhuting, Manthe ga mmogo le Modimong, mo ebileng dithunya di ne tsa ntsiwa. Go begwa fa segongwana se seneng se latofadiwa ka go utswa leruo, sene sa digela baagi bangwe dingalo go fitlhela ba le botsa phokoje.
Go kaiwa fa baagi bangwe ba ne ba amogelwa kwa kliniking ya Manthe ba phukga-phukga madi. Go kaiwa fa segongwana se, sene se hupile tedu, mme ba leba kwa motseng wa Picong, ko ba ne ba fitlha ba ja ntlo ya moagi mongwe, Kalakgosi More ka molelo ga mmogo le sejanaga.
Go begwa fa ba ne ba bona sejanaga sengwe sa motse wa Manthe se sene se eme kwa ntlung nngwe, mme le sone ba ne ba se lakaila ka molelo.
Kgabagare, sebueledi sa sepodisi mo Bokone Bophirima, Brig Sabata Mokgwabone are: “Re ka netefatsa gore go na le ntlo nngwe ya moagi kwa Dikhuting e ene ya jewa ka molelo mohama, le sejanaga sengwe. Seno se diragaetse morago ga kgothakgothano magareng ga baagi.
“Go begwa fa gona le leruo lengwe le le utswitsweng, mme jaaka sepodisi re sentse re kokwanya dintlha ka botlalo. Jaanong, dintlha tse di feletseng di tla rebolwa moragonyana,” Mokgwabone wa tlhalosa.
The Guardian 